Azərbaycan İslam Əməkdaşlıq Təşkilatı ailəsinin fəal üzvüdür

Bakı:

19 °C

88 %

3 m/s

Əlaqə

AZ RU EN

Ana səhifə / Siyasət / Azərbaycan İslam Əməkdaşlıq Təşkilatı ailəsinin fəal üzvüdür

Azərbaycan İslam Əməkdaşlıq Təşkilatı ailəsinin fəal üzvüdür

18.06.2021 [09:00]

Ölkəmiz İƏT-ə üzv dövlətlərlə həm ikitərəfli əsasda, həm də beynəlxalq təşkilatlar çərçivəsində sıx əməkdaşlıq edir
Məlum olduğu kimi, Azərbaycan dövləti İslam Əməkdaşlıq Təşkilatı (İƏT) ilə geniş əlaqələrə malikdir. Beynəlxalq müstəvidə İslam həmrəyliyinə və sivilizasiyalararası dialoqun inkişafına mühüm töhfələr verən ölkəmiz bu nüfuzlu təşkilatın fəal üzvlərindən biridir. Yeri gəlmişkən, qeyd edək ki, iyunun 16-da İslam Əməkdaşlıq Təşkilatının Elm və Texnologiya üzrə onlayn formatda keçirilən ikinci Zirvə toplantısında Azərbaycan Respublikasının Prezidenti İlham Əliyevin videoformatda çıxışı təqdim edilib. Dövlətimizin başçısı çıxışı zamanı Azərbaycan-İslam Əməkdaşlıq Təşkilatı arasında münasibətlərin əhəmiyyətindən bəhs edib.
Məsələ ilə bağlı Milli Məclisin deputatı Cavid Osmanov bildirib ki, ölkəmizin İƏT-in müxtəlif strukturları ilə əlaqələr qurması böyük əhəmiyyət kəsb edir: “İslam Əməkdaşlıq Təşkilatının Elm və Texnologiya üzrə onlayn formatda keçirilən ikinci Zirvə toplantısında Azərbaycan Prezidenti İlham Əliyevin qeyd etdiyi kimi, Azərbaycan İslam Əməkdaşlıq Təşkilatı ailəsinin fəal üzvüdür və həm ikitərəfli əsasda, həm də beynəlxalq təşkilatlar çərçivəsində üzv dövlətlərlə sıx əməkdaşlıq edir. Son bir neçə il ərzində Azərbaycanda İslam Əməkdaşlıq Təşkilatına üzv dövlətlərin xarici işlər, mədəniyyət, turizm, təhsil, əmək və digər nazirləri səviyyəsində 10-a yaxın görüş keçirilib. Bundan başqa, İƏT Baş katibinin və təşkilatın məsul şəxslərinin intensiv olaraq ölkəmizə səfərləri Azərbaycanın müsəlman dünyasında nüfuzunun və mövqeyinin əyani göstəricisidir. Biz bu faktlara ölkəmizin 2017-ci ildə İslam Həmrəyliyi Oyunlarına ev sahibliyi etməsini də əlavə edə bilərik”.
Millət vəkilinin sözlərinə görə, İƏT nüfuzlu beynəlxalq qurum olaraq ötən illər ərzində hər zaman Ermənistanın işğalçılıq siyasətini pisləyib, Azərbaycanın ədalətli mövqeyinə dəstək nümayiş etdirib: “Bu qurum, həmçinin Xocalı faciəsini soyqırımı kimi tanıyıb. Təqdirəlayiq haldır ki, 44 günlük Vətən müharibəsində də İƏT Azərbaycanın haqq işinə dəstək nümayiş etdirib”.
Milli Məclisin deputatı Şahin İsmayılov isə bildirib ki, İƏT Azərbaycanın 30 il Ermənistanın işğalı altında olmuş ərazilərində tarixi-dini və mədəni abidələrimizi talan edən erməni vandalizmini pisləyib və müxtəlif illərdə müvafiq qətnamələr qəbul edib: “İslam Əməkdaşlıq Təşkilatının Elm və Texnologiya üzrə onlayn formatda keçirilən ikinci Zirvə toplantısında dövlətimizin başçısı İlham Əliyevin dediyi kimi, İslam Əməkdaşlıq Təşkilatı tərəfindən 1994-cü il Kasablanka Zirvə görüşündən bu günə qədər Ermənistanın Azərbaycana qarşı təcavüzünü pisləyən, ölkəmizin suverenliyi və ərazi bütövlüyünü dəstəkləyən 80-dən artıq qətnamə qəbul edilib. Bu mənada Ermənistan Respublikasının Azərbaycan Respublikasına qarşı təcavüzü ilə bağlı 2016-cı ildə İslam Əməkdaşlıq Təşkilatının Təmas Qrupunun təsis edilməsi təqdirəlayiq haldır”.
“Bu il İƏT-in Baş Katibliyinin, İƏT-in Ermənistan Respublikasının Azərbaycan Respublikasına qarşı təcavüzü ilə bağlı Təmas Qrupunun üzvlərinin və İslam Ölkələri Elm, Təhsil və Mədəniyyət Təşkilatının (İSESKO) nümayəndə heyətinin Azərbaycanın işğaldan azad edilmiş ərazilərinə səfər edərək Ermənistan tərəfindən İslam irsinə qarşı törədilmiş vəhşiliklərin bilavasitə şahidi olmasının da böyük əhəmiyyəti var. Çünki Ermənistanın İslama qarşı tutduğu düşmənçilik mövqeyi bütün müsəlman ölkələrinin ictimaiyyətinə çatdırılır”, - deyə millət vəkili əlavə edib.
Deputat, həmçinin qeyd edib ki, Azərbaycan da, öz növbəsində, hər zaman İslam Əməkdaşlıq Təşkilatına üzv ölkələri dəstəkləyib, İslam ölkələri arasında daha güclü həmrəyliyin və əməkdaşlığın təmin edilməsi naminə səylər göstərib.
Nardar BAYRAMLI

Paylaş:

Baxılıb: 734 dəfə