İmamverdi İsmayılovun Ulu öndər Heydər Əliyev haqqında məqaləsi Türkiyə mətbuatında dərc olunub

Bakı:

14 °C

94 %

0 m/s

Əlaqə

AZ RU EN

Ana səhifə / Siyasət / İmamverdi İsmayılovun Ulu öndər Heydər Əliyev haqqında məqaləsi Türkiyə mətbuatında dərc olunub

İmamverdi İsmayılovun Ulu öndər Heydər Əliyev haqqında məqaləsi Türkiyə mətbuatında dərc olunub

21.04.2017 [09:13]

Tanınmış yazıçı-publisist, Əməkdar jurnalist, Milli Məclisin deputatı İmamverdi İsmayılovun xalqımızın Ümummilli lideri Heydər Əliyevin xatirəsinə həsr etdiyi “Heyrət” sərlövhəli məqaləsi Türkiyənin bir sıra kütləvi informasiya vasitələrində dərc olunub.
AZƏRTAC xəbər verir ki, “Ekoyaşam” qəzetində, “Kocaeli” xəbər və mədəniyyət portalında dərc olunan məqalədə Ulu öndər Heydər Əliyevin mənalı həyat yolu və zəngin siyasi fəaliyyəti fərqli prizmadan oxuculara təqdim edilir.
Müəllif məqalədə 1930-cu ildə çəkilən fotoda dünyaya maraq dolu nəzərlərlə baxan yeddi yaşlı Heydər Əliyevin gözlərinin ifadə gücündən heyrətləndiyini xüsusi vurğulayır. Qeyd edir ki, həmin məşhur fotoda yeddi yaşlı Heydər Əliyevin çöhrəsindəki ifadə fotoaparatın obyektivinə baxan başqa uşaqların heyrətinə əsla bənzəmir. Çünki həmin şəkildə Heydər Əliyev fotoobyektivə yox, bütünlüklə dünyaya baxır.
Məqalədə dahi şəxsiyyət Heydər Əliyevin dünyaya gəldiyi dövrün - XX əsrin birinci rübünün ağır ictimai-siyasi mənzərəsi ətraflı nəzərdən keçirilir, Birinci Dünya müharibəsinin, ermənilərin xalqımızın başına gətirdikləri müsibətlərin ağır fəsadları dəqiq təsvir olunur. Yazıda taleyinə Azərbaycanın ən çətin dövrlərində xalqının köməyinə yetişmək, onu təhlükələrdən xilas edərək sabitlik, inkişaf, çiçəklənmə yoluna çıxarmaq yazılan Heydər Əliyevin Vətəninə xidmət etmək amalı uğrunda hamıya örnək olan fəaliyyəti qardaş ölkə oxucularının diqqətinə çatdırılır.
Xüsusi vurğulanır ki, ötən əsrin ortalarına qədər gərgin psixoloji sarsıntılar yaşamış, repressiya xofundan illərlə özünə qapanmış cəmiyyətdə milli şüurun oyanışına nail olmağı, ana dilimizi dirçəltməyi, bu xalqın əsrlər boyu yetişdirdiyi tarixi şəxsiyyətlərə, Vətən tarixinə, ədəbiyyatına, mədəniyyətinə, elminə, milli-mənəvi dəyərlərinə sahib çıxmağı, xalqın azadlıq ruhunun daşıyıcısı olan ziyalıları təzyiqlərdən qorumağı, onların fəaliyyətini istiqamətləndirməyi ancaq Heydər Əliyev bacara bilərdi. Məhz belə bir ağır məqamda şəxsiyyəti, uzaqgörənliyi, qətiyyəti, peşəkarlığı ilə bütün zəruri istiqamətləri zərgər dəqiqliyi ilə müəyyənləşdirərək, Ümummilli lider obrazında tarix səhnəsinə çıxan Heydər Əliyev imperiya rəhbərlərinin min bir maneələrinə baxmayaraq, respublikamızın inkişafı ilə bağlı böyük proqramları uğurla reallaşdırmaqla, ölkənin gələcəyi üçün milli kadr potensialı formalaşdırmaqla, Azərbaycanı dünyada tanıtmaqla, cəmiyyəti müstəqil həyata hazırlamaqla taleyinə yazılan çətin və müqəddəs missiyanı uğurla reallaşdıra bildi.
Məqalədə müstəqilliyin ilk illərində Azərbaycanın bütün sahələrdə dərin tənəzzül, vətəndaş müharibəsi, parçalanma təhlükəsi ilə üzləşdikdə xalqın Ulu öndər Heydər Əliyevi hakimiyyətə dəvət etdiyi vurğulanır. Belə bir dövrdə Ümummilli liderin siyasi hakimiyyətə qayıdışından sonra müstəqil dövlətin sağlam təməllər üzərində inkişaf istiqamətlərinin müəyyənləşdirildiyini, cəmiyyətdə demokratik dəyərlərin bərqərar olunduğunu, hüquqi dövlət quruculuğu istiqamətində dərin və mütərəqqi islahatların həyata keçirildiyini, azad bazar iqtisadiyyatı yolunda qısa müddətdə böyük nailiyyətlərin qazanıldığını diqqətə çatdıran müəllif oxuculara “İndi siz deyin, bütün bunlar bir Heyrət nümunəsi deyilmi?!” sualını ünvanlayır.
Yazıda Ulu öndər Heydər Əliyevin arzularındakı Azərbaycanı tarixinin ən qüdrətli çağlarına yetirən, dahi şəxsiyyətin missiyasını yaşadan və davam etdirən Prezident İlham Əliyevin rəhbərliyi ilə ölkəmizin mühüm uğurlar qazandığı xüsusi vurğulanır. Həmçinin bu məfkurəni layiqincə yaşadan, ailə ocağının qoşa qanad kimi cəfakeş qoruyucusu Mehriban xanım Əliyevanın da genişmiqyaslı fəaliyyəti ilə Ulu öndər Heydər Əliyev ideyalarının həyata keçməsinə mühüm töhfələr verdiyi diqqətə çatdırılır.
Əməkdar jurnalist İmamverdi İsmayılovun türkiyəli oxucularda böyük maraq doğuran “Heyrət” sərlövhəli məqaləsi yaxın günlərdə qardaş ölkənin nüfuzlu “Simge” jurnalında dərc olunacaq. Məqaləni digər KİV-lər də dərc etməyi planlaşdırır.

Paylaş:

Baxılıb: 606 dəfə