Xarici diplomatlar Ağdam-Xankəndi yolunda

Bakı:

22 °C

40 %

2 m/s

Əlaqə

AZ RU EN

Ana səhifə / Siyasət / Xarici diplomatlar Ağdam-Xankəndi yolunda

Xarici diplomatlar Ağdam-Xankəndi yolunda

01.09.2023 [10:40]

Ermənilərin “humanitar böhran” manipulyasiyası ifşa olunur

Xəbər verildiyi kimi, avqustun 29-da Azərbaycan Qızıl Aypara Cəmiyyəti Qarabağ iqtisadi rayonunda yaşayan erməniəsilli şəxslərin ehtiyaclarını qarşılamaq üçün ərzaq yükü təşkil edib. İlkin mərhələdə Ağdam-Xankəndi yolu ilə 40 ton un məmulatının ünvana çatdırılması nəzərdə tutulur. Artıq yüklər Ağdam-Xankəndi yolunda Rusiya sülhməramlı kontingentinin buradakı postunun qarşısına çatdırılıb.

Eyni zamanda, Azərbaycan özünün beynəlxalq hüquq normalarına və ədalət prinsipinə əsaslanan siyasətinin gerçək mahiyyətini, həmçinin Ermənistanın və Xankəndidə yuva salan separatçıların məqsədlərinin nədən ibarət olduğunu beynəlxalq ictimaiyyətin diqqətinə çatdırılması istiqamətində zəruri addımlar atır. Avqustun 31-də Azərbaycanda akkreditə olunan diplomatik korpusun nümayəndələri və hərbi attaşelərin Ağdama tanışlıq səfəri başlayıb. Bu səfərin təşkili Azərbaycanın sülhyaratma prosesində mövqeyinin tam aydın olduğunu, heç bir məqamı gizlətməyə çalışmadığını bir daha nümayiş etdirir.

Əsası olmayan “humanitar böhran” iddiaları

Postmüharibə mərhələsində başlayan sülhyaratma prosesinə münasibətdə qalib Azərbaycanla məğlub Ermənistanın yanaşması daban-dabana ziddiyyət təşkil edir. Azərbaycan öz yanaşmasında səmimilik və konstruktivlik sərgiləyir. Ölkəmiz qalib tərəf olmasına rəğmən, ilkin şərtlər irəli sürmədən Ermənistana sülh sazişinin imzalanmasını, sərhədlərin demarkasiya və delimitasiyasının aparılmasını təklif edir. Respublikamız üçtərəfli Bəyanata tam sadiqdir və üzərinə düşən bütün öhdəlikləri məsuliyyətlə yerinə yetirir. Azərbaycan Laçın-Xankəndi yolunun yeni marşrut üzrə inşasını qısa müddətdə tamamlayaraq istifadəyə verilməsini təmin edib.

Eyni zamanda, respublikamız Qarabağ iqtisadi rayonunda özünün suveren hüquqlarının bərpasına nail olmaq istiqamətində qətiyyətli addımlar atır. Məlumdur ki, postmüharibə mərhələsində Azərbaycan erməni əhalinin Laçın-Xankəndi yolu vasitəsi ilə sərbəst gedib-gəlməsinə bütün şəraiti, təhlükəsizlik mühitini təmin etmişdi. Lakin Ermənistan bundan sui-istifadə edərək bəhs olunan marşrutdan ölkəmizin ərazisinə silah-sursat, minalar daşınması və digər qanunsuz fəaliyyətləri həyata keçirdi. Təbii ki, Ermənistanın və separatçıların bu qəbildən olan davranışları dözülməz idi və Azərbaycan bunun qarşısını almaq üçün aprelin 23-də bəhs olunan yolun üzərində nəzarət-keçid məntəqəsi qurdu. Sərhəd-keçid məntəqəsinin fəaliyyəti tamamilə şəffaf şəkildə tənzimlənirdi. Bütün zəruri avadanlıqla təchiz olunan məntəqədən Beynəlxalq Qırmızı Xaç Komitəsinin, sülhməramlı kontingentin və ermənilərin sərbəst keçidi təmin olunurdu. Təbii ki, zəruri yoxlamaların aparılması şərti ilə. Lakin Ermənistan yenə də manipulyasiyalara, pozuculuq əməllərinə əl atdı. Əvvəlcə sərhəd-keçid məntəqəsi atəşə tutuldu, sonra isə buradan qanunsuz yüklərin daşınmasına cəhdlər göstərildi. Belə təxribatların qarşısının alınması məqsədilə nəzarət tədbirləri gücləndirilsə də, sərhəd-keçid məntəqəsinin fəaliyyəti yenə də təmin olunurdu və bu gün də ermənilərin gediş-gəlişinə şərait yaradılır. Paralel şəkildə, respublikamız erməni sakinlərinin ehtiyaclarının qarşılanması üçün Ağdam-Xankəndi yolundan istifadənin mümkün olduğunu bildirib.

