Dağıdıcı, radikal müxalifətin siyasi meydandan getməsi artıq sosial sifarişdir

Bakı:

10 °C

87 %

5 m/s

Əlaqə

AZ RU EN

Ana səhifə / Siyasət / Dağıdıcı, radikal müxalifətin siyasi meydandan getməsi artıq sosial sifarişdir

Dağıdıcı, radikal müxalifətin siyasi meydandan getməsi artıq sosial sifarişdir

31.03.2011 [09:45]

Bakı şəhərinin sakinləri tərəfindən redaksiyamıza göndərilən çoxsaylı şikayət məktublarında insanlar ölkə rəhbərindən dağıdıcı müxalifətin qanunsuz hərəkətlərinin qarşısını almaq üçün birdəfəlik tədbir görməsini xahiş edirlər
Qəzetimizin ötən saylarında qeyd etdiyimiz kimi, xarici qərəzli qüvvələrin sifarişilə ölkədə xaos və anarxiya yaratmağa çalışan dağıdıcı-ekstremist müxalifətin qanunsuz və ictimai təhlükəli fəaliyyəti insanları narahat etməyə başlayıb. Bununla əlaqədar olaraq, Bakı şəhərinin sakinləri qəzetimizin redaksiyasına məktublar göndərərək, radikal müxalifətin bu cür əməllərindən narahatlıq keçirdiklərini bildirir və dövlət başçısından təhlükəsizliyin qorunması üçün ciddi addımların atılmasını xahiş edirlər.
Bu günlərdə eyni məsələ ilə bağlı redaksiyamıza yeni şikayət məktubları daxil olub. Bu məktublarda da şəhər sakinləri dağıdıcı müxalifətin qanunsuz fəaliyyətini kəskin şəkildə pisləyir və ölkə rəhbərindən dağıdıcı müxalifətin qanunsuz hərəkətlərinin qarşısını almağı xahiş edirlər.
Bakı şəhəri Nizami küçəsində yaşayan Əhmədova Məlakə Əsəd qızı tərəfindən daxil olmuş məktubda bildirilir ki, 11-12 martda baş tutmuş mitinqlərin məqsədi respublikada yalnız anarxiya yaratmaqdan ibarət olub. Məktub müəllifi ölkə rəhbərindən bu qanunsuz hərəkətlərin qarşısını almağı xahiş edir.
Digər şikayət məktubu Mərdanov qardaşları küçəsində yaşayan Qarayevlər ailəsi və Mərcanovlar ailəsi tərəfindən daxil olub. Bildirilir ki, son günlər şəhərin mərkəzində baş verən hadisələr heç bir halda qəbuledilməzdir. Məktubda deyilir: “Belə ki, özlərini siyasi qüvvə kimi qələmə verməyə can atan bəzi ünsürlər kimlərinsə tapşırığını yerinə yetirmək üçün cəmiyyətdə çaşqınlıq və xaos yaratmaq istəyirlər. Onlara dəstək verən siyasi işbazlar (sapı özümüzdən olan baltalar) keçmiş zamanla yaşayır, öz mövcudluqlarını təsdiq etmək üçün xarici yiyələri qarşısında dəridən-qabıqdan çıxırlar. Və son olaraq hər bir Azərbaycan vətəndaşı təhlükəsizliyinin qarantı kimi ölkə başçısını görür”.
Digər şikayət məktubu isə Səbail rayonunda fəaliyyət göstərən müxtəlif mağazalarda çalışan Kərimov Teymur və Həmidli Xumar tərəfindən daxil olub. Hər iki şikayətçi radikal müxalifətin “11 və 12 mart” adları altında irəli sürdükləri xaos və anarxiya törətmək cəhdlərini hiddət və qınaqla qarşıladıqlarını bildirirlər. Onlar mənasız və əsassız mitinqlərin keçirilməsinə qarşı olduqlarını vurğulayır və ölkə başçısından müxalifətçilər barəsində birdəfəlik tədbir görməsini artıq dərəcədə xahiş edirlər.
Beləliklə də, aydın olur ki, bəzi ölkələrdə baş vermiş hadisələrdən “ruhlanan” dağıdıcı müxalifət qanunsuz və təhlükəli fəaliyyəti ilə insanları narahat edir, onların rahatlığını pozur. Bu gün hər bir vətəndaş Azərbaycanda həyata keçirilən siyasi kursu dəstəkləyir və müşahidə olunan dinamik inkişafın davamlı olmasını istəyir.
Bir sözlə, xarici siyasi qruplaşmaların diqtə etdiyi planları həyata keçirən, bu yolda Azərbaycan gəncliyini belə çirkin oyunların alətinə çevirməyə hazır olan dağıdıcı, radikal müxalifətin siyasi meyndandan getməsi sosial sifarişə çevrilib.
Ramil VƏLİBƏYOV

Paylaş:

Baxılıb: 922 dəfə