Dövlət Suverenliyi Günü – Müstəqil Azərbaycanın qürur günü

Bakı:

12 °C

76 %

5 m/s

Əlaqə

AZ RU EN

Ana səhifə / YAP xəbərləri / Dövlət Suverenliyi Günü – Müstəqil Azərbaycanın qürur günü

Dövlət Suverenliyi Günü – Müstəqil Azərbaycanın qürur günü

19.09.2025 [20:10]

Azərbaycan Respublikasında Dövlət Suverenliyi Gününün təsis olunması ilə bağlı 19 sentyabr 2024-cü il tarixli Prezident Sərəncamı xalqımızın milli yaddaşında əbədi qalacaq mühüm hadisədir.

Bu günün rəsmiləşdirilməsi təkcə təqvimə yeni bir bayramın əlavə olunması deyil, həm də Azərbaycan xalqının tarixi varlığının, milli kimliyinin və dövlətçilik əzminin təntənəsidir.

Suverenlik anlayışı hər bir xalq üçün öz taleyinə sahib çıxmaq, müstəqil dövlət qurmaq və onu inkişaf etdirmək iradəsinin ali ifadəsidir. Azərbaycan xalqı tarix boyu işğallar, müstəmləkə siyasəti və çətinliklərlə üzləşsə də, heç zaman müstəqillik arzusundan vaz keçməmiş, bu ideyanı nəsildən-nəslə ötürərək milli şüurunun əsas dayağına çevirmişdir.

Bu gün müstəqil Azərbaycan dövləti mövcuddur və onun varlığı şəhidlərimizin qanı, igid əsgər və zabitlərimizin qəhrəmanlığı sayəsində qorunub saxlanmışdır.

1918-ci ildə yaradılan Azərbaycan Xalq Cümhuriyyəti müsəlman Şərqində ilk demokratik respublika olmaqla xalqımızın milli iradəsinin bariz nümunəsi idi. Hərçənd ki, Cümhuriyyətin ömrü cəmi 23 ay oldu, lakin onun qoyduğu dövlətçilik ənənələri xalqın şüurunda dərin iz buraxdı.

Sovet dövründə də müstəqillik ideyası xalqımızın qəlbində yaşamağa davam etdi və nəhayət, 1991-ci ildə Azərbaycanın dövlət müstəqilliyi bərpa olundu. Bu, tarixi nailiyyət idi. Lakin müstəqilliyin qorunması, möhkəmləndirilməsi və inkişafı daha mürəkkəb mərhələləri ehtiva edirdi.

1990-cı illərdə Azərbaycan ağır siyasi və iqtisadi böhranla, eləcə də Ermənistanın təcavüzü ilə üz-üzə qaldı. Torpaqlarımızın 20 faizinin işğalı və yüz minlərlə soydaşımızın didərgin düşməsi xalqımızın tarixinə acı bir səhifə kimi yazıldı.

Ulu Öndər Heydər Əliyevin hakimiyyətə qayıdışı ilə ölkədə sabitlik bərpa edildi və müstəqil dövlət quruculuğunda mühüm addımlar atıldı.

Dövlət suverenliyi yalnız rəmzi atributlarla – bayraq, gerb, himn və Konstitusiya ilə məhdudlaşmır. Bu anlayış eyni zamanda iqtisadi müstəqillik, güclü ordu, vətəndaş rifahı və beynəlxalq arenada bərabərhüquqlu iştirak deməkdir.

XXI əsrin əvvəllərindən başlayaraq Azərbaycanın neft-qaz resurslarının dünya bazarına çıxarılması, transmilli layihələrin icrası və iqtisadiyyatın şaxələndirilməsi dövlət suverenliyinin real təminatına çevrildi. Prezident İlham Əliyevin rəhbərliyi ilə həyata keçirilən siyasət müstəqilliyimizi dönməz etdi və ölkəmizi regionun liderinə çevirdi.

Dövlət suverenliyinin əsas göstəricisi ərazi bütövlüyüdür. Uzun illər işğal altında olan Qarabağ və Şərqi Zəngəzurun azad edilməsi xalqımızın ən böyük arzusu idi.

2020-ci ildə baş vermiş 44 günlük Vətən müharibəsində Azərbaycan Ordusu xalqın dəstəyi, dövlətin gücü və Ali Baş Komandanın qətiyyəti ilə tarixi zəfər qazandı. 2023-cü ildə keçirilmiş lokal antiterror tədbirləri isə ölkə ərazisində suverenliyin tam bərpasını təmin etdi.

Bu zəfər təkcə hərbi deyil, həm də siyasi və mənəvi baxımdan Azərbaycan dövlətçiliyinin gücünü dünyaya göstərdi.

Dövlət suverenliyi – milli kimliyimizin, dilimizin, mədəniyyətimizin, adət-ənənələrimizin qorunması deməkdir. Azərbaycanın müstəqilliyi milli-mənəvi dəyərlərimizin azad şəkildə inkişafı üçün mühüm zəmin yaratdı.

Elm və təhsildə milli maraqlara uyğun siyasətin həyata keçirilməsi, beynəlxalq aləmdə ölkəmizin tanınması və nüfuzunun artması suverenliyin əyani göstəricilərindəndir.

Bu gün işğaldan azad edilmiş torpaqlarda genişmiqyaslı bərpa və quruculuq işləri aparılır, yeni şəhər və kəndlər salınır, müasir infrastruktur yaradılır. Bu proses xalqın öz torpağına sahib çıxmasının və dövlətin gücünün parlaq nümunəsidir.

Dövlət Suverenliyi Gününün qeyd edilməsi yalnız keçmişin xatırlanması deyil, həm də gələcəyə verilən ciddi mesajdır:

Bu gün hər bir vətəndaş anlamalıdır ki, dövlət suverenliyi onun azad yaşamasının, milli kimliyini qorumasının və firavan gələcəyinin təminatıdır. Suverenlik itirilərsə, xalqın azadlığı da təhlükə altına düşər. Buna görə də bu ali dəyər qorunmalı və gələcək nəsillərə ötürülməlidir.

Bu gün həm də şəhidlərimizin müqəddəs xatirəsinə ehtiramın ifadəsidir. Onların canı və qanı bahasına qazanılmış azadlıq Azərbaycan xalqının ən böyük sərvətidir.

Azərbaycan gəncliyi bu dəyərləri yaşatmalı və müstəqil dövlətin inkişafına töhfə verməlidir. Çünki müstəqillik bizə verilmiş hədiyyə deyil, böyük mübarizənin nəticəsidir.

19 sentyabr 2024-cü il tarixli Prezident Sərəncamı ilə təsis edilən Dövlət Suverenliyi Günü Azərbaycanın dövlətçilik tarixində mühüm bir mərhələdir. Bu gün xalqımızın əzmini, qətiyyətini və milli birliyini təcəssüm etdirir.

Azərbaycanın suverenliyi əbədi sərvətimizdir və bu sərvətin keşiyində durmaq hər bir vətəndaşın mənəvi borcudur.

Şəbnəm Uğurlu

YAP Laçın Rayon Təşkilatı 54 saylı ƏPT sədri,

Azərbaycan Respublikası Qabaqcıl Təhsil İşçisi

Laçın şəhər 2 nömrəli tam orta məktəbin direktor müavini

Paylaş:

Baxılıb: 334 dəfə