Azərbaycan müxalifətinin radikal qanadı mitinq şousu yaratmaq istəyir

Bakı:

13 °C

54 %

13 m/s

Əlaqə

AZ RU EN

Ana səhifə / Siyasət / Azərbaycan müxalifətinin radikal qanadı mitinq şousu yaratmaq istəyir

Azərbaycan müxalifətinin radikal qanadı mitinq şousu yaratmaq istəyir

01.04.2011 [10:07]

Mübariz Qurbanlı: Əminəm ki, aprelin 2-də müxalifətin radikal qanadının növbəti mitinq şousu fiaskoya uğrayacaq və onlar istədiklərinə nail ola bilməyəcəklər
“Müxalifətin radikal qanadı mitinq şousu yaratmaq və bununla da siyasi səhnədə mövcudluğunu göstərmək istəyir, ancaq bu əbəsdir”. Bunu “Trend”ə müsahibəsində hakim Yeni Azərbaycan Partiyasının (YAP) İcra katibinin müavini, millət vəkili Mübariz Qurbanlı bildirib. M.Qurbanlı deyib ki, Azərbaycanda kütləvi aksiyaların keçirilməsi qanunla tənzimlənir. “Sərbəst toplaşmaq azadlığı haqqında” Qanun var və istənilən siyasi partiya və qurum bu qanun çərçivəsində aksiyalar keçirə bilər. Bu aksiyalar Azərbaycanın qanunlarına zidd olacağı halda təbii ki, hüquq-mühafizə orqanları tərəfindən onun qarşısı alınacaq. Bütövlükdə radikal müxalifətin mitinqlə əlaqədar hay-küyünə gəldikdə isə onu deyə bilərəm ki, bu gün Azərbaycan cəmiyyəti kütləvi aksiyalar, mitinqlər, piketlər və s. keçirilməsini dəstəkləmir. Azərbaycan cəmiyyəti sabitlik və bu sabitliyin fonunda Azərbaycanın inkişafını istəyir və bu gün də Prezident İlham Əliyev, məhz, bunu həyata keçirir ki, Azərbaycan vətəndaşı yaxşı yaşasın, ölkə inkişaf etsin, Qarabağ problemi daha tez həll olunsun”, - deyə hakim partiya rəsmisi bildirib.
“Martın 11-də və 12-də biz demişdik ki, Azərbaycan cəmiyyəti buna dəstək verməyəcək. Əminəm ki, aprelin 2-də müxalifətin radikal qanadının növbəti mitinq şousu fiaskoya uğrayacaq və onlar istədiklərinə nail ola bilməyəcəklər”, - deyə o, qeyd edib.
YAP İcra katibinin müavini əlavə edib ki, müəyyən dairələrin, xüsusilə də erməni lobbisinin təsiri altında olan dairələrin himayəsi ilə Azərbaycanda ictimai-siyasi sabitliyi pozmağa yönələn cəhdlər beşiyindəcə məhv olacaq və məğlubiyyətə düçar olacaq.
M.Qurbanlının sözlərinə görə, müxalifətin radikal qanadına müəyyən xarici dəstəklər ola bilər. “Bu xarici dəstəklər birbaşa erməni lobbisi ilə bağlı olan təşkilatlar vasitəsilə, ayrı-ayrı QHT-lərin maskalanmış pərdəsi altında ötürülür və ötürülməkdə davam edir. Belə faktlar zaman-zaman mətbuatda yazılır. Ayrı-ayrı xarici QHT-lər qrantların müəyyən vəsaitini radikal qanada ötürür. Bu qurumların maliyyə mənbələri araşdırılarkən həmin qurumların birbaşa xarici ölkələrdəki erməni təşkilatları ilə bağlılığı ortaya çıxır. Yəni, kimsə bu gün ABŞ dövləti səviyyəsində, Böyük Britaniya dövləti səviyyəsində müxalifətə dəstək vermir. Ola bilər ki, Fransa parlamentində onlara fərd olaraq hansısa siyasi dəstək verilsin. Həmin fərdlər araşdırılarkən bəlli olur ki, onlar ermənilərin pulu ilə həmin yerlərə seçilmiş siyasətçilərdir. Bu gizli deyil ki, ABŞ Konqresində Ermənistanın Dostları Qrupu fəaliyyət göstərir. Həmin qrupun üzvləri zaman-zaman Azərbaycanın əleyhinə təbliğat aparırlar, Azərbaycanla ABŞ arasındakı münasibətlərə xələl gətirmək istəyirlər. Həmin qrup Ermənistana dəstək verir və dolayısı ilə ermənilərin maraqlarına uyğun olaraq Azərbaycanda erməni lobbisinin himayəsi ilə müəyyən işləri görür”, - deyə M.Qurbanlı bildirib.

Paylaş:

Baxılıb: 926 dəfə