Koreyalı mütəxəssislər məcburi köçkünlərin məskunlaşdıqları ərazilərdə kəhriz su sistemlərini bərpa edəcəklər

Bakı:

10 °C

93 %

2 m/s

AZ RU EN

Ana səhifə / Sosial / Koreyalı mütəxəssislər məcburi köçkünlərin məskunlaşdıqları ərazilərdə kəhriz su sistemlərini bərpa edəcəklər

Koreyalı mütəxəssislər məcburi köçkünlərin məskunlaşdıqları ərazilərdə kəhriz su sistemlərini bərpa edəcəklər

23.02.2017 [10:04]

Qaçqınların və Məcburi Köçkünlərin İşləri üzrə Dövlət Komitəsinin sədr müavini Fuad Hüseynov fevralın 21-də Koreya Beynəlxalq Əməkdaşlıq Agentliyinin Azərbaycan nümayəndəliyinin ölkə üzrə direktoru Choi Yonjaenlə görüşüb.
Dövlət Komitəsinin mətbuat xidmətindən AZƏRTAC-a bildiriblər ki, məcburi köçkünlərin cəmiyyətə sosial-iqtisadi reinteqrasiyasını gücləndirmək məqsədi daşıyan “Azərbaycanda kəhriz su sistemlərinin bərpası vasitəsilə məcburi köçkünlərin məskunlaşdığı ərazilərdə kənd təsərrüfatının inteqrə edilmiş inkişafı” ilə bağlı təklif edilmiş layihənin texniki-iqtisadi əsaslandırılmasını müzakirə etmək üçün Koreyadan ezam olunmuş ekspert qrupunun da iştirak etdiyi görüşdə F.Hüseynov Azərbaycan ilə Koreya arasında son illər iqtisadi, siyasi əlaqələrin yeni mərhələyə qədəm qoyduğunu söyləyib. O, ölkəmizdəki məcburi köçkünlərin sosial problemlərinin həllində koreyalı mütəxəssislər tərəfindən bu cür humanitar layihələrin həyata keçirilməsini də deyilənlərin bariz nümunəsi kimi dəyərləndirib.
Komitənin sədr müavini Ermənistan-Azərbaycan, Dağlıq Qarabağ münaqişəsi və bu münaqişə nəticəsində yaranmış 1 milyon 200 mindən çox qaçqın və məcburi köçkün problemindən ətraflı bəhs edib. Qaçqın və məcburi köçkünlərin sosial-məişət şəraitlərinin yaxşılaşdırılması istiqamətində Prezident İlham Əliyevin bu sahəyə müntəzəm qayğı və diqqəti sayəsində həyata keçirilən tədbirlər və digər bu kimi məsələlər barədə hərtərəfli məlumat verib. F.Hüseynov onu da diqqətə çatdırıb ki, Azərbaycan belə bir ağır problemlə üzləşdiyi ilkin dövrlərdə əgər BMT qurumlarının, bir sıra ölkələrin, müxtəlif beynəlxalq humanitar təşkilatların köməyi olmasaydı fəlakətlə üz-üzə qalardı.
Görüşdə belə bir vaxtda Koreyanın humanitar təşkilatlarının da ölkəmizdəki qaçqın və məcburi köçkünlərə göstərdiyi humanitar yardımların böyük önəm kəsb etdiyi vurğulanıb. Bildirilib ki, artıq öz iqtisadi imkanlarını getdikcə artıran Azərbaycan dövləti qaçqın və məcburi köçkün həyatı yaşayan vətəndaşlarının problemlərinin həllini öz üzərinə götürüb, bu istiqamətdə dünyanın oxşar problemlərlə üzləşən ölkələri üçün nümunəyə çevrilib. Ancaq bütün bunlar o demək deyil ki, indi Azərbaycanda beynəlxalq humanitar təşkilatların layihələrinə ehtiyac yoxdur. Əksinə, indi xüsusilə, icmaların inkişafına, məcburi köçkünlərin məşğulluğunun artırılmasına, təhsilə, səhiyyəyə, müxtəlif inkişaf layihələrinə ehtiyac duyulur. Bu baxımdan Azərbaycanda məcburi köçkünlərin məskunlaşdıqları ərazilərdə kəhriz su sistemlərinin bərpası ilə bağlı layihə də olduqca mühüm əhəmiyyət kəsb edir.
Koreyalı mütəxəssislərdən ibarət nümayəndə heyəti ilə aparılan müzakirələr zamanı bildirilib ki, layihə ilə əlaqədar ölkəmizə gəlmiş nümayəndə heyəti artıq regionlarda araşdırmalara başlayıb və məcburi köçkünlərlə keçirilən görüşlərdə onlar da bu layihənin həyata keçirilməsini müsbət dəyərləndiriblər.
Görüşdə qonaqları maraqlandıran müxtəlif suallar cavablandırılıb.

Paylaş:

Baxılıb: 472 dəfə