Media orqanları ictimai maraqları üstün tutmalıdır

Bakı:

26 °C

78 %

11 m/s

Əlaqə

AZ RU EN

Ana səhifə / Sosial / Media orqanları ictimai maraqları üstün tutmalıdır

Media orqanları ictimai maraqları üstün tutmalıdır

11.11.2017 [01:49]

Reytinq arxasınca qaçan və zərərli, neqativ informasiyaları ictimai maraqları nəzərə almadan dövriyyəyə buraxan media orqanları cəmiyyət qarşısında məsuliyyət daşıdıqlarını unutmamalıdır
XXI yüzillik informasiya əsri kimi səciyyələndirilir. İnkişaf etmiş cəmiyyətlərdə informasiya başlıca idarəetmə vasitəsi kimi təsbit edildiyindən informasiya-kommunikasiya texnologiyalarının inkişafına xüsusi diqqət yetirilir. Bu isə mütəmadi surətdə informasiya resurslarının artırılmasını və təkmilləşdirilməsini şərtləndirən amil kimi çıxış edir. Xüsusi mübadilə və idarəetmə vasitəsi səciyyəsi daşıyan informasiya resurslarından səmərəli surətdə istifadə edilməsi üçün daim yeni mexanizmlər və texnologiyalara istinad edilir. Təbii ki, bütün bunlar yeni sosium növü olan informasiya cəmiyyətinin təşəkkülünü şərtləndirir. Ümumilikdə, klassik mənada informasiya cəmiyyəti dedikdə elə bir sosium növü nəzərdə tutulur ki, burada əhalinin böyük hissəsi müasir informasiya texnologiyalarından istifadə etməklə informasiyanın, ən əsası isə, onun ali forması olan biliyin istehsalı, saxlanması, emalı və ötürülməsi ilə məşğul olur.
Beləliklə, informasiya və kommunikasiya texnologiyalarından istifadə kütləvi hal alır. Əlbəttə, bütün bunlar öz növbəsində müsbət və mütərəqqi yenilikləri şərtləndirməklə yanaşı, bir sıra neqativ halların ortaya çıxmasına və ya artmasına da səbəb olur. Bu kontekstdə mediada ictimai şüura neqativ təsir edən informasiyaların yayılmasını xüsusi qeyd etmək lazımdır. Bu sırada kriminal xəbərlərlə bağlı materialların dövriyyəyə buraxılması - kriminal hadisələrin işıqlandırılması məsələsi xüsusi yer tutur. Şübhəsiz ki, müzakirələr zamanı burada bir tərəfdən ictimai maraqların prioritet olması, ikinci tərəfdən isə media nümayəndələrinin peşəkarlığı məsələsi ön plana çıxır.
Əsas etibarilə, bəzi media orqanlarının kriminal xəbərlərin işıqlandırılması üzərində diqqəti cəmləşdirməsi sosial-psixoloji fəsadlara yol açır, başqa sözlə, insanlar lüzumsuz və zərərli informasiya ilə yüklənirlər. Bu isə nəticədə qəhrəman kimi təqdim olunan cinayətkarların ayrı-ayrı fərdlərin, xüsusilə də gənclərin nəzərində “müsbət nümunə” olaraq təşəkkül tapmasına yol aça bilir. Belə informasiyalarla yüklənən və yanlış düşüncə təlqininə məruz qalan bu cür fərdlərin cəmiyyətə yararlı və ictimai maraqlar əsasında çıxış edən şəxslər kimi qəbul olunması mümkün deyil.
Şübhəsiz ki, reytinq arxasınca qaçan hansısa media orqanı bəzi hallarda ictimai populyarlığını artırmaq üçün bu cür neqativ çalarlı xəbərləri ictimai maraqları nəzərə almadan dövriyyəyə buraxmaqla cəmiyyət qarşısında daşıdığı məsuliyyəti unudur. Bu həm də peşə etikasına və peşəkar fəaliyyət prinsiplərinə ziddir.
Bütövlükdə, kriminal hadisələri ictimai maraqlardan və peşəkarlıqdan uzaq şəkildə tirajlayaraq ictimai şüura neqativ təsir edən media orqanları bir daha düşünməlidirlər: onlar üçün ictimai maraqlar, sağlam sosial-psixoloji əhval önəmlidir, yoxsa ucuz reytinq qazanmaq cəhdləri?! Əslində, bunu reytinq qazanmaq da adlandırmaq olmaz, çünki ciddi peşə fəaliyyətinə malik olmayan - ictimai şüuru zərərli informasiyalarla məşğul edən belə media orqanlarının fəaliyyəti təqdir olunmur, cəmiyyətdə müsbət qarşılanmır.
Nurlan QƏLƏNDƏRLİ

Paylaş:

Baxılıb: 602 dəfə