Tural Abbaslı: Milli həmrəylik mühitinin təmin olunmasında son vaxtlar aparılan siyasi dialoq böyük rol oynayıb

Bakı:

33 °C

37 %

4 m/s

AZ RU EN

Ana səhifə / Siyasət / Tural Abbaslı: Milli həmrəylik mühitinin təmin olunmasında son vaxtlar aparılan siyasi dialoq böyük rol oynayıb

Tural Abbaslı: Milli həmrəylik mühitinin təmin olunmasında son vaxtlar aparılan siyasi dialoq böyük rol oynayıb

30.09.2020 [08:45]

“Söhbət Azərbaycanın ərazi bütövlüyündən, Dağlıq Qarabağ münaqişəsinin həlli məsələsindən gedirsə, bu zaman istər iqtidar, istərsə də müxalifət partiyası olsun, fərqli yanaşma sərgiləmək olmaz. Əksər siyasi partiyaların indiki məqamda eyni mövqedən çıxış etməsi çox sevindirici haldır. Təsadüfi deyil ki, milli birliyə və həmrəyliyə töhfə vermək üçün Azərbaycanda fəaliyyət göstərən 50 siyasi partiya eyni mövqedən çıxış edərək Ermənistan silahlı qüvvələrinin genişmiqyaslı təxribatına dair birgə bəyanat qəbul edib. Həmin siyasi qüvvələr torpaqlarımızın azad edilməsi istiqamətində görülən tədbirlər zamanı dövlətin, Ali Baş Komandanın yanında olduğunu bildiriblər”.
Bunu qəzetimizə açıqlamasında AĞ Partiyasının sədri Tural Abbaslı deyib.
T.Abbaslının sözlərinə görə, son günlər dövlətin, Ali Baş Komandanın torpaqlarımızın azad edilməsi istiqamətində atdığı bütün addımları onun rəhbərlik etdiyi partiya da birmənalı olaraq dəstəkləyir: “Ali Baş Komandanın müvafiq tapşırıqlarını, həmçinin bizim şanlı ordumuzun həyata keçirdiyi uğurlu əməliyyatları alqışlayırıq. Azərbaycanın ərazi bütövlüyünün bərpa olunması naminə atılan bütün addımlara dəstək veririk. Eyni zamanda, ərazilərimizin işğaldan azad olunması yönündə üzərimizə düşən bütün vəzifələri icra etməyə hazırıq”.
“İndiki dövrdə cəmiyyətdə milli həmrəyliyin nümayiş etdirilməsi müsbət haldır. AĞ Partiya olaraq bizim yanaşmamız belədir ki, hazırkı məqamda siyasi mənsubiyyətindən asılı olmayaraq, hər kəs üçün Azərbaycanın ərazi bütövlüyü, Dağlıq Qarabağın işğaldan azad edilməsi, Vətənin təhlükəsizliyi əsas məsələlər olmalıdır. Biz bu mövqeyi doğru hesab etdiyimiz üçün digər partiyalardan oxşar yanaşma gözləyirik. Kimlərsə milli həmrəylik çağırışlarına qoşulmursa, başqa addım atırsa, onlar xalqın qarşısında cavab verəcək. Həmin addımlar sonradan analiz olunacaq, xalq da öz qiymətini verəcək. İndi əsas diqqət ordumuza dəstək tədbirlərinə, Dağlıq Qarabağa, torpaqların azad olunmasına yönəldilməlidir”, - deyə T.Abbaslı vurğulayıb.
Partiya sədri deyib ki, siyasi partiyaların birgə mövqedən çıxış etməsində, cəmiyyətin bütün təbəqələrinin milli həmrəylik nümayiş etdirməsində son dövrlər başlanan siyasi dialoqun rolu çox böyükdür: “Tovuz hadisələri zamanı da ordumuza, dövlətimizə dəstək üçün 50-yə yaxın partiya yekdil mövqedən çıxış etmişdi, indi də eyni mənzərənin şahidi olduq. Milli həmrəylik mühitinin təmin olunmasında son vaxtlar aparılan siyasi dialoq böyük rol oynayıb. Bunu cari ilin əvvəlində hakimiyyətin təşəbbüsü ilə bütün siyasi qüvvələrlə dialoqun başlanmasının, həmçinin tərəflər arasında səmərəli ünsiyyətin qurulması və müzakirələrin aparılmasının nəticəsi kimi qiymətləndirmək olar. Ümumiyyətlə, ölkə daxilində siyasi həmrəylik mühitinin mövcud olması dövlətə və dövlətçiliyə xidmət edir. Həmin dialoqun nəticəsidir ki, xalqımız üçün mühüm məqamlarda birgə bəyanatlar qəbul olunur, ordumuza, dövlətimizə, cəmiyyətimizə pozitiv mesajlar verilir. Ordumuzun işğal edilmiş torpaqları tam azad etdikdən sonra dialoq prosesinin davam etdirilməsinə və bu yöndə yeni uğurlar əldə olunmasına ümid edirik”.
Qaşqay

Paylaş:

Baxılıb: 386 dəfə