20 Yanvar şəhidləri Azərbaycan xalqının qəlbində əbədi yaşayacaq

Bakı:

13°C

82%

2m/s

Əlaqə

AZ RU EN

Ana səhifə / Siyasət / 20 Yanvar şəhidləri Azərbaycan xalqının qəlbində əbədi yaşayacaq

20 Yanvar şəhidləri Azərbaycan xalqının qəlbində əbədi yaşayacaq

15.01.2011 [09:38]

Bu qanlı faciənin qurbanları heç zaman unudulmur, şəhidlərimizin xatirəsi hüznlə, eyni zamanda, qürur hissi ilə anılır
Azərbaycan tarixinin qanlı səhifələrindən biri olan 20 Yanvar faciəsinin baş verməsindən 21 il ötür. 1990-cı il yanvarın 19-dan 20-ə keçən gecə keçmiş Sovet imperiyası rəhbərlərinin göstərişi ilə Bakıya yeridilən qoşun hissələri dinc əhalini güllə-baran etməklə dəhşətli faciəyə imza atdı. Ermənistanın təcavüzkar əməllərindən və keçmiş SSRİ-nin rəhbərlərinin onlara havadarlıq etməsindən hiddətlənərək etirazını bildirən xalqımızın haqlı narazılığından narahatlıq duyan imperiya başbilənlərinin göstərişi ilə törədilən qırğın zamanı 131 nəfər qətlə yetirildi, 744 nəfər yaralandı, 841 nəfər isə həbs olundu. Qadın, qoca, uşaq fərqi qoyulmadan qarşıya çıxan insanların güllə-baran edilməsi, tanklar altına salınması, hətta yaşayış binalarının atəşə tutulması dinc, əliyalın sakinlərə qarşı törədilən amansız vəhşilik idi. Lakin planlaşdırılmış şəkildə törədilən bu qırğınla guya Azərbaycan xalqına “dərs vermək” istəyən, etirazları yatırmağa çalışan totalitar rejim nəinki istəyinə nail olmadı, əksinə, bu faciə ilə “xalqlar dostluğu” adı altında assimilyasiya, şovinizm siyasəti yeridən, separatçılıq toxumları səpən imperiyanın əsl siması ifşa olundu. Əslində, keçmiş ittifaqın süqutunu daha da sürətləndirən bu faciə ömrünü başa vurmaq üzrə olan bir imperiyanın məhv olmazdan qabaqkı son ümidsiz çırpıntısı idi.
Beləliklə, Sovet rəhbərliyinin niyyətinin əksinə olaraq, Azərbaycan xalqının mübarizə əzmi qırılmadı, hətta qanlı faciədən sonra ölkənin hər yerində daha kəskin etiraz baş qaldırdı. 20 Yanvar faciəsi və ondan sonrakı hadisələr göstərdi ki, 70 illik Sovet hakimiyyəti zamanında rejimin yeritdiyi kommunist ideologiyası altında böyüməsinə baxmayaraq, Azərbaycan xalqı azad düşünmək, haqlını haqsızdan ayırd etmək bacarığını itirməyib...
Müasir dövrümüzə nəzər saldıqda görürük ki, həmin dəhşətli hadisədən keçən bu illər ərzində Azərbaycanda yeni bir nəsil formalaşıb. O dövrdə yaşamamasına, həmin olayların canlı şahidi olmamasına baxmayaraq, bu gün Azərbaycan gəncləri və azyaşlı uşaqlar valideynlərinin, yaxınlarının anlatdıqları, kütləvi informasiya vasitələrindən əldə etdikləri, dərsliklərdən öyrəndikləri məlumatlar sayəsində bu qanlı faciə barədə kifayət qədər təsəvvürə malikdir. Bununla da, zaman keçdikcə 20 Yanvar faciəsi xalqın qan yaddaşında daha dərin kök salmaqdadır.
Lakin tarixi bilmək nə qədər vacibdirsə, keçmişdən nəticə çıxarmaq, dostunu, düşmənini tanımaq daha çox vacibdir. Bu baxımdan, 21 il öncə yaşanan bu faciə yeni nəslə mahiyyətinin tam dərinliyi ilə çatdırılmalıdır. Doğrudur, 20 Yanvar faciəsi zamanı yüzlərlə insan öz yaxınını, atasını, qardaşını, oğlunu, bacısını itirdi və təsadüfi deyil ki, hər il yanvar ayının 20-si ümumxalq səviyyəsində matəm günü kimi qeyd olunur. Ancaq bu da bir həqiqətdir ki, 20 Yanvar, eyni zamanda, üzləşdiyi haqsızlıqlara etiraz səsini ucaldan, qəddar imperiyanın caynaqlarından xilas olmağa çalışan Azərbaycan xalqının azadlıq tarixinin şanlı səhifələrindən biridir. çünki bu faciə ilə Azərbaycan xalqının mübariz, cəsur və əzmkar bir xalq olduğu bir daha öz təsdiqini tapdı. Həmçinin, yaxın tariximizdə baş verən bu hadisə barədə həqiqətlərin gənc nəslə ötürülməsi, yaddaşlarda yaşadılması vətənpərvər bir toplumun yetişdirilməsində olduqca əhəmiyyətlidir.
Sevindirici haldır ki, bu gün Azərbaycan gəncliyi 20 Yanvar faciəsini unutmur, şəhidlərimizin xatirəsini hüznlə, eyni zamanda, qürur hissi ilə anır. Hər il bu münasibətlə gənclər tərəfindən çoxsaylı aksiyalar, tədbirlər təşkil olunur, böyüməkdə olan nəslin faciə barədə biliklərinin daha da dərinləşməsi yönündə işlər görülür. Xüsusi vurğulamaq lazımdır ki, həmin faciənin baş verməsindən 21 il keçməsinə baxmayaraq 20 Yanvar şəhidləri ilə birgə minlərlə Azərbaycan şəhidinin uyuduğu Şəhidlər Xiyabanını təkcə faciənin ildönümü günündə deyil, ilin bütün vaxtlarında uşaqlı-böyüklü minlərlə insan ziyarət edir. Yəni, hər bir insan anlayır ki, bugünkü müstəqil və firavan Azərbaycanda yaşadığımıza görə, xeyli dərəcədə şəhidlərimizə borcluyuq və onlar heç zaman unudulmayacaq.
Hülya MƏMMƏDLİ

Paylaş:

Baxılıb: 910 dəfə