Milli mətbuatın inkişafına yönəlmiş mühüm təşəbbüslər

Bakı:

23 °C

72 %

12 m/s

Əlaqə

AZ RU EN

Ana səhifə / YAP xəbərləri / Milli mətbuatın inkişafına yönəlmiş mühüm təşəbbüslər

Milli mətbuatın inkişafına yönəlmiş mühüm təşəbbüslər

18.07.2025 [12:40]

Milli mətbuat hər bir xalqın mənəvi sərvəti, milli kimliyinin daşıyıcısı və ictimai rəyin formalaşmasında əsas vasitədir. Azərbaycanda mətbuatın yaranması Həsən bəy Zərdabinin 1875-ci ildə nəşr etdirdiyi "Əkinçi" qəzetindən başlayır. Bu tarixi hadisə ilə əsasını qoyduğumuz milli mətbuat, ötən dövrlər ərzində müxtəlif inkişaf mərhələlərindən keçmiş və bu gün müstəqil medianın formalaşması istiqamətində bir sıra mühüm təşəbbüslərlə dəstəklənmişdir. Mətbuatın inkişafı üçün ilk növbədə hüquqi mühitin yaradılması vacibdir. Azərbaycan Respublikasının Konstitusiyasında söz və mətbuat azadlığı dövlət tərəfindən təmin edilir. "Kütləvi informasiya vasitələri haqqında" qanun və digər normativ aktlar jurnalistlərin hüquqlarını qorumaqla yanaşı, medianın fəaliyyətini də tənzimləyir. 1998-ci ildə senzuranın ləğv olunması isə söz azadlığının inkişafında dönüş nöqtəsi olmuşdur. 2021-ci ildə Prezident İlham Əliyevin sərəncamı ilə yaradılan Medianın İnkişafı Agentliyi milli mətbuatın sistemli və davamlı inkişafını hədəfləyən əsas təşəbbüslərdən biridir. Agentlik informasiya mühitinin sağlamlaşdırılması, jurnalistlərin peşəkarlığının artırılması və media subyektlərinin maliyyə dayanıqlığının gücləndirilməsi kimi mühüm istiqamətlərdə fəaliyyət göstərir. Dövlət jurnalistlərin sosial rifahının yaxşılaşdırılması üçün də müxtəlif addımlar atmışdır. Prezidentin sərəncamı ilə jurnalistlər üçün mənzillərin verilməsi, peşə bayramlarında mükafatlandırma tədbirləri və müxtəlif sosial layihələr bu sahədə atılan mühüm addımlardandır. Eyni zamanda, peşəkar jurnalistikanın inkişafı üçün yerli və beynəlxalq təlim proqramları təşkil olunur, gənc jurnalistlərin hazırlığına xüsusi önəm verilir. Müasir dövrdə mətbuatın inkişafı rəqəmsallaşma ilə sıx bağlıdır. Bu sahədə dövlət tərəfindən texnoloji infrastrukturun təkmilləşdirilməsi, onlayn media orqanlarına hüquqi status verilməsi və rəqəmsal təhlükəsizliyin təmin olunması üçün müvafiq mexanizmlər yaradılır. Eyni zamanda, media qurumlarının onlayn platformalarda dayanıqlı və keyfiyyətli kontent istehsal etməsi üçün dəstək tədbirləri həyata keçirilir. Milli mətbuatın inkişafı yalnız jurnalistlərin fəaliyyəti ilə deyil, həm də dövlətin sistemli dəstəyi və ictimaiyyətin informasiya ehtiyaclarının düzgün qarşılanması ilə mümkündür. Azərbaycanda bu istiqamətdə atılan addımlar milli mətbuatın həm keyfiyyət, həm də kəmiyyət baxımından inkişafına töhfə verir. Gələcəkdə də bu təşəbbüslərin davamlılığı ölkəmizdə demokratik və şəffaf informasiya məkanının formalaşmasına xidmət edəcək.

Nicat Quliyev,

Yeni Azərbaycan Partiyası Laçın rayon təşkilatının məsləhətçisi

Paylaş:

Baxılıb: 425 dəfə