Aİ “mülki” missiyasını deşifrə etdi...

Bakı:

12 °C

94 %

5 m/s

Əlaqə

AZ RU EN

Ana səhifə / Siyasət / Aİ “mülki” missiyasını deşifrə etdi...

Aİ “mülki” missiyasını deşifrə etdi...

07.12.2023 [10:40]

“Mülki”liyin hərbiləşdirilməsi planı ortaya çıxıb

Avropa İttifaqının (Aİ) Ermənistandakı missiyası ilə bağlı bəzi “pərdələr” qalxdıqca, əsl məqsəd və məramlar ortaya çıxır - bu missiyanın mülki deyil, hərbi kontingentə bənzəməsi daha çox gözə çarpır. Hələ ötən ayın əvvəlində missiyanın rəhbəri Markus Ritter erməni mediasına açıqlamasında Avropa İttifaqının Ermənistandakı monitorinq missiyasının tərkibinin genişləndirilməsi məsələsinin bu ilin sonuna qədər Brüsseldə müzakirə olunacağını bildirmişdi. Artıq deyəsən, bu baş verməkdədir. Belə ki, Avropa İttifaqı (Aİ) bu ilin sonu və ya gələn ilin əvvəlində Ermənistana hərbi-texniki missiya göndərməklə bağlı qərar qəbul edib. Bu barədə qurumun Ermənistandakı nümayəndəsi Vasilis Maraqos deyib. O bildirib ki, Aİ Ermənistanla bütün sahələrdə, o cümlədən təhlükəsizlik sahəsində əməkdaşlığı inkişaf etdirmək öhdəliyi götürüb: “Bu ilin sonu və ya gələn ilin əvvəlində Brüssel Ermənistan ilahlı üvvələrinə yardım göstərmək məqsədilə konkret təkliflər hazırlamaq üçün Ermənistana texniki missiya göndərəcək”.

Aİ “jandarmeriyası”nın əsl siması...

Bu planın nədən ibarət olması sirr deyil - belə ki, Aİ üzvlərindən 23 ölkənin nümayəndələrinin daxil olduğu Monitorinq Missiyasının tərkibini genişləndirməklə təşkilat ətrafındakı 27 ölkənin hər birini burada iştirakçı etmək niyyətindədir. Onsuz da missiyanın “hərbi jandermeriya” xarakteri daşıması sənədlərlə sübuta yetirilmişdi. 2020-ci ildən bu yana Ştutqart şəhərinin polis idarəsinin rəisi olan alman Markus Ritterin missiyya başçılıq etməsi məsələnin məğzini ortaya qoyur - Ritterin “əmək faəliyyəti” isə onun polisdən çox hərbçiyə bənzədiyini göstərir: o, Aİ-nin İraqdakı məsləhət missiyasına rəhbərlik edib, Aİ və BMT-nin Cənubi Sudan, Gürcüstan və Kosovadakı missiyalarında xidmət edib, eləcə də Almaniyanın Əfqanıstandakı səfirliyində polis müşaviri olub. Üstəlik, Aİ missiyasının alman komandirindən başqa, missiya əməkdaşlarının böyük əksəriyyəti də elit bölmələrin istefada olan hərbçiləri və müxtəlif Qərb ölkələrinin mövcud kəşfiyyatçılarıdır.

Missiyanın rəsmi olaraq “Avropa İttifaqının missiyası” hesab edilməsinə baxmayaraq, onun faktiki idarəçiyi Avropada NATO-nun Birləşmiş Silahlı Qüvvələrinin ali komandanlığı ilə sıx əlaqədə həyata keçirilir. Komandanlığa isə ötən ildən ABŞ Hərbi Hava Qüvvələrinin generalı, Bosniya və Əfqanıstandakı missiyalarda işləmiş Kristofer Kavoli rəhbərlik edir. Beləliklə, onsuz da Aİ missiya əvvəlindən hərbi obrazda çıxış edirdi. Avropa İttifaqı (Aİ) bu ilin sonu və ya gələn ilin əvvəlində Ermənistana hərbi-texniki missiya göndərməklə bağlı qərarı isə artıq onların əsl niyyətini deşifrə edir.

Yeni ofislər - hədəf uzunmüddətli hərbi kəşfiyyat fəaliyyətidir

Qeyd edək ki, “missyanın genişləndirilməsi” planı bütün istiqamətlər üzrə inkişaf etdirilir. Ötən ay Yeğeqnadzorda (Dərələyəz mahalı) Avropa İttifaqının Ermənistandakı müşahidə missiyasının qərargahının açılış mərasiminin keçirilməsi də təsadüfi deyil - qeyd edək ki, açılış mərasimindəki çıxışında Markus Ritter bildirmişdi ki, Aİ-nin Ermənistandakı missiyası bu ilin fevralında fəaliyyətə başlayan zaman iki daimi işçisi və üç sahə ofisi olub. “8 aydan sonra Aİ-nin 23 dövlətindən göndərilmiş 93 missiya üzvü ilə yeni qərargahımızın qarşısında dayanıram. Bəzi çətinliklər olsa da, fəxrlə deyə bilərəm ki, Aİ missiyası tam fəaliyyət qabiliyyətinə çatıb. Sentyabrın əvvəlində bizim Kafan, Gorus, Cermuk, Yeğeqnadzor və İcevanda 6 ofisimiz var idi. Patrullarımızın köməyi ilə biz Ermənistan və Azərbaycan arasındakı beynəlxalq sərhədin bütün uzunluğu boyunca işləyə bilirik”, - deyə Ritter vurğulamışdı.

Bəli, artıq şərhə ehtiyac qalmır. Ötən 8 ay ərzində kəşfiyyat qrupunu tam şəkildə Ermənistana yerləşdirmək imkanı “qazanan” Aİ-nin məqsədi ortadadır. Fransa və digər “güclər” Azərbaycanın regionda oynadığı və mütləq regional inktişafı hədəfləyən rolunu görür. Onlar ötən dövrdə hər hansı bir təzyiq vasitəsilə Azərbaycanın qərarlarına təsir göstərməyin mümkünsüzlüyünü də dəqiqləşdirib. Bu mənada, regionda distabilliyinin aradan qalxmaması, gərginliyin davam etməsi, sülhün əldə olunmaması üçün bütün gücünü səfərbər edir. Aİ bu kimi hərbiləşdirilmiş “mülki missiya” oyunları ilə daha uzun müddətə regionda qalmağı planlaşdırdığını “bəyan edir”.

P.SADAYOĞLU

Paylaş:

Baxılıb: 534 dəfə