Laçına qayıtdıq...

Bakı:

27 °C

37 %

5 m/s

Əlaqə

AZ RU EN

Ana səhifə / Siyasət / Laçına qayıtdıq...

Laçına qayıtdıq...

27.08.2022 [07:02]

Yolumuz Xankəndi, Sərsəng, Ağdərəyədir!

PƏRVİZ

Azərbaycan Ordusu Laçın şəhərinə yerləşib. Bununla bağlı avqustun 26-da Prezident İlham Əliyev tviter səhifəsində paylaşım edib. Paylaşımda deyilir: “Bu gün, avqustun 26-da biz - Azərbaycanlılar Laçın şəhərinə qayıtmışıq. Azərbaycan Ordusu Laçın şəhərinə yerləşdi. Zabux və Sus kəndləri nəzarətə götürüldü. Bütün Laçınlıları və Azərbaycan xalqını bu münasibətlə təbrik edirəm. Yaşasın Laçın! Yaşasın Azərbaycan!”

Vurğulanmalıdır ki, ölkə başçısı hələ avqustun 12-də Azərbaycan Televiziyasına müsahibəsində həmin ərazilərdə qeyri-qanuni məskunlaşdırılmış ermənilərə avqustun sonuna qədər vaxt verildiyini açıqlamışdı. Bu mənada, əldə olunan bu nailiyyət böyük əhəmiyyət daşıyır. Bu, həm də Avropa İttifaqı Şurasının prezidenti Şarl Mişelin vasitəçiliyi ilə baş tutacaq Prezident İlham Əliyevlə Nikol Paşinyanın görüşü ərəfəsində Azərbaycanın tərəfini gücləndirəcək amillərdən sayılır.

Bu, tarixi hadisədir

Məsələ ilə bağlı fikirlərini “Yeni Azərbaycan”a bölüşən Bakı Politoloqlar Klubunun rəhbəri Zaur Məmmədov da Laçın şəhərinin, eləcə də Zabux və Sus kəndlərinin azad edilməsini tarixi və önəmli hadisə adlandırıb. Bu hadisənin önəmi isə bir sıra mühüm amillərlə izah oluna bilər: “Ən mühüm amil ondan ibarətdir ki, hətta 30 il ərzində Azərbaycan ilə Ermənistan arasında ATƏT-in Mrinsk qrupu çərçivəsində davam edən danışıqlarda belə Şərqi Zəngəzur rayonlarından fərqli olaraq Laçın və Kəlbəcərin statusu xüsusi əhəmiyyət daşıyıb. Həmin danışıqlarda hər zaman Qarabağın dağlıq hissəsi ilə birlikdə Laçın məsələsi də sonrakı mərhələlərdə həllini tapacaq məsələ kimi qeyd edilirdi. Hətta bəzi məqamlarda danışıqlar prosesində Laçın məsələsində Azərbaycanın rayon üzərindəki suveren hüququ sual altına salınırdı. Təbii ki, rəsmi Bakı hər zaman bütün bunları rədd edib. Bu gün Ali Baş Komandanın rəhbərliyi ilə Laçının qaytarılması çox strateji əhəmiyyət daşıyır. Həm də o baxımdan ki, biz maksimum əldə edə biləcəyimizi etmişik. Laçın şəhərini və rayonunu tamamilə işğaldan azad edərək hər zaman danışıqlar prosesində bizə təqdim olunanları alt-üst etdik. Bütün dünyaya sübut etmiş olduq ki, Prezident İlham Əliyevin başçılığı ilə Azərbaycan hər bir qarış torpağı uğrunda sona qədər mübarizə aparacaq”.

Politoloqun fikrincə, Laçının azad edilməsi digər bir məsələdə də xüsusi əhəmiyyətə malikdir. O baxımdan ki, avqustun sonunda nəzərdə tutulan liderlərin görüşü zamanı Azərbaycan Zəngəzur dəhlizi ilə bağlı Ermənistanın spekulyasiyasına çox ciddi cavab verəcək. “Əgər Zəngəzur dəhliz formasında fəaliyyət göstərməsə, Azərbaycan buna adekvat cavab verəcək. Yəni, bu, Bakıya əsas verəcək ki, köhnə Laçın dəhlizinə alternativ yola əvvəlki status verilməsin. Beləliklə də bu yeni yola tamamilə başqa yanaşma ortaya qoyulsun. Digər tərəfdən məlum hadisədir ki, Laçın şəhərinin və rayonun ümumilikdə azad edilməsindən sonra artıq Xankəndi, Sərsəng, Ağdərə istiqamətlərində də planlarımızı həyata keçirməyə başlayacağıq. Artıq erməni hərbi birləşmələrinin tərk-silah edilməsi ilə bərabər Qarabağın dağlıq hissəsindəki müəyyən məsələlərə də tezliklə aydınlıq gətiriləcək. Ermənistan bunu etməzsə, Azərbaycan avqustun əvvəlində olduğu kimi bu ölkəyə öz gücünü götərəcək. Beləliklə, diplomatik meydanda da istədiyinə nail olacaq”, - deyə Z.Məmmədov əlavə edib.

62 kilometrdən çox yeni

təminat yolları çəkilib

Bu arada, Kəlbəcər və Laçın rayonlarında Azərbaycan Ordusunun bölmələri tərəfindən aparılan dəqiqləşdirmələr nəticəsində nəzarətə götürülən bir sıra strateji əhəmiyyətli hakim yüksəkliklərdə mühəndis təminatı üzrə tapşırıqların icrası davam etdirilir. Müdafiə Nazirliyinin bununla bağlı yaydığı xəbərdə bildirilir ki, Mühəndis Qoşunlarının digər dövlət qurumları ilə qarşılıqlı fəaliyyəti nəticəsində mürəkkəb relyefli, o cümlədən çətin keçilən qayalıq ərazilərdə bölmələrin fəaliyyətini təmin etmək məqsədilə ümumilikdə 62 kilometrdən çox yeni təminat yolları çəkilib.

Azad edilən ərazi və hakim yüksəkliklərdə mühəndis təminatı üzrə həyata keçirilən zəruri tədbirlər yüksək peşəkarlıqla yerinə yetirilir.

Paylaş:

Baxılıb: 596 dəfə