Müstəqillik və suverenlik xalqın milli kimliyini, tarixi varlığını təsdiqləyən dəyərlərdir

Bakı:

25 °C

56 %

4 m/s

Əlaqə

AZ RU EN

Ana səhifə / YAP xəbərləri / Müstəqillik və suverenlik xalqın milli kimliyini, tarixi varlığını təsdiqləyən dəyərlərdir

Müstəqillik və suverenlik xalqın milli kimliyini, tarixi varlığını təsdiqləyən dəyərlərdir

19.09.2025 [18:00]

Azərbaycan xalqının tarixində suverenlik ideyası sadəcə hüquqi-siyasi məfhum deyil, milli kimliyimizin, varlığımızın və gələcək nəsillərə qoyduğumuz ən böyük mirasın təməl daşıdır. 20 sentyabr tarixində təsis edilən Dövlət Suverenliyi Günü isə xalqımızın yüzilliklər boyu apardığı mübarizənin və müstəqillik arzularının qələbə ilə nəticələndiyi ən uca mərhələdir. Azərbaycan Respublikasının Prezidenti, Müzəffər Ali Baş Komandan cənab İlham Əliyevin uzaqgörən və qətiyyətli siyasəti nəticəsində bu gün ölkəmiz dünya birliyində öz sözünü deyən, regionun siyasi, iqtisadi və hərbi reallıqlarını müəyyən edən aparıcı gücə çevrilmişdir. Cənab Prezidentin 2024-cü il 19 sentyabr tarixli Sərəncamı ilə Dövlət Suverenliyi Gününün təsis edilməsi dövlətçilik tariximizdə yeni bir səhifə açdı. Bu, təkcə rəmzi addım deyil, həm də 44 günlük Vətən müharibəsində və 2023-cü ilin antiterror əməliyyatında əldə etdiyimiz tarixi zəfərlərin əbədiləşdirilməsi deməkdir. Əgər tarixə nəzər salsaq, xalqımızın iradəsini sınamaq üçün işğallar, soyqırımlar, etnik təmizləmələr, uzun illər davam edən beynəlxalq ədalətsizliklər olmuşdur. Lakin heç bir güc Azərbaycan xalqının müstəqillik və dövlətçilik əzmini sarsıda bilməmişdir. Bu gün isə həmin milli iradənin simvolu məhz güclü Azərbaycan dövlətidir. Bu dövlətin mövcudluğu, davamlılığı və inkişafı cənab Prezident İlham Əliyevin müdrik rəhbərliyi ilə təmin olunmuşdur.

44 günlük Vətən müharibəsində əldə olunan Zəfər, ardınca Laçın sərhəd-buraxılış məntəqəsinin yaradılması və 2023-cü ilin qətiyyətli antiterror əməliyyatı Azərbaycanın suverenliyini bərpa etməklə yanaşı, beynəlxalq hüququn reallıqlar üzərində qurulmasının ən bariz nümunəsinə çevrildi. Bu uğurlar Ali Baş Komandanın dəmir iradəsinin, Azərbaycan Ordusunun qəhrəmanlığının və xalqımızın birliyinin təntənəsidir. Məhz buna görə də 2025-ci ilin “Konstitusiya və Suverenlik İli” elan olunması xüsusi tarixi-siyasi məna daşıyır. Bu qərar göstərir ki, Azərbaycan yalnız hərbi və siyasi sahədə deyil, həm də hüquqi-institusional əsaslarda dövlətçiliyini möhkəmləndirir, dünyaya milli kimliyini daha aydın və güclü şəkildə təqdim edir. Konstitusiya və suverenlik bir-birini tamamlayan iki sütun kimi müasir Azərbaycanın dövlət modelini daha da gücləndirir. Cənab Prezident İlham Əliyev bu gün sadəcə dövlət başçısı deyil, həm də yeni Azərbaycan tarixinin memarı, milli iradəmizin simvolu, qalib lider obrazıdır. Onun qətiyyəti nəticəsində Azərbaycan xalqı yalnız öz torpaqlarına sahib çıxmadı, həm də regionda yeni siyasi reallıq yaratdı. Azərbaycanın tam suverenliyi artıq reallıqdır. Sərhədlərimiz toxunulmazdır, dövlətimiz güclüdür, xalqımız öz taleyinin sahibidir. Bu isə ölkə rəhbərliyinin uzaqgörən siyasəti, müzəffər ordumuzun qüdrəti və xalq-dövlət birliyinin möhtəşəm nəticəsidir.

Antiterror tədbirləri yalnız hərbi müstəvidə deyil, siyasi planda da Azərbaycanın mövqeyini gücləndirdi. Regionda sülhün bərqərar olunması üçün əsas şərt separatizmə son qoyulması idi və bu istiqamətdə atılan addımlar dövlətin iradəsini təsdiqlədi. Bu, suverenliyin sadəcə hüquqi anlayış yox, həm də praktiki reallıq olduğunu göstərdi. Sentyabrın 20-si artıq həm iqtisadi, həm də milli təhlükəsizlik baxımından bir dönüş nöqtəsi kimi yadda qalır. Enerji resurslarından başlayan müstəqillik yolu torpaqların azad olunması ilə tamamlandı. Bu gün dövlətçilik iradəsinin, azadlıq uğrunda mübarizənin rəmzinə çevrilib. Azərbaycan xalqı üçün bu tarix bir bayram olmaqla yanaşı, həm də gələcək nəsillərə mesajdır. Yəni, suverenliyi qorumaq hər kəsin borcudur. İqtisadi inkişaf, ərazi bütövlüyü və milli birliyin sintezində formalaşan bu gün, tarixi yaddaşın mühüm parçası olaraq daim yaşayacaq. Bu gün hər bir azərbaycanlı fəxrlə deyə bilər ki, Azərbaycan suveren, güclü və qalib dövlətdir.

Zaur Mehdiyev,

YAP Gədəbəy rayon təşkilatının sədr müavini

Paylaş:

Baxılıb: 395 dəfə