Aleksandr Lapşinin ekstradisiyası ölkə qanunlarına və beynəlxalq hüquqa əsaslanır

Bakı:

22 °C

61 %

5 m/s

Əlaqə

AZ RU EN

Ana səhifə / Siyasət / Aleksandr Lapşinin ekstradisiyası ölkə qanunlarına və beynəlxalq hüquqa əsaslanır

Aleksandr Lapşinin ekstradisiyası ölkə qanunlarına və beynəlxalq hüquqa əsaslanır

15.02.2017 [10:01]

Azərbaycanın işğal altındakı ərazilərinə qanunsuz səfərlər edən Aleksandr Lapşinin fevralın 7-də ölkəmizə ekstradisiyası beynəlxalq hüququn təmini ilə yanaşı, ölkəmizin ərazi bütövlüyünə hörmət göstərilməsinin vacibliyini bir daha ortaya qoymuş oldu. Bu, birmənalı şəkildə Azərbaycan dövlətinin, ölkə Prezidentinin yürütdüyü xarici siyasət kursunun uğuru kimi dəyərləndirilməlidir. Aleksandr Lapşinin ekstradisiyası, ən əsası, Azərbaycan Prezidentinin qətiyyətli mövqeyinin, siyasi iradəsinin, eləcə də şəxsi nüfuzunun göstəricisidir. Hər zaman milli maraqlarımızın qorunması istiqamətində iradə nümayiş etdirən ölkə başçısı Azərbaycanın ərazi bütövlüyünün pozulmasının yolverilməzliyini mühüm şərt olaraq irəli sürüb. Bu baxımdan, Azərbaycanın ərazi bütövlüyünü şübhə altına alan, işğal altında olan torpaqlarımıza qeyri-qanuni səfərlər edən, Dağlıq Qarabağda olan qondarma separatçı rejimi təbliğ edən A.Lapşinin cəzalandırılmasının kökündə birmənalı şəkildə hüquqi məsələ dayanır. Və A.Lapşinin ölkəmizə təhvil verilməsi ədalətin, hüququn bərpası kimi dəyərləndirilməlidir.
Məsələ ilə bağlı fikirlərini bölüşən Milli Məclisin üzvü Nizami Cəfərov qeyd edib ki, yeni dövrə uyğun olaraq imkanlar genişləndikcə, ölkəmizin beynəlxalq münasibətlər sistemindəki yeri möhkəmləndikcə ərazi bütövlüyümüzün qorunması istiqamətində də daha ardıcıl effektiv addımlar atılır. Bu həm də xarici müdaxilələrin və təxribatların qarşısını alır: “Bu imkanlardan ölkə Prezidenti cənab İlham Əliyev çox uğurla istifadə edir. Dövlət başçımız bildirmişdi ki, biz artıq hücum diplomatiyası həyata keçiririk. Azərbaycan dövləti hücum diplomatiyası sayəsində mühüm uğurlar əldə edib. Digər tərəfdən, bu siyasi kurs Azərbaycan xalqının maraqlarını geniş şəkildə özündə əks etdirir. Lapşinin Dağlıq Qarabağa səfəri icazəsiz həyata keçirilib. Burada söhbət həm də fərdi olaraq Lapşindən getmir. Ümumiyyətlə, Lapşinin axtarışa verilməsi, Azərbaycan qanunları qarşısında cavab verməsi bu tipli qanun, sərhəd pozuntularına Azərbaycan dövlətinin münasibətidir. Prosesin ümumi gedişi isə qanunlara, beynəlxalq konvensiyalara əsaslanır. Bu, birmənalı olaraq hüquqi məsələdir. Yəni kimsə Azərbaycan sərhədlərinə dövlətimizin icazəsi olmadan daxil ola bilməz. Bu həm də ümumi olaraq dövlətimizin beynəlxalq nüfuzunun ildən-ilə artmasının bariz sübutudur. Eyni zamanda, işğal altında olan torpaqlarımızın həm maddi, həm də mənəvi baxımdan müdafiə olunmasında xalqımızın, dövlətimizin çox ciddi fəaliyyətinin nəticəsidir. Bu addımlar beynəlxalq aləmdə bizi tanıyan, bizə münasibətində obyektiv olan hər bir qurumu, ictimai təşkilatı, eləcə də hər bir şəxsi təmin edir. Düşünürəm ki, Lapşinin ekstradisiyası Azərbaycanın dövlət siyasətinin uğurudur, müvəffəqiyyətidir. Xalqımız belə presedentləri gördükcə qürurlanır”.
Milli Məclisin üzvü Sahib Alıyev isə Aleksandr Lapşinin Azərbaycana gətirilməsini dövlətimizin gücü, Prezident İlham Əliyevin nüfuzunun böyüklüyü və yürütdüyü xarici siyasət kursunun düzgün istiqamətlənməsi kimi dəyərləndirib. Millət vəkili bildirib ki, bu, həm də dost Belarusun, xüsusilə də onun Prezidenti cənab Lukaşenkonun beynəlxalq hüquqa verdiyi yüksək qiymətin göstəricisidir: “Azərbaycanın ərazi bütövlüyünü, ölkəmizin qanunlarını pozan bu şəxsin ekstradisiyası beynəlxalq hüququn tələbidir. Dağlıq Qarabağ Azərbaycanın ərazisidir və bu ərazilərə giriş-çıxış məhz Azərbaycan dövlətinin icazəsi ilə reallaşmalıdır. Birmənalı şəkildə qeyd etməliyəm ki, yaranan situasiya bir daha münaqişənin tənzimlənməsi istiqamətində üstünlüyümüzü ortaya qoyur. Ölkə Prezidentinin qətiyyətlə həyata keçirdiyi hücum diplomatiyası artıq Ermənistanı tərk-silah edib. Onların öz təbliğatlarına çevirmək istədikləri məsələlər Azərbaycanın üstünlüyünün sübutuna çevrilir. Bu, olduqca qürurvericidir. Ermənilər özləri də etiraf edirlər ki, Azərbaycan Lapşini gətirməklə onları darmadağın edib və bundan sonra rəsmi Bakının izni olmadan heç kim Dağlıq Qarabağa gəlməyəcək. Ancaq Azərbaycan bununla təkcə Ermənistanı darmadağın etmədi, həm də onların bəzi havadarlarına Lapşini gətirdiyi kimi, onların Dağlıq Qarabağ problemini necə məsələ adlandırmalarından və bu haqda nə fikirləşmələrindən asılı olmayaraq, işğal altındakı torpaqlarını da o cür təmizləyəcəyini göstərdi”.
Pərviz SADAYOĞLU

Paylaş:

Baxılıb: 520 dəfə