Bakının tibbi yardım xidmətinə gün ərzində 2 minə yaxın çağırış daxil olur

Bakı:

24 °C

60 %

3 m/s

Əlaqə

AZ RU EN

Ana səhifə / Sosial / Bakının tibbi yardım xidmətinə gün ərzində 2 minə yaxın çağırış daxil olur

Bakının tibbi yardım xidmətinə gün ərzində 2 minə yaxın çağırış daxil olur

07.01.2017 [10:48]

Bakı Şəhər Təcili və Təxirəsalınmaz Tibbi Yardım Stansiyası 2016-cı il üzrə illik hesabatını açıqlayıb
Bakı Şəhər Təcili və Təxirəsalınmaz Tibbi Yardım Stansiyası (BTTTYS) 24 saat ərzində fasiləsiz olaraq paytaxtın bütün xəstə və zərərçəkən əhalisinə hadisə yerində və müalicə ocaqlarına çatdırılanadək tibbi yardım göstərir. Gündəlik olaraq 103 xidmətinə 2 minə yaxın çağırış daxil olur. Bayram və istirahət günlərində isə müraciətlərin sayı daha da artır.
Bu barədə stansiyanın 2016-cı il üzrə illik hesabatında məlumat verilib. Tədbirdə qeyd olunub ki, ötən il BTTTYS-yə 681 mindən artıq ümumi müraciət daxil olub. Stansiyanın baş həkiminin müavini İradə Əliyeva bildirib ki, müraciət edənlərdən 63 mindən çoxu xəstəxanalara yerləşdirilib. Uşaqlar üçün çağırışların sayı isə 83 mindən çox olub. Onlardan da xəstəxanalara yerləşdirilənlərin sayı 13 mindən artıqdır: “Bu müddət ərzində reanimasiya tədbirlərinin görülməsi nəticəsində çox ağır vəziyyətdən çıxarılaraq həyatı xilas edilən xəstələrin sayı 2 min nəfərdən çox olub. Ağır xəstələrin evdə rentgen müayinəsinin aparılması məqsədilə stansiya rəqəmsal və plyonkalı rentgen aparatları ilə təmin olunub”.
Baş həkimin müavininin sözlərinə görə, miokard infarktı ilə müraciətlərin sayı 1000, hospitalizasiya 940-a yaxın, insultla müraciətlərin sayı 3300, hospitalizasiya 2950, doğuşla bağlı müraciətlərin sayı 3310, hospitalizasiya 3290, avtoqəza zamanı xəsarət alanların sayı 2420, hospitalizasiya 2125-dən artıq olub. Evdə qalan xəstələr haqqında ərazi üzrə müvafiq poliklinikalara məlumat verilib. Eyni zamanda, çağırış zamanı aşkar edilən zahı və hamilə qadınlar barədə qadın məsləhətxanaları məlumatlandırılıb.
Vurğulanıb ki, təcili tibbi yardıma ehtiyacı olan 180 nəfər yaşayış yeri məlum olmayan şəxs ilkin tibbi yardım göstərildikdən, müxtəlif ixtisaslı bir neçə həkimin ətraflı tibbi müayinəsindən keçdikdən və təmiz geyimlə təmin edildikdən sonra müvafiq xəstəxanalara yerləşdirilib. Təcili yardım xidmətinin fəaliyyətinin təkmilləşdirilməsi, o cümlədən təcili tibbi yardım göstərilməsi məqsədilə istifadə olunan dərman preparatlarının siyahısı müalicə metodik şöbə tərəfindən daim araşdırılır və yeni dərman preparatları ilə əvəz olunur.
Stansiyanın baş həkiminin müavini Murad Mirzəzadə isə tibbi müəssisənin maddi-texniki təchizatının yüksək səviyyədə olduğunu diqqətə çatdırıb: “Stansiya kütləvi hadisələr zamanı 6 nəfəri daşıya bilən, qarlı-buzlu yollarda sürülə bilən, laborator və reanimasion sanitar avtomobillərlə təmin edilib”.
Müşfiqə BAYRAMLI

Paylaş:

Baxılıb: 851 dəfə