İrəvanda siyasi gərginlik

Bakı:

24 °C

62 %

1 m/s

Əlaqə

AZ RU EN

Ana səhifə / Siyasət / İrəvanda siyasi gərginlik

İrəvanda siyasi gərginlik

06.09.2023 [10:10]

Revanşistlərə “hərəkət” əmri verilib...

Qarabağdakı qondarma rejimdə baş verən “əldəyişmə” deyəsən Ermənistana da təzahür etməkdədir. Belə ki, 44 günlük müharibədən sonra epizodik olaraq gözə dəyən, son dövrlərdə isə ümumiyyətlə, siyasi gündəmdən çıxmış Ermənistanın revanşist müxalifəti yenidən “küçələrə tökülüb”. Təbii ki, baş verənlər birmənalı qarşılana bilməz və bu ilin əvvəlindən etibarən haqqında praqmatik ümidlə danışılan sülh prosesinin əleyhinə yönəldiyi ortadadır. Xüsusilə, bu mitinqdə iştirakçıların səsləndirdikləri “fikirlər” bu tezisləri təsdiqləyir...

Sarkisyanın iddiaları...

Vurğulayaq ki, sentyabrın 2-də Ermənistan müxalifətinin 3 saatlıq mitinqinin əsas təşkilatçısı “Daşnaksütyun” partiyası sayılsa da, yayılan görüntülər əsl həqiqəti ortaya çıxardı - bu mitinq Köçəryan-Sarkisyan tandeminin “bərpa prosesini” özündə əks etdirirdi. Xüsusilə, erməni mətbuatının mitinqlə bağlı yazılarında sabiq prezidentlərin şəkillərinin verilməsi bu faktı təsdiqləyir. Aksiyanı “kənardan” izləyən Sarkisyan çıxış etməsə də, mitinqlə bağlı xəbərləri onun açıqlamaları “bəzəyir” - onun Qarabağdakı qondarma rejimə ürək-dirək vermək cəhdləri xüsusilə diqqəti cəlb edir. Sarkisyan iddia edib ki, Ermənistanda hakimiyyət dəyişikliyi Qarabağdakı proseslərə də “təsir” göstərəcək. Maraqlıdır ki, Sarkisyan açıq şəkildə çevrilişə başçılıq etdiyini də dilə gətirib - o bildirib ki, yeni hökumətin formalaşmasında yox, mövcud olan hakimiyyətin dəyişdirilməsində iştirak edəcək. O, hətta Arutyunyanın qondarma vəzifəsini tutacağı gözlənilən yeni “dövlət naziri” Samvel Şahramanyanı da tərifləyib, ona ümid etdiklərini deyib.

Ermənistan özünü açıq hədəfə çevirir...

Göründüyü kimi, bəzi xarici güclərə arxalanan revanşistlərin “fəallaşdırılması” Ermənistanın siyasi vəziyyətini daha da çətinləşdirir. Təbii ki, indiki dönəmdə çevrilişin baş vermə ehtimalı, Paşinyanı dəstəkləyən xarici güclərin buna imkan verməsi reallığı, regional amillərin rolu məsələsi olduqca böyük önəm daşıyır. Bütün qüvvələr anlayır ki, Ermənistanın Azərbaycana qarşı yeni hərbi təxribatı bu ölkənin sonunu gətirə bilər. İndiki dövrdə həm güc, həm də siyasi üstünlük Azərbaycanın tərəfindədir. Bakının irəli sürdüyü şərtlər birmənalı olaraq beynəlxalq hüquqa əsaslanır. Bu baxımdan, mitinqlərin intensivləşdirilməsi Ermənistan üçün yalnız və yalnız neqativ perspektiv formalaşdıra bilər. Yeni iqtisadi düzənin formalaşmasına təhdid yaradan Ermənistan özünü açıq hədəfə çevirməklə yanaşı, onsuz da on illiklərdir yerində sayan iqtisadiyyatını, gərgin sosial durumunu daha da pisləşdirər.

Qarışıqlıqdan yararlanmağa çalışanlar...

Revanşist güclərin çevriliş arzusunda olması açıq şəkildə ortadadır - məsələn, Nikol Paşinyanın istefa vermək fikrində olmadığını açıqlayacağı təqdirdə çıxış yolunu necə gördüyü ilə bağlı sualı cavablandıran Sarkisyan deyib ki, o, bunu istəmir, amma biz istəyirik, görək kimin arzusu gerçəkləşəcək. Sarkisyan və onun “dəstəkçiləri” hesab edirlər ki, hazırk? situasiyada baş verə biləcək siyasi qarışıqlıq onlar üçün vaxt uduşu vəd edir - amma bu belə deyil. Azərbaycan bütün müstəvilərdə siyasi əsaslandırmalarını formalaşdırıb. BMT TŞ-nin son müzakirələri isə ölkəmizin mövqeyinə dəstək kimi də izah oluna bilər. Yəni, Ağdam-Xankəndi yolu ilə bağlı məsələ, reinteqrasiya məsələsi Azərbaycanın qəti mövqeyidir. Başqa sözlə, Qarabağla bağlı məsələ Azərbaycanın daxili işidir. Laçın dövlət sərhəd-buraxılış məntəqəsinin formalaşdırılması bu məsələni bitirib. Artıq Ermənistanın və ya onun havadarlarının Laçın postu ilə bağlı hansısa qərarı vermək kimi bir şansları yoxdur - bu, Azərbaycanın suveren ərazilərinə müdaxilə kimi anlaşılacaq. Bu mənada, Ermənistanda hakimiyyətin aqibəti və ya oradakı siyasi proseslərin inkişafı sadəcə iki ölkə arasındakı münasibətlərin normallaşması prosesinin ləngiməsinə yol aça bilər ki, bu da inandırıcı deyil. Regional aktorlar bu məsələnin də yaxın zamanda həlli ilə bağlı mühüm addımlar atırlar. Yəni heç kim ümid etməməlidir ki, İrəvandakı “qarmaqarışıqlıq” proseslərindən öz xeyri üçün istifadə edə bilər.

SADİQ

Paylaş:

Baxılıb: 611 dəfə