Müstəqil, prinsipial xarici siyasət

Bakı:

23 °C

60 %

6 m/s

Əlaqə

AZ RU EN

Ana səhifə / YAP xəbərləri / Müstəqil, prinsipial xarici siyasət

Müstəqil, prinsipial xarici siyasət

25.09.2024 [14:24]

Tarixi Zəfər qazanmış Azərbaycan sərbəst xarici siyasət yürütmək gücünə malikdir. Müstəqil, prinsipial xarici siyasət ölkəmizin əsas istiqamətidir. Azərbaycan öz haqq işi uğrunda mübarizə aparıb və bundan sonra da aparacaq. Ölkəmiz heç kimin işinə qarışmır, eyni zamanda, ölkəmizin işinə qarışmaq istəyənlərə də hər dəfə dərs verilir. Azərbaycan çoxdan özünü ləyaqətli və qürurlu dövlət kimi təsdiqləyib. Xüsusilə, tarixi Zəfərimizdən sonra ölkəmizin beynəlxalq nüfuzu bir neçə dəfə artıb, beynəlxalq mövqeləri möhkəmlənib.

VII çağırış Azərbaycan Respublikası Milli Məclisinin ilk iclasında Prezident İlham Əliyev çıxışı zamanı ölkəmizin beynəlxalq münasibətləri mövzusunda fikir bildirərkən də qeyd etdi ki, bütün qitələrdə dostlarımızın sayı artır. Kim ölkəmizlə ikitərəfli formatda, qarşılıqlı hörmət əsasında əməkdaşlıq etmək istəyirsə, Azərbaycan ikiqat əməkdaşlıq edəcək. Amma əgər kimsə hesab edirsə ki, gəlib Azərbaycana nəsə diktə edəcək, yaxud da ki, ölkəmizi əsassız olaraq ittiham edəcək, ya da ki, hansısa vasitələrlə Azərbaycanı qaralayacaq və sanki heç nə olmamış kimi bu ölkələrlə biz dostluq edəcəyik, bu, səhv təsəvvürdür, bu, olmayacaq. Ölkə başçısı bundan sonra da xarici siyasətdə geriyə heç bir addımın olmayacağını bəyan etdi. Ölkəmiz İkinci Qarabağ müharibəsindən və suverenliyini bərpa edəndən sonra daha fəal xarici siyasət aparacaq. Ölkəmizin vaxtilə mövcud olmadığı bölgələrlə indi çox ciddi təmaslar qurulur, həm sərmayə qoyuluşu layihələri nəzərdən keçirilir, eyni zamanda, müxtəlif sahələrdə əməkdaşlıq üçün yeni imkanlar yaranır. Təbii olaraq, ölkəmizin ənənəvi tərəfdaşlarla, dostlarla münasibətləri daha da inkişaf edir və edəcək.

Prezident İlham Əliyev VII çağırış Azərbaycan Respublikası Milli Məclisinin ilk iclasında çıxış edərkən hər cəhdlə Sülh müqaviləsini imzalamaqdan yayınmağa çalışan Ermənistana da ciddi xəbəradlıqlar etdi. Ölkə başçısı vurğuladı ki, əgər Ermənistan bu coğrafiyada təhlükəsizlik şəraitində yaşamaq istəyirsə, öz qonşularına qarşı siyasətində ciddi düzəlişlər etməlidir. Həmçinin nə onlar, nə onların arxasında duranlar 30 illik işğalı heç vaxt unutmamalıdırlar. İkinci Qarabağ müharibəsinin nəticələrini unutmamalıdırlar. Ordusu darmadağın edilmiş Ermənistan kapitulyasiya aktı imzalayan ölkədir. Ermənistanı silahlandıranlar bilməlidirlər ki, bütün gələcək hadisələrə birbaşa onlar cavabdehlik daşıyacaqlar və təbii olaraq, bizə qarşı rəsmi ərazi iddialarına son qoyulmalıdır. Onların konstitusiyasına dəyişiklik edilməlidir, Minsk qrupu da ləğv olunmalıdır.

Prezident İlham Əliyev sərhədimizdə qanunsuz olaraq dırnaqarası “Avropa sülh” “müşahidəçi” missiyası yaradıldığını xatırladaraq bunun əldə edilmiş razılaşmanın pozulması olduğunu bildirdi. 2022-ci ilin Praqa görüşündə razılıq əldə edilmişdir ki, Ermənistan tərəfində şərti sərhəd istiqamətində 2-3 aylıq kiçik sayda müşahidəçi missiya yerləşsin. Amma sonra Azərbaycanın iştirakı olmadan müddəti uzatdılar, onların sayını artırdılar, oraya Kanadadan nümayəndələr daxil edildi və faktiki olaraq bu missiya NATO missiyasıdır. Ondan sonra ölkəmizə qarşı “Binokl diplomatiyası” siyasəti aparılırdı.

Ölkə başçısı bəyan etdi ki, Azərbaycana heç bir vasitəçi lazım deyil, baxmayaraq ki, ölkəmiz bəzi vasitəçilik təkliflərinə siyasi nəzakət naminə etiraz etmir. Bir halda ki, Ermənistanla dövlət sərhədinin delimitasiyası vasitəçilərsiz edildi. Hazırda Ermənistanın vaxt uzatma taktikası və digər məqamlar deməyə əsas verir ki, bu ölkə əslində, sülh istəmir. Ermənistanla normallaşma əgər onlara lazım deyilsə, deməli, bu olmayacaq. Biz hər halda Azərbaycan öz mövqeyindən bir addım da geri atmayacaq.

Əlişah Rəcəbov,

YAP Ağdaş rayon təşkilatının sədri

Paylaş:

Baxılıb: 585 dəfə