Vatikanın “kilsə zəngi” Yeliseydə eşidilmir...

Bakı:

15°C

82%

4m/s

Əlaqə

AZ RU EN

Ana səhifə / Xarici siyasət / Vatikanın “kilsə zəngi” Yeliseydə eşidilmir...

Vatikanın “kilsə zəngi” Yeliseydə eşidilmir...

15.11.2023 [11:40]

Və ya Fransa niyə Papanı saymır?

Bir aydan artıqdır ki, davam edən Qəzza müharibəsi on mindən çox insanın həyatına son qoyub. Ötən dövr ərzində bir sıra ölkələr tərəfləri sülhə çağırması ilə digər bir qism isə münaqişənin qızışmasını stimullaşdırmaqla yadda qaldı. Bir də din faktoru var - daima sülhə, inkişafa, təhlükəsizliyə və ən müqəddəs dəyərlərə əsaslanan din faktoru. Bəzi məqamlarda təbii hal kimi qabarma-çəkilmə ilə özünü biruzə verən, bəzi məqamlarda həlledici rol oynayan, bəzi məqamlarda isə pərdə arxasından müşahidəçiliyə üstünlük verən din amili...

Bir daha vurğulayırıq ki, din birləşdirici funksiya daşıyır, sülhü və bərabərliyi tərənnüm edir. Bu mənada, Roma Papası Fransiskin son çağırışı da birmənalı şəkildə alqışlanası haldır. Papa bəyan edir ki, “Qəzzada yaralananlara yardım göstərilməli, mülki şəxslər qorunmalıdır. Fələstinli və israilli əziyyət çəkən hər kəsin yanındayam. Bu qaranlıq anda onları qucaqlayıram və onlar üçün çox dua edirəm. Silah heç vaxt sülh gətirməz, münaqişələr yayılmamalıdır”...

Çağırışa kar qalan Paris...

Roma kilsəsinin dünyanın, xüsusilə katolik Avropanın siyasi həyatına təsirindən, hətta həlledici rolundan yəqin ki, hər kəs xəbərdardır. Bu bir tarixi ənənədir və Avopa öz addımlarında hər zaman “ənənəyə sadiqlik” nümayiş etdirir. Bir sözlə, Papa hərfi mənada “ovuc içi boyda” Vatikanın rəhbəri sayılsa da, geniş coğrafiyanın ali statusuna malikdir. Tarixin “müqəddəs imperiyaları”nın rəhbərlərinə tac taxmış papalar Qərbin siyasi inkişafında xüsusi rol alıblar. Hətta tarixi düşmənçiliyi barışa çevirənlər, on illərlə davam edən müharibələri sonlandıran və ya əksinə görməzdən gələn, susmağa üstünlük verən, xala-xətrin qalmasın deyə “bəyanatlar” verən din xadimlərini tarix az görməyib.

Papa Fransiskin narahatlığı başadüşülən və təbiidir - ülvi, bəşəri dəyərləri özündə birləşdirən din adından çıxış və çağırış edir. “Silah sülh gətirməz” deyə bütün dünyaya car çəkir. Vatikandan Qəzzaya uzanan 4 min kilometrdən artıq məsafəyə məsləhət verir Papa Fransisk - bir daha vurğulayırıq ki, həqiqətən də silahların susmasına, dinc və günahsız insanların qətlinə son verilməsinə yönəlik bu səmimi çağırış yüksək qiymətləndirilməlidir...

Silahlar sülh gətirmir - ölüm, bəla, müharibə, qan-qada gətirir. Dünyanın bütün nöqtələrində baş verən qarşıdurmalarda eyni motiv hökm sürür - silahlar dünyanın hər yerində ölüm saçır. Qəzzada da, Cənubi Qafqazda da...

Cənubi Qafqazı təsadüfən xatırlatmadıq. Papanın Vatikanından 4 min kilometr uzaqda yerləşən Qəzzaya edilən bu çağırış cəmisi min kilometrdən bir az artıq məsafədə “dayanan” “Yelisey” sarayına da edilə bilər. Ermənistanı silahlandıran Fransa da nahaq qanın tökülməsinə rəvac verir, münaqişəni qızışdırır, müharibə təşviq edir. Görəsən, Papanın etdiyi çağırış yalnız Qəzzayamı aiddir, yoxsa bundan təcavüzkarı stimullaşdıran Fransaya da pay düşür?

Fransa dinc insanları hədəfə alır...

Düzdür, Papa öz çağırışında Parisin adını çəkmir, onları silahlandırmadan çəkindirmir. Bəlkə də bu çağırış Qəzzaya yönəlik spesifik bir çağırışdır. Bəlkə də digər regionlar hələ o qədər də “təsirli ölümlərə” məruz qalmayıb. Amma yaxşı olmazdımı ki, Papa bu çağırışları ünvanlarına silahlar doldurulana qədər - mərmi silahın lüləsindən çıxana qədər desin. Bunun qarşısını alsın. Məsələn, Ermənistan 30 ilə yaxın Azərbaycana qarşı təcavüzkar siyasət yürütdü, torpaqlarını işğalda saxladı, bir milyona yaxın insanını qaçqın və məcburi didərgin etdi, vətəndaşın öz evində yaşamaq hüququnu əlindən aldı, minlərlə insanın qanını tökdü, Xocalıda əsrin soyqırımını həyata keçirdi... 2020-ci ildə ədalət öz yerini tapdı və işğal faktı bitdi - Azərbaycan qisasçılıq etmədi və Ermənistan ordusunun əsgərlərinə qarşı belə humanist davranış sərgilədi. Halbuki II Qarabağ döyüşləri zamanı Ermənistan dinc vətəndaşlarımızı Gəncədə, Bərdədə, Tərtərdə xain raket hücumuna məruz qoymuşdu. Bu gün Fransa yenidən Ermənistanı silahlandırır - yenidən dinc sakinlər hədəfə çevrilsin, yenidən günaşsız insanlar hədəf alınsın deyə... Papa niyə Fransanı bu çirkin niyyətindən daşındırmır? Axı, ortada müzakirə mövzusu olan insan həyatıdır...

P.S Bəlkə də Fransa Papanın çağırışını eşidir, amma qulaqardına vurur. Bəlkə də özünün elə Papadan qisasını alır. 1572-ci ilin o dəhşətli “Varfolomey gecəsi”nin qisası ilə Papanın çağırışına laqeydlik nümayiş etdirir. Axı, dövrünün Roma Papası XIII Qriqori bu məsələdən “şad olmuşdusa belə”, 425 il sonra Roma Papası II İoann Pavel rəsmi şəkildə Varfolomey qətliamını qınamışdı...

P.SADAYOĞLU

Paylaş:

Baxılıb: 783 dəfə