Ermənilərin hərbi təxribatları...

Ana səhifə / Siyasət / Ermənilərin hərbi təxribatları...

Ermənilərin hərbi təxribatları...

24.11.2022 [10:11]

Azərbaycan Ordusu öz ərazimizdə növbəti əməliyyatlar keçirə bilər

Regionda sülhün və təhlükəsizliyin təmin edilməsi ən vacib məsələlərdən biridir. Xüsusilə, Azərbaycanla Ermənistan arasında münasibətlərin normallaşdırılması beynəlxalq birliyin diqqət mərkəzindədir.

Bu məqsədlə indiyə qədər bir sıra görüşlər keçirilib, bəyanatlar imzalanıb. Lakin hər görüşdən və razılaşmalardan sonra erməni tərəfi müxtəlif təxribatlara əl atır. Bu yanaşma Ermənistan üçün artıq ənənə halına çevrilib. Bu dəfə isə ermənilər İrəvanda keçirilən Kollektiv Təhlükəsizlik Müqaviləsi Təşkilatının sammiti ərəfəsində hərbi təxribatlar törədib. Son günlər qarşı tərəf davamlı olaraq mövqelərimizi atəşə tutur. Müdafiə Nazirliyinin məlumatına görə, noyabrın 22-si saat 22:15-dən noyabrın 23-ü saat 01:15-dək Ermənistan silahlı qüvvələrinin bölmələri İstisu və Basarkeçər rayonunun Günəşli yaşayış məntəqələri istiqamətlərində yerləşən mövqelərindən Ordumuzun Kəlbəcər rayonunun İstisu və Daşkəsən rayonunun Astaf yaşayış məntəqələri istiqamətlərində yerləşən mövqelərini müxtəlif çaplı atıcı silahlardan fasilələrlə atəşə tutub. Bundan başqa noyabrın 22-si saat 15:48-dən 18:20-dək Rusiya sülhməramlılarının müvəqqəti yerləşdiyi Azərbaycan ərazisindəki qeyri-qanuni erməni silahlı dəstəsinin üzvləri tərəfindən Azərbaycan Ordusunun Şuşa şəhəri və Tərtər rayonu istiqamətlərində yerləşən mövqeləri də fasilələrlə atəşə tutulub. Ordumuzun bölmələri tərəfindən qeyd olunan istiqamətlərdə adekvat cavab tədbirləri görülüb.

Bu təxribatların fonunda Ermənistan beynəlxalq birliyi aldatmaq üçün guya Azərbaycan Ordusunun erməni hərbi mövqelərinə atəşə tutması barədə məlumatlar yayıb. Amma Azərbaycan Müdafiə Nazirliyi bu məlumatları qəti surətdə təkzib edib. Ümumiyyətlə, ermənilərin bu təxribatları hansı məqsədlərə hesablanıb?

Məsələ ilə bağlı qəzetimizə açıqlama verən hərbi ekspert Emin Həsənli bildirib ki, erməni tərəfi mütəmadi olaraq təxribatlar törətməklə bölgədə gərginlik yaratmağa çalışır. Ermənilər tarixən xalqımıza qarşı soyqırımları törədib, bizim torpaqlarımız hesabına “böyük Ermənistan” yaratmaq xülyası ilə yaşayıblar. Bəzi böyük dövlətlər ermənilərdən Azərbaycana və Türkiyəyə qarşı istifadə etməyə çalışırlar. Ekspert deyib ki, Ermənistan heç vaxt beynəlxalq hüquq normalarına əməl etməyib. Buna görə də, Azərbaycan 2020-ci ildə BMT Təhlükəsizlik Şurasının müvafiq qətnamələrini öz gücünə icra etdi.

E.Həsənli qeyd edib ki, Azərbaycan regionun gələcəyi naminə Ermənistanla sülh sazişi imzalamağın tərəfdarıdır və bununla bağlı təkliflərini qarşı tərəfə təqdim edib. Dövlət sərhədində təxribatların törədilməsinə gəlincə, ekspert hesab edir ki, Ermənistan regionda vəziyyəti gərginləşdirməyə çalışmaqla münasibətlərin normallaşdırılması təşəbbüslərinə qarşı çıxır. Onun sözlərinə görə, belə təxribatlar rəsmi İrəvanın özü üçün problemlər yaradacaq: “Ermənistan müharibədə məğlub olub, ona görə də mövcud reallıqlarla barışmalı, razılaşmalara, o cümlədən beynəlxalq hüquq normalarına və götürdüyü öhdəliklərə əməl etməlidir. Regionda sülhün təmin olunması üçün Avropa İttifaqı da fəal təşəbbüslərlə çıxış edib. Azərbaycan bu təşəbbüsləri dəstəkləyir və çalışır ki, ilin sonuna qədər sülh sazişi imzalansın. Amma Fransa, dünyadakı erməni lobbisi prosesi pozmaq üçün müxtəlif vasitələrdən istifadə edir. Təəssüf ki, qonşu dövlətlərdən İran və Rusiyadakı bəzi dairələr də onlara dəstək olur. Ermənilərin son hərbi təxribatları belə rəy formalaşdırmağa xidmət edir ki, guya tərəflər arasında sülh sazişi imzalamaq hələ tezdir, tərəflər buna hazır deyil, dövlətləri və xalqları sülhə hazırlamaq lazımdır və s. Yəni müxtəlif bəhanələrlə prosesi uzadırlar. Bunun da bütün məsuliyyəti Ermənistan hakimiyyətinin üzərinə düşür. Əgər Ermənistan təxribatlarından əl çəkməsə, dəmir yumruq daha sərt və ağır olacaq. Buna görə də, Paşinyan hakimiyyəti əvvəlki təcrübələrdən nəticə çıxarmalıdır. Azərbaycan öz təhlükəsizliyini yüksək səviyyədə təmin edir. Dövlət sərhədində Ermənistanın hərbi təxribatlarının qarşısının necə alındığını görürük. 12-13 sentyabr hadisələri buna sübutdur. Bu mənada, erməni tərəfi bundan sonra da layiqli cavablarını alacaq”.

Azərbaycan ərazisində müvəqqəti yerləşdirilmiş Rusiya sülhməramlı kontingentinin məsuliyyət zonasına daxil olan ərazilərdən qanunsuz erməni silahlı dəstələrinin mövqelərimizə atəş açmalarına gəlincə, Azərbaycan növbəti dəfə də özünümüdafiə məqsədilə əməliyyatlar keçirə bilər: “Heç kim “Qisas” əməliyyatını unutmayıb. Dövlətimizin öz sərhədləri çərçivəsində bu tipli əməliyyatları keçirmək hüququ var. Ermənilərin bu dəfə Şuşa istiqamətindəki mövqelərimizi atəşə tutması artıq onların cəzalandırılmasının vaxtının çatdığına bir işarədir. Şuşa istiqamətində atəş açılması göstərir ki, ermənilər mövcud vəziyyətlə barışmaq istəmirlər. Həm daxili auditoriyaya, həm də beynəlxalq birliyə göstərmək istəyirlər ki, müharibə bitməyib. Rusiya sülhməramlıları isə ermənilərin bu təxribatlarına münasibət bildirmir. Onlar öz öhdəliklərini yerinə yetirməlidirlər. Əks halda, Azərbaycanın özü yenə ermənilərin dərsini verəcək. “Dəmir yumruq” bu dəfə onların başına daha pis dəyəcək”.

Nardar BAYRAMLI

Paylaş:

Baxılıb: 316 dəfə