Ölkəmizdəki multikultural və tolerant mühitin təməlində azərbaycançılıq ideologiyası dayanır

Bakı:

10 °C

81 %

7 m/s

Əlaqə

AZ RU EN

Ana səhifə / Sosial / Ölkəmizdəki multikultural və tolerant mühitin təməlində azərbaycançılıq ideologiyası dayanır

Ölkəmizdəki multikultural və tolerant mühitin təməlində azərbaycançılıq ideologiyası dayanır

05.03.2016 [11:33]

Xırdalan şəhərindəki Heydər Əliyev Mərkəzində “Azərbaycanda radikal dini cərəyanlar və onlara qarşı mübarizə” mövzusunda seminar-müşavirə keçirilib. Tədbir Dini Qurumlarla İş üzrə Dövlət Komitəsinin, Baş Prokurorluğun, Daxili İşlər və Ədliyyə nazirliklərinin, Dövlət Təhlükəsizliyi Xidmətinin və Abşeron rayon İcra Hakimiyyətinin birgə təşkilatçılığı ilə reallaşıb.
AZƏRTAC xəbər verir ki, seminar-müşavirədə yerli icra hakimiyyəti orqanlarının rəsmi şəxsləri, bu qurumların Sumqayıt şəhəri, Abşeron, Xızı, Qobustan, Zəngilan, Qubadlı və Şuşa rayonlarındakı strukturlarının rəhbər və məsul nümayəndələri iştirak ediblər.
Tədbiri Abşeron rayon İcra Hakimiyyətinin başçısı İradə Gülməmmədova açıb. O, ölkəmizdə müxtəlif dini konfessiyaların əsrlərdir sərbəst və qarşılıqlı anlaşma şəraitində fəaliyyət göstərdiklərini, onların dilinə, dininə, mədəniyyətinə xalqımız tərəfindən daim yüksək qiymət verildiyini bildirib.
Dini Qurumlarla İş üzrə Dövlət Komitəsinin sədr müavini Səyavuş Heydərov seminarda dini radikalizm və onun fəsadları barədə çıxış edib. Bəzi qüvvələrin din pərdəsi altında ölkəmizin ictimai-siyasi sabitliyinə, dövlətimizin hüquqi-demokratik əsaslarına qarşı yönəlmiş pozuculuq fəaliyyətləri, vətəndaşlarımızı xaricdə fəaliyyət göstərən dini ekstremist qrupların və onların silahlı dəstələrinin tərkibinə qoşmaq cəhdləri qətiyyətlə pislənilib, bu cür əməllər törətməyə cəhd edənlərə qarşı dövlət qurumları tərəfindən aparılan mübarizə tədbirləri barədə geniş məlumat verilib.
Sonra Baş Prokurorluğun idarə prokuroru Alim Cəbrayılov, Daxili İşlər Nazirliyi Baş İctimai Təhlükəsizlik İdarəsinin rəis müavini Hikmət Eyvazov və digərləri çıxış edərək, ölkəmizdəki multikultural və tolerant mühitin təməlində azərbaycançılıq ideologiyasının dayandığını bildiriblər. Diqqətə çatdırılıb ki, Prezident İlham Əliyevin həyata keçirdiyi uğurlu siyasət nəticəsində ölkəmizdə müxtəlif dinlərə etiqad edən insanlar mehriban və qarşılıqlı hörmət şəraitində yaşayır, respublikamız tolerantlıq və multikulturalizm nümunəsinə çevrilib.
Seminarda müxtəlif dini cərəyanlar və onların fəaliyyət metodları haqqında ətraflı məlumat verilib, ölkəmizdə qarşıdurma yaratmağa çalışan qüvvələrə qarşı mübarizədə hamının sayıqlıq göstərməsinin vacibliyi vurğulanıb.
Seminar-müşavirə işini müzakirələrlə davam etdirib.

Paylaş:

Baxılıb: 827 dəfə