Azərbaycanın belə xoş niyyətinə rəğmən, Ermənistan hakimiyyəti və Xankəndidəki separatçılar respublikamızın öz suverenliyi çərçivəsində atdığı addımları manipulyasiya predmetinə çeviriblər. Lap əvvəldən sülhyaratma prosesində səmimi olmayan Ermənistan tərəfindən indi də Xankəndinin guya blokadaya alındığı, burada hansısa “humanitar böhran” yaşandığı ilə bağlı absurd iddialar səsləndirilir. Halbuki bu qəbildən olan iddiaların heç bir əsası yoxdur. Ermənistan rəhbərliyinin, separatçıların və onların havadarlarının belə iddiaları gündəmə gətirməkdə yeganə məqsədləri sülh prosesini əngəlləməkdən ibarətdir. Əgər məsələ doğrudan da Xankəndidə ərzaq çatışmazlığı ilə bağlıdırsa, onda nə üçün qarşı tərəf Azərbaycanın təklif etdiyi Ağdam-Xankəndi marşrutuna “yox” deyir? Yeri gəlmişkən, ilkin mərhələdə ermənilər daşımaların Ağdam-Xankəndi yolu ilə həyata keçirilməsinə razı olduqlarını bildirmişdilər. Sonradan onlar havadarlarının təhriki ilə bu razılaşmanı da pozdular.

Ağdam-Xankəndi yolu tam yenidən qurulub

Qeyd edək ki, səfərdə 50-dən artıq ölkə və beynəlxalq təşkilatdan 60-a yaxın şəxs, o cümlədən Türkiyə, Çin, Rusiya, Yaponiya, İsveçrə, Polşa, Çexiya, Bolqarıstan, Rumıniya, Serbiya, Argentina, Kolumbiya, Meksika, Cənubi Koreya, İndoneziya, İsrail, Birləşmiş Ərəb Əmirlikləri, Əlcəzair, Qətər, İraq, İran, Əfqanıstan, Liviya, Fələstin, Ukrayna, Qazaxıstan, Özbəkistan, Belarus, Gürcüstan, Tacikistan və digər ölkələrin, Birləşmiş Millətlər Təşkilatı, Ümumdünya Səhiyyə Təşkilatı, TÜRKPA və sair beynəlxalq təşkilatların təmsilçiləri, habelə xarici jurnalistlər iştirak edirlər.

Diplomatlar Ağdam-Xankəndi yolunda Azərbaycan Qızıl Aypara Cəmiyyətinin ərzaq yüklərinin yerləşdiyi məntəqə ilə tanış olublar. Diplomatik korpus nümayəndələri həmçinin Ağdam-Xankəndi yolunun istifadə üçün tam yararlı olduğunu öz gözləri ilə görmək imkanı qazanıblar. Bu yol qısa müddətdə yenidən qurulub. Ağdam-Xankəndi yolu müasir standartlara uyğun qurulmaqla yanaşı, bölgədə Xankəndinə ən qısa məsafə hesab olunur. Laçın-Xankəndi yolunun uzunluğu 60 km-dir və bu yol Şərqi Zəngəzurla Qarabağı birləşdirir. Ağdam-Xankəndi yolu isə daha qısadır, Qarabağ iqtisadi rayonunda daxili şəbəkədir və bu baxımdan da vacib nəqliyyat xəttidir. Sual olunur: Əgər məqsəd Azərbaycanın Qarabağ bölgəsində yaşayan ermənilərə humanitar yardım göstərməkdirsə, niyə Ermənistanın siyasi hakimiyyəti daha qısa və müasir standartlara uyğun qurulmuş yoldan istifadədən imtina edir? Qarabağda yaşayan erməni sakinlər Azərbaycan vətəndaşlarıdırlar. Onların hüquqlarının qorunmasına Konstitusiya ilə hər cür təminatlar verilir. Ağdam-Xankəndi marşrutundan istifadə olunması reinteqrasiya proseslərini sürətləndirəcək.

MÜBARİZ

Paylaş:

Baxılıb: 609 dəfə