Zərifə Əliyevanın anadan olmasının 101-ci ildönümünə həsr olunmuş elmi-praktik konfrans keçirilib

Bakı:

22 °C

64 %

3 m/s

AZ RU EN

Ana səhifə / YAP xəbərləri / Zərifə Əliyevanın anadan olmasının 101-ci ildönümünə həsr olunmuş elmi-praktik konfrans keçirilib

Zərifə Əliyevanın anadan olmasının 101-ci ildönümünə həsr olunmuş elmi-praktik konfrans keçirilib

24.04.2024 [20:39]

24 aprel 2024-cü il tarixdə Heydər Əliyev mərkəzində Samux rayon icra hakimiyyətinin, YAP Samux rayon təşkilatının və Samux rayon Mərkəzi Xəstəxanasının birgə təşkilatçılığı ilə görkəmli oftalmoloq alim, akademik Zərifə xanım Əliyevanın anadan olmasının 101-ci ildönümünə həsr olunmuş elmi-praktik konfrans keçirildi.

Tədbirdə Samux rayon İcra Hakimiyyətinin başçısı Firdovsi Əliyev, YAP Samux rayon təşkilatının sədri Gündüz Bayramov, Mərkəzi Rayon Xəstəxananın baş həkimi Loğman Hacıbədəlli, YAP Samux rayon təşkilatının partiya fəalları, idarə və müəssisələrin rəhbərləri, tibb işçiləri və ictimaiyyət nümayəndələri iştirak edirdilər.

Tədbir iştirakçıları əvvəlcə Ümummilli lider Heydər Əliyevin abidəsini ziyarət edib, önünə gül dəstələri düzərək Ulu Öndərə hörmət və ehtiramlarını bildirdilər.

Tədbirdə Zərifə xanımın həyat yoluna həsr olunmuş videoçarx nümayiş olundu.

Tədbiri giriş nitqi ilə açan Samux rayon İcra Hakimiyyətinin başçısı Firdovsi Əliyev Ümummilli lider Heydər Əliyevin vəfalı ömür-gün yoldaşı, mehriban ana, qayğıkeş həkim, intellektual keyfiyyətləri özündə birləşdirən ziyalı, dünya tibb elminə əvəzolunmaz töhfələr vermiş böyük oftalmoloq alim, akademik Zərifə xanım Əliyevanın ölkə səhiyyəsinin inkişafında gördüyü işlərdən, eləcə də onun insani keyfiyyətlərindən danışdı. Dövrün zəngin ədəbi mühitində boya-başa çatmış Zərifə xanımın Azərbaycan ziyalısının ən gözəl nümunələrini təcəssüm etdirdiyini, Azərbaycan xanımına xas olan bütün müsbət keyfiyyətləri özündə birləşdirdiyini bildirdi. Gənc alim və müəllimlərin, həkim oftalmoloqların yetişməsində, çoxsaylı elmi tədqiqatların, məqalə və monoqrafiyaların hazırlanmasında böyük xidmətləri olduğunu qeyd etdi.

Daha sonra tədbirdə iştirak edən Mərkəzi Rayon Xəstəxanasının baş həkimi oftalmoloq Loğman Hacıbədəlli geniş məruzə ilə çıxış edərək Zərifə xanımın həyat və fəaliyyətindən danışdı. Qeyd etdi ki, Zərifə xanım Əliyeva qayğıkeş ana, vəfalı ömür-gün yoldaşı, işini mükəmməl bilən həkim idi. O, Ümummilli Lider Heydər Əliyevin həyat yoldaşı, iki əsrlik münaqişəni və 30 illik savaşı cəmi 44 günə Zəfərlə bitirən, dünya miqyaslı siyasi lider olan, tarixin ən qüdrətli Azərbaycanını yaratmış Müzəffər Ali Baş Komandanı böyütmüş fədakar, qayğıkeş ana idi. Onun ömür yolu elmi fəaliyyəti uğurlarla zəngindir.

Tədbirdə YAP Samux rayon təşkilatının sədri Gündüz Bayramov çıxış edərək bildirdi ki, hər bir xalqın tarixində, elmində mühüm rol oynamış şəxsiyyətlər vardır ki, illər keçdikcə onlar nəinki unudulur, əksinə daha böyük hörmət və ehtiramla yad olunur, həyatı, yaradıcılığı və elmi irsi müasir insanlar tərəfindən diqətlə araşdırılır və öyrənilir. Belə şəxsiyyətlərdən biri Azərbaycanın tibb elmində və ictimai-siyasi həyatında böyük yeri olan və bu gün anadan olmasının 101-ci il dönümünə toplaşdığımız görkəmli oftalmoloq, akademik Zərifə xanım Əliyevadır. Zərifə xanım Əliyeva təkcə elmi fəaliyyəti ilə deyil, ictimai-siyasi həyatdakı fəal mövqeyi, eləcə də qayğıkeş insan, layiqli həyat yoldaşı və əsil azərbaycanlı anası kimi də tariximizə düşmüşdür.

Daha sonra tədbirdə çıxış edənlər Məsud Vəliyev, Nüranə Həsənova, Səadət Əkbərova Azərbaycan xalqının görkəmli simalarından olan Zərifə xanım Əliyevanın ölkə səhiyyəsinin inkişafında gördüyü işlərdən, eləcə də onun insani keyfiyyətlərindən danışdılar. Onun şərəfli ömür yolunun hər bir Azərbaycan vətəndaşı, hər bir alim və həkim üçün həyat və mənəviyyat dərsi, kamillik və müdriklik məktəbi olduğunu söylədilər.

Tədbirin sonunda Samux rayon səhiyyəsində fərqlənən bir qrup tibb işçisinə rayon rəhbərliyi tərəfindən fəxri fərmanlar təqdim olundu, sonra tibb işçiləri ilə xatirə şəkli çəkildi.

Paylaş:

Baxılıb: 688 dəfə