Hikmət Babaoğlu: Çocuq Mərcanlıya qayıdışla başlayan yol Xocalıda, bütün Qarabağda sona çatacaq

Bakı:

27 °C

37 %

5 m/s

Əlaqə

AZ RU EN

Ana səhifə / Siyasət / Hikmət Babaoğlu: Çocuq Mərcanlıya qayıdışla başlayan yol Xocalıda, bütün Qarabağda sona çatacaq

Hikmət Babaoğlu: Çocuq Mərcanlıya qayıdışla başlayan yol Xocalıda, bütün Qarabağda sona çatacaq

27.02.2020 [09:50]

Xocalı soyqırımı 28 il əvvəl baş versə də, bu gün törədilmiş kimi təzədir, acıdır və hər bir azərbaycanlının qəlbini sızıldadır. Xocalı faciəsi Azərbaycan xalqına qarşı törədilən soyqırımıdır, amma, eyni zamanda, insanlığa qarşı törədilən bir cinayətdir. Bu hadisənin əsas məqsədi həm soyqırımı törətmək, həm də Azərbaycan xalqının ərazi bütövlüyünü qorumaq kimi haqlı davasında onu mənəvi qırılma nöqtəsinə gətirmək idi. Ancaq ermənilər buna nail ola bilmədilər.
Bu fikirləri AZƏRTAC-a açıqlamasında millət vəkili Hikmət Babaoğlu bildirib. O qeyd edib ki, hər bir millətin milli gücü iki komponentdə dəyərləndirilir. Bunlar milli gücün kəmiyyət və keyfiyyət ünsürləridir. Əgər bir millət öz mübarizəsində milli-mənəvi qırılma nöqtəsinə çatmayıbsa, o millət yaşayır. Azərbaycan xalqının 5 minillik dövlətçilik tarixi var və bu dövrdə heç bir qüvvə milli əzmimizi, milli mənəviyyatımızı qıra bilməyib. “Ona görə də, bu gün varıq. Ermənilər bu məqsədlərinə nail olmayıblar və olmayacaqlar da. Əgər ermənilər öz məqsədlərinə nail olsaydılar, Azərbaycan xalqı Mübariz İbrahimov, Fərid Əhmədov, Çingiz Qurbanov kimi qəhrəmanlar yetişdirə bilməzdi. Azərbaycan Prezidenti, Ali Baş Komandan İlham Əliyevin həyata keçirdiyi siyasət nəticəsində biz Xocalıya dönəcəyik və Xocalı soyqırımının şahidləri Xocalının yenidən inşa edilməsinin şahidləri olacaqlar. Çocuq Mərcanlıya qayıdışla başlayan yol Xocalıda, bütün Qarabağda sona çatacaq. Azərbaycan xalqı bu faciəni unutmadı, unutmayacaq və unutdurmayacaqdır. Hər il Azərbaycan Prezidenti, Ali Baş Komandanımız başda olmaqla, on minlərlə Azərbaycan vətəndaşının Xocalı soyqırımı abidəsini ziyarət etməsi bir daha ondan xəbər verir ki, biz Xocalıya qayıtmayana qədər, Xocalıya ədaləti bərpa etməyənə qədər, işğal olunmuş torpaqlarımızı, Xocalı şəhərini işğaldan azad etməyənə qədər bu proses davam edəcəkdir. Hazırda bu istiqamətdə Azərbaycan dövləti çoxşaxəli fəaliyyət göstərir”, - deyə baş redaktor qeyd edib.
O əlavə edib ki, diplomatik kanallarla, qeyri-hökumət təşkilatları və Heydər Əliyev Fondu vasitəsilə çox böyük işlər görülür ki, Xocalı soyqırımı dünya tərəfindən tanınsın. Nəticə olaraq, bu gün artıq xeyli sayda ölkə Xocalı soyqırımını rəsmən tanıyıb. Bir neçə beynəlxalq təşkilat, o cümlədən İslam Əməkdaşlıq Təşkilatı (İƏT) Xocalı hadisəsini soyqırımı kimi tanıyıb. Bütün bunlar istər Ermənistan-Azərbaycan Dağlıq Qarabağ probleminin həll olunmasında, istərsə də Xocalı soyqırımının dünyaya çatdırılmasında atılan mühüm addımlardır. Onun sözlərinə görə, bu gün hər bir Azərbaycan vətəndaşı 28 il bundan əvvəl olmuş bu hadisəni 28 il əvvəlki ürək yanğısı ilə yaşayır. Bu yara soyumayıb, bu yara qaysaq bağlamayıb. Ona görə ki, bu bizim ümummilli yaramızdır. Eyni zamanda, Xocalıya ədalətin bərpa olunması üçün bu cinayəti törədənlərlə bağlı hüquqi prosedur aparılır. Hikmət Babaoğlu qeyd edib ki, cinayətdə əli olan, soyqırımı törədənlərdən 39 nəfərin adı müəyyənləşdirilərək, ilkin istintaq materialları yekunlaşdırılaraq İnterpola təqdim edilib.
“Doğrudur, bu gün müxtəlif səbəblərdən, dünyada olan ikili standartlar siyasəti ucbatından biz hələ həmin cinayətkarların cəzalandırılmasına nail ola bilməmişik. Amma Azərbaycan xalqının nümayiş etdirdiyi yüksək iradə, əzm və bu hadisəni unutmaması, Azərbaycan Prezidentinin həyata keçirdiyi siyasət mütləq öz nəticəsini verəcək və Azərbaycan xalqı mütləq Xocalıya, işğal edilmiş bütün torpaqlarımıza qayıdacaq, ərazi bütövlüyümüz bərpa olunacaq”, - deyə Hikmət Babaoğlu vurğulayıb.

Paylaş:

Baxılıb: 600 dəfə