Azərbaycan etibarlı tərəfdaşdır

Bakı:

26 °C

78 %

11 m/s

Əlaqə

AZ RU EN

Ana səhifə / YAP xəbərləri / Azərbaycan etibarlı tərəfdaşdır

Azərbaycan etibarlı tərəfdaşdır

05.07.2024 [16:57]

“Azərbaycan ikinci dəfədir ki, ŞƏT-in Zirvə toplantısına dəvət olunur. Biz bunu Azərbaycan ilə üzv dövlətlər arasında inkişaf edən tərəfdaşlığın göstəricisi kimi qiymətləndiririk”. Bu fikri Prezident İlham Əliyev iyulun 4-də Qazaxıstanın paytaxtı Astana şəhərində “ŞƏT plyus” formatında keçirilən görüşdə çıxışı zamanı bildirib.

Dövlətimizin başçısı çıxışında Azərbaycan həqiqətlərindən, ölkəmizin ŞƏT-ə üzv dövlətlər arasındakı münasibətindən, 2019-2023-cü illərdə Qoşulmama Hərəkatına uğurla sədrlik etməsindən, COP29-un əhəmiyyətindən bəhs edib, digər mühüm məsələlərə də toxunub.

Prezident İlham Əliyev Şərq-Qərb və Şimal-Cənub nəqliyyat dəhlizləri üzrə qarşılıqlı fəaliyyət Azərbaycan ilə ŞƏT-ə üzv dövlətlər arasında əməkdaşlığın vacib sahəsini təşkil etdiyini bildirib. Dövlət başçısı onu da qeyd edib ki, coğrafi mövqeyi və nəqliyyat infrastrukturuna qoyulmuş böyük sərmayələr Azərbaycana Avrasiyanın nəqliyyat-logistika qovşaqlarından birinə çevrilmək imkanı verib.

“Orta Dəhlizin tərkib hissəsi olan Bakı-Tbilisi-Qars dəmir yolunun illik ötürücülük qabiliyyəti Azərbaycanın sərmayələri hesabına 1 milyon tondan 5 milyon tona qədər artıb”- deyən dövlət başçısı ölkəmizin Ələt Beynəlxalq Dəniz Ticarət Limanının illik ötürücülük qabiliyyətini ildə 15 milyon tondan 25 milyon tona qədər artırmaq niyyətində olduğunu diqqətə çatdırıb.

Prezident İlham Əliyev çıxışında ölkəmizin, həmçinin Şimal-Cənub nəqliyyat dəhlizinin inkişafında mühüm rol oynadığını, dəhlizin Azərbaycan seqmentinin dəmir yolu və avtomobil infrastrukturu hazır olduğunu və uğurla fəaliyyət göstərdiyini, hazırda dəmir yolu daşımalarının həcminin ildə 15 milyon tona qədər artırılması üzərində işlənildiyini, sonradan zərurət yaranarsa, bu rəqəmin 30 milyon tona çatdırılacağını söyləyib.

2023-cü ilin sentyabrında ölkəmiz beynəlxalq səviyyədə tanınmış əraziləri üzərində suverenliyini tam bərpa etdiyini vurğulayan dövlət başçısı bununla da beynəlxalq hüquq və tarixi ədalətin bərpa olunduğunu, Azərbaycan Ermənistanın otuzillik işğalına son qoyduğunu və BMT Təhlükəsizlik Şurasının otuz il kağız üzərində qalmış 4 qətnaməsinin icrasını hərbi-siyasi vasitələrlə təmin etdiyini bildirib.

İqlim dəyişikliyinin mənfi təsiri səbəbindən ekzistensial təhlükə ilə üzləşən inkişaf etməkdə olan kiçik ada dövlətlərinə dəstək Azərbaycanın prioritetləri sırasında yer aldığını vurğulayan Prezident İlham Əliyev bildirib ki, ölkəmiz inkişaf etməkdə olan kiçik ada dövlətləri üçün xüsusi texniki yardım fondunun yaradılması təşəbbüsü ilə çıxış edib.

Ölkə başçısı təxminən 200 ölkənin yekdil dəstəyi ilə Azərbaycanın bu il COP29-a ev sahibliyi edəcəyini diqqətə çatdırıb. Prezident İlham Əliyev onu da qeyd edib ki, Azərbaycan Bakıda keçiriləcək COP29 çərçivəsində inkişaf etmiş və inkişaf etməkdə olan ölkələr arasında körpü yaratmaq üçün səylərini əsirgəməyəcək və inkişaf etməkdə olan ölkələrin legitim maraqlarını nəzərə alacaq razılaşmanın əldə edilməsinə çalışacaq.

Sahib Şükürov

Yeni Azərbaycan Partiyası Göyçay rayon təşkilatının sədri

Paylaş:

Baxılıb: 719 dəfə