Azərbaycan dövlətinin belə yüksək inkişafı hər bir azərbaycanlıda haqlı qürur doğurur

Bakı:

15 °C

67 %

10 m/s

Əlaqə

AZ RU EN

Ana səhifə / Sosial / Azərbaycan dövlətinin belə yüksək inkişafı hər bir azərbaycanlıda haqlı qürur doğurur

Azərbaycan dövlətinin belə yüksək inkişafı hər bir azərbaycanlıda haqlı qürur doğurur

08.08.2014 [09:35]

Yaroslavlda yaşayan azərbaycanlı gənc Könül Əliyeva: Xaricdə yaşayan azərbaycanlılar dövlətimizin dəstəyini daim hiss edir və bu, bizə daha da güc verir
Rusiyanın Yaroslavl şəhərində yaşayan azərbaycanlı gənclər bu günlərdə redaksiyamızın qonağı olub. Yaroslavl Dövlət Tibb Akademiyasının tələbəsi Könül Əliyeva əməkdaşımızla söhbətində bu şəhərdəki Azərbaycan diasporunun fəaliyyəti, şəhər sakinlərinin azərbaycanlılara münasibəti, həmçinin, ölkəmizin və paytaxt Bakının inkişafı ilə bağlı fikirlərini bölüşüb. K.Əliyeva deyib ki, Rusiyada yaşasa da, Azərbaycanda baş verən prosesləri daim izləyir, ölkəmizdəki dostları ilə ünsiyyət qurur.
Hər il Bakıya gəldiyini deyən K.Əliyeva vurğulayıb ki, hər gəlişində paytaxtımızın xeyli dərəcədə gözəlləşdiyinin, müasirləşdiyinin şahidi olur: “Bakı dünyanın ən gözəl şəhərlərindən biridir. Bakı onsuz da gözəl idi, amma son illərdə aparılan işlər, yeni tikililər şəhərə daha da ecazkarlıq, gözəllik qatır. Bizim akademiyada bir çox ölkədən, dünyanın başqa-başqa şəhərlərindən tələbələr təhsil alır. Onlar da bizim şəhərimizə heyrandırlar. Ümumiyyətlə, Azərbaycan dövlətinin belə yüksək inkişafı hər bir azərbaycanlıda haqlı qürur doğurur. Biz, xaricdə yaşayan azərbaycanlılar da harada olmağımızdan asılı olmayaraq, dövlətimizin dəstəyini daim hiss edirik və bu, bizə daha da güc verir. Azərbaycan kimi inkişaf edən, müasirləşən, beynəlxalq proseslərdə fəal rol oynayan güclü bir dövlətin vətəndaşı olmaq çox böyük xoşbəxtlikdir”.
Yarsolavl şəhərində güclü Azərbaycan diasporunun formalaşdığını söyləyən Könül Əliyeva vurğulayıb ki, hər il əlamətdar günlər, bayramlar münasibətilə diaspor təmsilçilərimiz müxtəlif tədbirlər keçirirlər. Bu tədbirlərdə Azərbaycan icmasının nümayəndələri ilə yanaşı, yerli sakinlər, həmçinin, bir sıra digər xalqların da nümayəndələri iştirak edirlər: “Xüsusən, milli bayramlarımız, müstəqillik günündə, həmçinin, Ümummilli liderimiz Heydər Əliyevin anadan olmasının ildönümü münasibətilə keçirilən tədbirlərdə çox böyük kontingent iştirak edir. Onu da deyim ki, Yaroslavl şəhərinin ictimaiyyətindən də həmişə xoş münasibət görürük. Oradakı tələbələr bizim ölkəmizlə maraqlanır, sevgilərini ifadə edirlər”.
Ermənistan-Azərbaycan, Dağlıq Qarabağ münaqişəsinə də toxunan K.Əliyevanın sözlərinə görə, bu, dünyanın harasında yaşamasından asılı olmayaraq, hər bir azərbaycanlı üçün bir nömrəli məsələdir: “İnformasiya cəmiyyətinin belə yüksək inkişaf etdiyi müasir dövrdə təbliğat işinin təşkili, dövlətimizin haqq səsinin dünyaya çatdırılması olduqca vacib məsələdir. Dünya erməniləri hansı tədbirdə iştirak edirlərsə, hansı mühitdə olurlarsa, orada dövlətimiz və xalqımız əleyhinə təbliğat aparırlar. Bizim isə birinci vəzifəmiz onların yalanlarını ifşa etmək, əsl həqiqətləri ifadə etməkdir. Müharibə təkcə döyüşlərdə, cəbhədə qazanılmır. Düşmənə qarşı hər yerdə mübarizə aparmalı, hər yerdə qələbələr qazanmalıyıq”.
Gələcəklə bağlı planlarından da danışan K.Əliyeva vurğulayıb ki, hazırda əsas məqsədi ali təhsilini uğurla başa vurub, dövlətimizə, xalqımıza xidmət etməkdir: “Hazırda akademiyada ali təhsilimi davam etdirirəm. Ali təhsilimi başa vurduqdan sonra əlbəttə ki, Azərbaycana qayıdıb burada çalışmaq istərdim. Çünki Azərbaycan hazırda kifayət qədər inkişaf edib, ölkəmizdə müasir standartlara cavab verən səhiyyə sistemi mövcuddur. Mən də bu sahəyə göstərilən diqqət və qayğıdan faydalanaraq xalqımıza, vətəndaşlarımıza xidmət etmək istərdim. Amma Rusiyada, ya da başqa bir ölkədə yaşamaq imkanım olsa da, orada da Azərbaycanı ən yaxşı səviyyədə təmsil etməyə çalışacam”.
AQŞİN

Paylaş:

Baxılıb: 967 dəfə