Rəsmi Moskva Dağlıq Qarabağ münaqişəsinin sülh yolu ilə, Azərbaycanın ərazi bütövlüyü çərçivəsində həllinin tərəfdarıdır

Bakı:

15 °C

94 %

0 m/s

AZ RU EN

Ana səhifə / Siyasət / Rəsmi Moskva Dağlıq Qarabağ münaqişəsinin sülh yolu ilə, Azərbaycanın ərazi bütövlüyü çərçivəsində həllinin tərəfdarıdır

Rəsmi Moskva Dağlıq Qarabağ münaqişəsinin sülh yolu ilə, Azərbaycanın ərazi bütövlüyü çərçivəsində həllinin tərəfdarıdır

13.03.2009 [09:35]

Dünən Azərbaycanın xarici işlər naziri Elmar Məmmədyarov ölkəmizdə səfərdə olan rusiyalı həmkarı Sergey Lavrovla görüşüb. Görüşdən sonra birgə mətbuat konfransı keçirən nazirlər müzakirə olunan məsələlər haqqında məlumat veriblər. Nazir E.Məmmədyarov bildirib ki, görüşdə Ermənistan-Azərbaycan, Dağlıq Qarabağ münaqişəsinin nizamlanması və Xəzərin hüquqi statusunun müəyyən olunması, habelə, Azərbaycan ilə Rusiya arasında siyasi, iqtisadi, humanitar və digər sahələrdə əməkdaşlığın inkişafı ilə bağlı məsələlər müzakirə edilib. Azərbaycanın xarici siyasət idarəsinin rəhbəri qeyd edib ki, görüşdə Dağlıq Qarabağ münaqişəsinə dair Azərbaycanın mövqeyi S.Lavrovun diqqətinə çatdırılıb, münaqişənin yalnız Azərbaycanın ərazi bütövlüyü, sərhədlərinin toxunulmazlığı prinsipi çərçivəsində həllinin mümkünlüyü bildirilib. Rusiyanın xarici işlər naziri S.Lavrov ölkəsi üçün Azərbaycan ilə əməkdaşlığın əhəmiyyətini xüsusi vurğulayaraq, görüşdə BMT, MDB, Avropa Şurası və digər beynəlxalq qurumlarda münasibətlərin genişləndirilməsi perspektivləri ətrafında da fikir mübadiləsi apardıqlarını deyib.
Rusiyanın Dağlıq Qarabağ münaqişəsinin sülh yolu ilə, Azərbaycanın ərazi bütövlüyü çərçivəsində həllinin tərəfdarı olduğunu vurğulayan S.Lavrov əlavə edib ki, rəsmi Moskva münaqişənin nizamlanması istiqamətində Minsk Qrupunun həmsədrlərinin səylərini dəstəkləyir. Münaqişənin həllinin bir çox ölkələrin, regionda yerləşən dövlətlərin marağında olduğunu deyən rusiyalı nazir qeyd edib ki, ötən ilin payızında Moskvada Azərbaycan, Rusiya və Ermənistan prezidentlərinin imzaladıqları bəyannamədə münaqişənin nizamlanması istiqamətində prosesin irəliləməsinin dəqiq parametrləri öz əksini tapıb. Azərbaycan ilə Rusiya arasında ticarət dövriyyəsinin 2 milyard dollar olduğunu deyən S.Lavrov ölkəmizdə rus dilinə və mədəniyyətinə göstərilən böyük qayğıya, M.V.Lomonosov adına Moskva Dövlət Universitetinin Bakı filialının açılmasına görə, Azərbaycan rəhbərliyinə xüsusi minnətdarlığını bildirib. Rusiyanın Azərbaycana məxsus Qəbələ RLS-in ABŞ-la birgə istifadəsi təklifinə gəlincə, rusiyalı nazir bildirib ki, əməkdaşlıq təklifi hələlik masa üzərindədir. Əgər amerikalı həmkarlar təklifə maraq göstərsələr və rəsmi Bakı bu varianta razılıq versə, onda məsələ yenidən müzakirə oluna bilər. “Qəbələ RLS gələcəkdə digər ölkələrin istifadəsinə verilə bilərmi” sualını cavablandıran Azərbaycanın xarici işlər naziri E.Məmmədyarov deyib ki, RLS-in üçüncü ölkəyə icarəyə verilməsi məsələsi gündəlikdə deyil.

Paylaş:

Baxılıb: 1718 dəfə