Əmək və Əhalinin Sosial Müdafiəsi Nazirliyində 20 Yanvar əlilləri və şəhid ailələri ilə görüş keçirilib

Bakı:

18°C

82%

5m/s

AZ RU EN

Ana səhifə / Sosial / Əmək və Əhalinin Sosial Müdafiəsi Nazirliyində 20 Yanvar əlilləri və şəhid ailələri ilə görüş keçirilib

Əmək və Əhalinin Sosial Müdafiəsi Nazirliyində 20 Yanvar əlilləri və şəhid ailələri ilə görüş keçirilib

18.01.2014 [08:37]

Dünən Əmək və Əhalinin Sosial Müdafiəsi Nazirliyində 20 Yanvar əlilləri və şəhid ailələri ilə görüş keçirilib. Görüşdə 20 Yanvar faciəsi şəhidlərinin xatirəsi bir dəqiqəlik sükutla yad edilib, daha sonra Azərbaycan Respublikasının dövlət himni səslənib. Tədbirdə çıxış edən əmək və əhalinin sosial müdafiəsi naziri Səlim Müslümov 1990-cı il yanvarın 19-dan 20-nə keçən gecə Sovet imperiyasının hərbi birləşmələri tərəfindən Azərbaycan xalqına qarşı həyata keçirilən genişmiqyaslı terror aksiyasından söz açıb, faciə zamanı şəhid olan Azərbaycan övladlarının xalqımızın müstəqillik iradəsinin sarsılmazlığını dünyaya nümayiş etdirdiklərini, onların xatirəsinin əbədi yaşayacağını vurğulayıb.
Qeyd olunub ki, faciədən dərhal sonra, 1990-cı il yanvarın 21-də Ümummilli lider Heydər Əliyevin hər hansı təhlükədən çəkinməyərək ailəsi ilə birgə Azərbaycanın Moskvadakı daimi nümayəndəliyinə gəlməsi, həmvətənlərimiz və xarici KİV-lər qarşısında SSRİ rəhbərliyinin Azərbaycana qarşı həyata keçirdiyi qanlı aksiyanı kəskin şəkildə pisləyən bəyanatla çıxış etməsi təkrarsız mərdlik və cəsarət, eyni zamanda, xalqa sonsuz bağlılıq nümunəsinə çevrilib.
Görüşdə 20 Yanvar faciəsinə siyasi-hüquqi qiymət verilməsi, bu faciə zamanı şəhid olmuş insanların ailələrinin və əlil olmuş insanların sosial müdafiəsinin gücləndirilməsi istiqamətində Ulu öndərimiz Heydər Əliyevin və möhtərəm Prezidentimiz cənab İlham Əliyevin xidmətlərindən danışılıb.
20 Yanvar faciəsinin gənclərdə vətənpərvərlik ruhunu, ölkəmizin ərazi bütövlüyü naminə mübarizə əzmini yüksəltdiyini bir gəncin timsalında əks etdirən sənədli filmin nümayişi olub.
İkinci qrup 20 Yanvar əlili Tofiq İbrahimov çıxış edərək, onlara və şəhid ailələrinə göstərilən diqqət və qayğıya görə dövlət başçısına minnətdarlığını ifadə edib.
Onu da qeyd edək ki, Əmək və Əhalinin Sosial Müdafiəsi Nazirliyi tərəfindən 20 Yanvar faciəsinin 24-cü ildönümü ilə əlaqədar 319 nəfər 20 Yanvar əlilinin və 115 şəhid ailəsinin hər birinə 50 manat məbləğində birdəfəlik maddi yardım göstərilib. Azərbaycan Respublikası Prezidentinin 2006-cı il 19 yanvar tarixli Fərmanına əsasən, 20 Yanvar şəhidlərinin ailə üzvlərinə ayda 300 manat, 19 yanvar 2011-ci il tarixli Fərmanına əsasən isə 20 Yanvar hadisələri ilə əlaqədar əlil olmuş şəxslərə, o cümlədən, I qrup əlillərə 150 manat, II qrup əlillərə 130 manat, III qrup əlillərə isə 100 manat məbləğində Azərbaycan Respublikası Prezidentinin təqaüdləri təyin olunub.
Əmək və Əhalinin Sosial Müdafiəsi Nazirliyi tərəfindən indiyədək 53 nəfər 20 Yanvar əlili və şəhid ailəsi mənzillə, 58 nəfər 20 Yanvar əlili isə minik avtomobili ilə təmin edilib. Eyni zamanda, istedadlı əlillərin iştirakı ilə keçirilən ümumrespublika səviyyəli yaradıcılıq müsabiqələri və idman yarışlarında 20 Yanvar əlillərinin də iştirakı təmin edilir.
Pərviz SADAYOĞLU

Paylaş:

Baxılıb: 1176 dəfə