Meymunçiçəyi yayılır

Bakı:

26 °C

46 %

6 m/s

Əlaqə

AZ RU EN

Ana səhifə / Sosial / Meymunçiçəyi yayılır

Meymunçiçəyi yayılır

05.07.2022 [10:05]

Yoluxma halları 3 dəfə artıb

Nicat

Viruslar dövrü bitmək bilmir. Demək olar ki, hər gün ya koronavirusun yeni növlərinin, ya da tamamilə fərqli virusların yaranması ilə bağlı xəbərlərə şahidlik edirik. Koronavirus pandemiyasının təsirlərindən çıxar-çıxmaz yeni virusların, xəstəliklərin yayılması dünya əhalisini ciddi şəkildə narahat edir.

Məlum olduğu kimi, bu viruslardan biri də meymunçiçəyi virusudur. Meymunçiçəyi nadir virus infeksiyasıdır. Həmin xəstəlik insana əsasən heyvandan keçir. Yoluxanlar ilə təmasda olmuş şəxslər üçün üçhəftəlik karantin tətbiq etməyi məsləhət görürlər. Xəstəlik çox vaxt yüngül keçir və pasiyentlərin əksəriyyəti bir neçə həftə ərzində sağalır. Lakin bəzi hallarda ağırlaşmalar da baş verir. Mütəxəssislərin sözlərinə görə, yüksək hərarət, baş və əzələ ağrısı, limfa düyünlərinin şişməsi, bel ağrıları, titrətmə və yorğunluq xəstəliyin ilk simptomlarıdır. Bununla yanaşı, əvvəlcə üzdə, sonra isə bədənin digər hissələrində səpmə əmələ gələ bilər. Çiçək virusu ilə eyni ailədəndir, ona görə də xəstəliyin gedişatı da çiçək xəstəliyi ilə çox oxşardır. Xəstəlik qızdırma ilə başlayır, baş və əzələ ağrıları ilə davam edir. Qızdırmadan təxminən üç gün sonra səpgilər əmələ gələrək bədənə yayılır.

Meymunçiçəyi xəstəliyi sürətlə yayılmaqdadır. Artıq qonşu ölkələrdə də bu xəstəliyə yoluxma halları müşahidə edilir. Belə ki, ötən ay Gürcüstanda ilk yoluxma halı qeydə alınıb. Qardaş ölkə Türkiyədə 37 yaşlı bir nəfərdə meymunçiçəyi xəstəliyi aşkarlanıb. İranda isə şübhəli bilinən 9 nəfərdən analiz götürülüb. 6 nəfərdə testin nəticəsi mənfi çıxıb, lakin digər 3 nəfər barədə isə analizin cavabı çıxdıqdan sonra məlumat veriləcəyi bildirilib.

Xarici mətbuatın yazdığına görə, iyunun ortalarına qədər dünyada bu virusa 30 ölkədə 1900-a yaxın yoluxma qeydə alınıb. İlk yoluxma Britaniyada, Nigeriyadan qayıdan adamda qeydə alınıb.

Ümumdünya Səhiyyə Təşkilatı da son vaxtlar meymunçiçəyinə yoluxma hallarının artdığını açıqlayıb. Təşkilatın Avropa bölməsinin direktoru Hans Kluge yoluxma hallarının son iki həftə ərzində üç dəfə çoxaldığını bildirib.

ÜST-nin məlumatına görə, epidemiyanın episentri Avropadır. Qitədə 4500-dən çox yoluxma halı var. Bildirilib ki, xəstələrin əksəriyyəti 21-40 yaş arasındadır. Onların 99 faizi kişilərdir.

Qeyd olunub ki, xəstəliklərin sayı sürətlə artsa da, hələ də Avropada meymunçiçəyi virusundan ölən olmayıb.

Hazırda hər 10 xəstədən biri xəstəxanada müalicə olunur. Yalnız 1 nəfər reanimasiyaya aparılıb.

Sevindirici haldır ki, Azərbaycan ərazisində bu günədək meymunçiçəyi xəstəliyinə yoluxma faktı qeydə alınmayıb.

Paylaş:

Baxılıb: 702 dəfə