"İlham Əliyev. İnkişaf - məqsədimizdir" çoxcildliyinin beşinci cildi çapdan çıxıb

Bakı:

24 °C

54 %

2 m/s

Əlaqə

AZ RU EN

Ana səhifə / Siyasət / "İlham Əliyev. İnkişaf - məqsədimizdir" çoxcildliyinin beşinci cildi çapdan çıxıb

"İlham Əliyev. İnkişaf - məqsədimizdir" çoxcildliyinin beşinci cildi çapdan çıxıb

08.01.2011 [09:15]

“Azərbaycanın beynəlxalq nüfuzu artır, Azərbaycan beynəlxalq təşkilatlarda çox önəmli yerləri tutur. Dünyada Azərbaycanla hesablaşırlar və apardığımız xarici siyasət bizə imkan verəcək ki, ölkənin milli maraqları daha da böyük həcmdə müdafiə olunsun. İqtisadi inkişaf istiqamətində aparılan işlər deməyə əsas verir ki, bu sahədə problemlər həllini tapacaq, Azərbaycan yaxın zamanlarda daha zəngin ölkəyə çevriləcəkdir. Sosial məsələlərin həlli qarşımızda duran ən vacib problemlərdən biridir. Bu istiqamərdə də önəmli addımlar atılır və bundan sonra da atılacaqdır. Əməkhaqlarının, pensiyaların, sosial ödənişlərin artırılması istiqamətində işlər görüləcəkdir. Biz çalışmalıyıq və çalışırıq ki, Azərbaycanın hər bir vətəndaşı ildən-ilə daha yaxşı yaşasın, onun güzəranı daha da yaxşılaşsın, qarşısında duran sosial məsələlər öz həllini tapsın. Mən şübhə etmirəm ki, biz bu məsələləri də həll edəcəyik”.
AzərTAc xəbər verir ki, bu sözlər Azərbaycan Respublikasının Prezidenti İlham Əliyevin yenicə çapdan çıxmış “İnkişaf - məqsədimizdir” adlı çoxcildliyinin 5-cü cildindən, 2004-cü il iyunun 24-də Heydər Əliyev adına Azərbaycan Ali Hərbi Məktəbində ümummilli liderin abidəsinin açılışı mərasimindəki nitqindən götürülüb.
Nəşrin buraxılışına məsul Azərbaycan Prezidenti Administrasiyasının rəhbəri akademik Ramiz Mehdiyevdir.
Yunanıstan Prezidenti Konstantinos Stefanopulosun Azərbaycana rəsmi səfərindən hesabatla açılan bu cilddə Ulu öndər Heydər Əliyev tərəfindən təməli qoyulmuş siyasətə - müstəqil Azərbaycan dövlətinin daha da qüdrətləndirilməsi üçün aparılan siyasi və iqtisadi islahatlara, dost və qonşu ölkələr arasında bütün sahələrdə qarşılıqlı faydalı əlaqələrin daha da möhkəmləndirilməsi və genişləndirilməsinə dair materiallar - nitqlər, çıxışlar, bəyanatlar, müsahibələr, məktublar, məruzələr, müraciətlər, fərmanlar əksini tapıb. Bu materiallar 2004-cü ilin iyunundan avqustunadək olan dövrü əhatə edir.
Kitabda dövlətimizin başçısı İlham Əliyevin NATO-nun İstanbul zirvə görüşündə və “Avratlantik İttifaqı yol ayrıcında” mövzusunda beynəlxalq konfransda çıxışları, AFR-ə ilk rəsmi səfəri zamanı bu ölkənin dövlət və hökumət rəhbərləri ilə keçirdiyi yüksək səviyyəli görüşləri, söhbətləri, Dağlıq Qarabağ probleminin həlli və münaqişənin nizama salınması ilə əlaqədar ölkəmizin prinsipial mövqeyi xüsusi yer tutub, Azərbaycanın milli mənafeyini əks etdirən danışıqları yer alıb.
Yeni cilddə Azərbaycan ilə Yunanıstan, Pakistan, İran və Almaniya arasında bütün sahələrdə əməkdaşlığın daha da inkişaf etdirilməsinə dair imzalanmış sənədlər, Prezident İlham Əliyevin dünyanın görkəmli dövlət və hökumət başçılarına, beynəlxalq təşkilatlara, məşhur şəxsiyyətlərə məktubları, xarici dövlət və hökumət rəhbərləri, siyasi xadimlər, nümayəndə heyətləri ilə görüşləri zamanı apardığı dərin məzmunlu söhbətləri əksini tapıb.
Burada, həmçinin, Prezident İlham Əliyevin regionların sosial-iqtisadi inkişafı Dövlət Proqramının icrası ilə əlaqədar ölkəmizin şimal bölgəsinə - Siyəzən, Şabran, Quba, Qusar, Xaçmaz rayonlarına səfərləri zamanı əhali ilə görüşlərində Azərbaycanın sürətli inkişafına, xalqımızın rifahı və tərəqqisi naminə aparılan geniş iqtisadi və siyasi islahatlara həsr olunmuş çıxış və nitqləri əksini tapıb.
Bu nəşrdə dövlətimizin başçısının nitq və çıxışları ilə yanaşı, dünyanın nüfuzlu mətbuat orqanlarına verdiyi müsahibələri və bəyanatları da toplanıb.
Kitaba “Qeydlər”, “Şəxsi adlar göstəricisi”, “Coğrafi adlar göstəricisi” də daxil edilib. “Azərnəşr” tərəfindən buraxılmış cildin hazırlanmasında Azərbaycan Dövlət Teleqraf Agentliyinin (AzərTAc-ın) materiallarından istifadə olunub.

Paylaş:

Baxılıb: 1057 dəfə