“İl Primato Nazionale”: “ASAN xidmət” təcrübəsi dünya ölkələri üçün model ola bilər

Bakı:

15 °C

72 %

9 m/s

Əlaqə

AZ RU EN

Ana səhifə / Sosial / “İl Primato Nazionale”: “ASAN xidmət” təcrübəsi dünya ölkələri üçün model ola bilər

“İl Primato Nazionale”: “ASAN xidmət” təcrübəsi dünya ölkələri üçün model ola bilər

06.11.2015 [10:10]

İtaliyanın “İl Primato Nazionale” xəbər saytında yayılan məqalədə Azərbaycanda fəaliyyət göstərən “ASAN xidmət” mərkəzlərinin dünya ölkələri üçün model ola biləcəyi qeyd edilir.
Məqalədə əvvəlcə dövlət tərəfindən vətəndaşlara göstərilən xidmət sahəsində İtaliya təcrübəsi təhlil olunur və bu istiqamətdə müəyyən çatışmazlıqların olduğu vurğulanır. Diqqətə çatdırılır ki, bu ölkədə ictimai xidmətin müxtəlif sahələrinin bir mərkəzdə toplaşdığı və vətəndaşların rahat şəkildə yararlana biləcəyi mərkəz mövcud deyil.
Müəllif Avropa ilə Asiya arasında körpü rolunu oynayan Azərbaycanda müvafiq sahədə öz effektivliyini təsdiq etmiş, şəffaflığın və ictimai xidmətlərin səmərəliliyinin artırılması istiqamətində fəaliyyət göstərən “ASAN xidmət” mərkəzlərinin yaranma tarixi və fəaliyyət istiqamətləri barədə məlumat verir.
Məqalədə Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin beynəlxalq əlaqələr şöbəsinin müdiri Azad Cəfərlinin fikirlərinə yer verilib. O bildirib ki, “ASAN xidmət” mərkəzlərinin əsas hədəfi vətəndaşlara səmərəli xidmət göstərmək, sivil xidmət sahəsində peşəkarlığın artırılması və dövlət idarəçiliyində innovasiyaların tətbiqidir. Şəffaflıq və korrupsiya ilə mübarizə “ASAN xidmət” mərkəzlərinin əsas prinsipləridir. O deyib: “Agentliyin iş prinsipi elə qurulub ki, hər bir vətəndaş istədiyi vaxt əməliyyatları internet vasitəsilə izləyə bilər. “ASAN xidmət” mərkəzlərinin korrupsiya ilə mübarizə və şəffaflığın təbliği istiqamətində verdiyi töhfələr İqtisadi Əməkdaşlıq və İnkişaf Təşkilatı (OECD), Avropa Komissiyası və digər nüfuzlu beynəlxalq qurumlar tərəfindən yüksək qiymətləndirilib”.
Yazıda bildirilir ki, Azərbaycanda tətbiq edilən “ASAN xidmət” modeli beynəlxalq arenada böyük marağa səbəb olub. Belə ki, qurum BMT-nin “Dövlət xidmətlərinin göstərilməsinin təkmilləşdirilməsi” kateqoriyasında, Britaniya Əməyin Mühafizəsi Şurası tərəfindən 13 sahə üzrə keçirilən və müxtəlif dövlətlərdən olan 700-dən çox müəssisənin müraciət etdiyi müsabiqənin “Dövlət xidmətlərinin həyata keçirilməsinin təşkilində təhlükəsiz əmək şəraitinin qurulması” sahəsi üzrə qalibi olub. Hazırda 8 “ASAN xidmət” mərkəzi fəaliyyət göstərir. Onlardan 4-ü paytaxt Bakı şəhərində, digər 4-ü isə regional mərkəzlər olmaqla Sumqayıt, Gəncə, Sabirabad və Bərdədədir. Qurumun ən önəmli hədəflərindən biri şəffaflığı təmin etmək, vətəndaşlarla dövlət qurumları arasında əlaqələri asanlaşdırmaqdır.

Paylaş:

Baxılıb: 779 dəfə