Azərbaycan və Özbəkistan münasibətlərində yeni mərhələ

Bakı:

12°C

94%

2m/s

Əlaqə

AZ RU EN

Ana səhifə / YAP xəbərləri / Azərbaycan və Özbəkistan münasibətlərində yeni mərhələ

Azərbaycan və Özbəkistan münasibətlərində yeni mərhələ

04.07.2025 [23:29]

Bəzən bir günün içində tarix yazılır. Elə iyulun 2-də Bakıda baş tutan Azərbaycan və Özbəkistan prezidentlərinin mətbuata bəyanatları da məhz bu qəbildəndir – illərin, onilliklərin, hətta əsrlərin qardaşlıq bağlarını strateji müttəfiqliyin zirvəsinə qaldıran bir görüş. Cənab Prezident İlham Əliyevin də vurğuladığı kimi: “Bu gün Özbəkistan və Azərbaycan münasibətlərinin tarixində əlamətdar gündür. Özbəkistan Prezidentinin dövlət səfəri layiqincə, qardaşlıq və qarşılıqlı anlaşma ab-havasında keçir. Bu gün biz həm ikitərəfli görüş, həm də Dövlətlərarası Şuranın iclası çərçivəsində ikitərəfli qarşılıqlı fəaliyyət məsələlərinin geniş spektrini müzakirə etdik, münasibətlərimizin strateji, müttəfiqlik xarakterini bir daha təsdiqlədik. Keçən il Daşkənddə Müttəfiqlik münasibətləri haqqında Müqavilə imzaladıq. Bu, istənilən ölkələrin münasibətlərində ən yüksək və əhəmiyyətli sənəddir. Biz artıq bir ildir ki, rəsmi müttəfiqik və bunu beynəlxalq arenada fəal qarşılıqlı fəaliyyətlə, qarşılıqlı dəstəklə, həmçinin bir çox sahədə həyata keçirdiyimiz konkret plan və layihələrlə nümayiş etdiririk.” Azərbaycan və Özbəkistanı yalnız coğrafiya və iqtisadi maraqlar yox, ortaq tarix, türklük kimliyi, din, dil, mədəniyyət bağlayır. Bu dostluğun kökləri qədim İpək Yolunun ticarət karvanlarında, klassik şeirimizdə, memarlığımızda, musiqimizdə yaşayır. Amma bu gün münasibətlərin yükü yalnız nostalji xatirələrlə daşınmır – indi onu konkret sənədlər, investisiya layihələri, birgə fondlar, məktəblər və mədəni parklar möhkəmləndirir. Tarixi fakt budur ki, ötən il Daşkənddə imzalanmış “Müttəfiqlik münasibətləri haqqında Müqavilə” münasibətlərin məzmununu daha da dərinləşdirdi. Prezident Əliyevin sözləri ilə desək, "Bu, istənilən ölkələrin münasibətlərində ən yüksək və əhəmiyyətli sənəddir." Və indi, cəmi bir il sonra bu müttəfiqliyin real nəticələri artıq görünür: iqtisadiyyat, mədəniyyət, təhsil, logistika və turizm sahələrində konkret addımlar atılıb. Bu görüşün ən yaddaqalan hadisələrindən biri Özbəkistanın Bakının mərkəzində, şəhərin diplomatik ruhunu daşıyan qəlbində yeni səfirlik binasının açılması idi. Həmin torpaq sahəsi vaxtilə Ulu Öndər Heydər Əliyev tərəfindən qardaş ölkəyə ayrılıb. Uzun müddət istifadəsiz qalan bu ərazi indi iki xalqın dostluğunun ən canlı rəmzlərindən birinə çevrilib. Prezident Əliyev çox təsirli bir detalı xatırlatdı: "Mənə dəfələrlə dedilər ki, görürsünüz, Özbəkistan səfirlik tikmir, yer yaxşıdır. Deyirdim, bütün layihələri yığışdırın, atam bu yeri qardaş ölkəyə verib." Bakı yalnız yeni səfirlik binası ilə yox, həm də böyük mədəni layihə ilə zənginləşəcək: “Ağ şəhər” layihəsinin tam mərkəzində “Özbəkistan parkı” yaradılacaq. Bu park təkcə yaşıllıq zolağı deyil, Bakının ürəyində Daşkəndin nəfəsi, Səmərqəndin rəngi, Buxaranın ab-havasıdır. Prezident İlham Əliyev zarafatla dedi ki, "Bəlkə də mənfi cəhət o olacaq ki, xarici turist Bakıya gəlib bu parka gedirsə, sonra Özbəkistana getməyə bilər." Bu zarafatın arxasında dərin həqiqət var – mədəni diplomatiya sərhədləri yumşaldır, dostluğu gücləndirir. Tarixi hadisələr, böyük layihələr, birgə fondlar yalnız liderlərin imzaladığı kağızlarda qalmamalıdır.Cənab Prezident İlham Əliyev də bunu açıq dedi: “Biz hökumət üzvlərinə tapşırıq verdik ki, öz işlərini ləyaqətlə yerinə yetirsinlər. Bilsinlər ki, biz mütəmadi olaraq monitorinq aparıb yoxlayacağıq, bunu da edirik. Səfərlər müntəzəmdir, həm də biz beynəlxalq təşkilatlar, sammitlər və digər konfranslar çərçivəsində tez-tez görüşürük. Tez-tez telefonla əlaqə saxlayırıq, ona görə də hamı bilir ki, bütün göstərişlər yerinə yetirilməlidir”. Bu, dostluğun arxasında məsuliyyət, strateji baxış və gələcəyə xidmət edən konkret fəaliyyətin dayanmasının göstəricisidir. Nəticədə, iyulun 2-dəki görüş bir daha təsdiqlədi ki, Azərbaycan və Özbəkistan münasibətləri yalnız tarixdə deyil, bu günkü konkret layihələrdə, sabahkı planlarda, gənclərin təhsil aldığı məktəblərdə, Bakının parklarında və beynəlxalq platformalarda davam edən, dayanıqlı bir qardaşlıqdır. Beləliklə, qardaşlıqdan strateji müttəfiqliyə gedən yol yalnız siyasi diplomatiya deyil, həm də səmimi duyğular, ortaq mədəniyyət və konkret nəticələr yoludur. Bu yol isə hələ uzun illər davam edəcək.

Rüstəm Nağıyev,

YAP Gədəbəy rayon təşkilatının sədri

Paylaş:

Baxılıb: 187 dəfə