Prezident seçkilərində cənab İlham Əliyevin qələbəsi şübhəsizdir

Bakı:

26 °C

62 %

11 m/s

Əlaqə

AZ RU EN

Ana səhifə / YAP xəbərləri / Prezident seçkilərində cənab İlham Əliyevin qələbəsi şübhəsizdir

Prezident seçkilərində cənab İlham Əliyevin qələbəsi şübhəsizdir

02.10.2013 [10:19]

“AKKORD Sənaye Tikinti İnvestisiya Korporasiyası” ASC-də qarşıdan gələn prezident seçkilərinə həsr olunmuş toplantı keçirilib
Dünən Nərimanov rayonunda yerləşən “AKKORD Sənaye Tikinti İnvestisiya Korporasiyası” ASC-də qarşıdan gələn prezident seçkilərinə həsr olunmuş toplantı keçirilib. Toplantıdan öncə ASC-nin ofisində Ümummilli lider Heydər Əliyevin büstünün önünə əklil qoyulub, Ulu öndərin xatirəsi dərin ehtiramla yad edilib. Tədbiri giriş sözü ilə açan YAP Nərimanov rayon təşkilatının sədri Təmraz Tağıyev bildirib ki, Azərbaycan cəmiyyətinin əksəriyyəti Prezident İlham Əliyevə dərin inam və etimad bəsləyir: “Biz cənab Prezident İlham Əliyevin növbəti möhtəşəm qələbə qazanacağına əminik”.
Milli Məclisin deputatı Adil Əliyev isə çıxışında Prezident İlham Əliyevin rəhbərliyi ilə son 10 ildə Azərbaycanın qazandığı uğurlardan ətraflı şəkildə bəhs edib. A.Əliyev bildirib ki, bu illər ərzində ölkəmizin hər yerində abadlıq-quruculuq işləri gedib, bölgələrimizin siması dəyişib. Prezident İlham Əliyevin təbliğata ehtiyacı olmadığını deyən natiqin fikrincə, dövlət başçısının gördüyü işlər Ona xalqın inamını daha da gücləndirir. “Azərbaycan bütün sahələr üzrə inkişaf edir. Bu inkişaf da Prezidentimizin siyasətinin nəticəsidir. Ölkəmiz nəinki regionda, bütün dünyada sürətlə inkişaf etməkdədir. Azərbaycan, həmçinin, nüfuzlu beynəlxalq tədbirlərin keçirildiyi məkana çevrilib. Ölkəmizdə sabitlik, əmin-amanlıq hökm sürür. İnkişaf o yerdə baş verir ki, orada sabitlik olsun. Sabitlik və inkişaf baxımından da Azərbaycan dünyaya nümunədir. Bütün bu uğurların davamlı olması üçün biz seçkilərə getməli, cənab İlham Əliyevə səs verməliyik” - deyə, A.Əliyev vurğulayıb.
Tədbirdə olimpiya çempionu Fərid Mansurov da çıxış edib. O, çıxışında Prezident İlham Əliyevin rəhbərliyi ilə həyata keçirilən siyasi kursun uğurlarından danışıb. Olimpiya çempionu deyib ki, Prezident İlham Əliyev xalqımız qarşısında verdiyi vədlərin hamısına əməl edib. Azərbaycan son 10 ildə böyük sürətlə inkişaf edib, ölkənin regionları əsaslı şəkildə dəyişib, müasirləşib, insanların sosial vəziyyəti xeyli yaxşılaşıb. F.Mansurov cənab İlham Əliyevin siyasəti nəticəsində Azərbaycanın dünyada nüfuzlu idman ölkəsi kimi tanındığı bildirib. Onun sözlərinə görə, həm idmançılarımızın qazandığı qələbələr, həm də böyük beynəlxalq idman yarışlarının ölkəmizdə keçirilməsi bunu təsdiq edir. F.Mansurov deyib ki, bütün idmançıların seçimi cənab İlham Əliyevdir. O, bütün seçiciləri də 9 oktyabrda cənab İlham Əliyevə səs verməyə çağırıb.
“AKKORD Sənaye Tikinti İnvestisiya Korporasiyası” ASC-nin Direktorlar Şurasının sədri Xaqani Quluzadə bildirib ki, müstəqil Azərbaycan dövləti son illərdə böyük inkişaf yolu keçib. Xalqımızın Ümummilli lideri Heydər Əliyevin əsasını qoyduğu siyasi kursun bu gün Prezident İlham Əliyev tərəfindən uğurla davam etdirilməsi nəticəsində Azərbaycan dövləti bütün sahələrdə çox böyük uğurlara imza atıb. Onun sözlərinə görə, Prezident İlham Əliyev də dəfələrlə bildirib ki, bizim siyasətimizin əsasında Azərbaycan vətəndaşı dayanır. X.Quluzadə deyib ki, “AKKORD” quruculuq işlərində iştirak edir, ölkəmizdə bir sıra böyük layihələri icra edir. Onun sözlərinə görə, təşkilat tərəfindən nəinki ölkəmizdə, eləcə də Gürcüstanda, Ukraynada, Qazaxıstanda və digər dövlətlərdə də layihələr icra olunur.
ASC-nin ümumilikdə 6 min nəfərə yaxın işçisinin olduğunu deyən X.Quluzadə qeyd edib ki, kollektiv üzvlərinin seçki günü cənab İlham Əliyevə səs verəcəyinə inanır. “Bu gün Azərbaycanın hər bir regionu inkişaf edir. Paytaxtla ən ucqar kəndlərimiz arasında fərqlər çox sürətlə aradan qalxır. Hər bir rayonda yeni infrastruktur layihələri reallaşdırılır, yollar çəkilir, parklar salınır, rayonlarda böyük potensial yaradılır, iş yerləri açılır, əhalinin güzəranı daha da yaxşılaşdırılır. Əlbəttə ki, bunlar bir məqsədə xidmət edir: Azərbaycan vətəndaşları üçün daha yaxşı həyat şəraiti təmin olunsun. Əlbəttə ki, bizlər bu uğurlu siyasəti həyata keçirən cənab İlham Əliyevə səs verəcəyik” – deyə, X.Quluzadə vurğulayıb.
Tədbirdə kollektivin gənc üzvü Fatma Ələkbərova çıxış edərək Prezident İlham Əliyevin uğurlu gənclər siyasəti həyata keçirdiyini bildirib. Bu siyasət nəticəsində gəncliyin inkişaf etdiyini deyən F.Ələkbərovanın sözlərinə görə, Azərbaycan gənclərinin prezident seçkilərində cənab İlham Əliyevə səs verəcəyi şübhəsizdir.
Sonda ASC-nin YAP sıralarına yeni qoşulmuş əməkdaşlarına partiya vəsiqələri təqdim olunub.
Nardar BAYRAMLI

Paylaş:

Baxılıb: 1257 dəfə