Türk dövlətlərini birləşdirən dərin tarixi və mənəvi köklər

Bakı:

22 °C

83 %

7 m/s

Əlaqə

AZ RU EN

Ana səhifə / YAP xəbərləri / Türk dövlətlərini birləşdirən dərin tarixi və mənəvi köklər

Türk dövlətlərini birləşdirən dərin tarixi və mənəvi köklər

08.10.2025 [13:53]

Mansur Quliyev

YAP Ağdam rayon təşkilatının sədri

Bu gün Türk Dövlətləri Təşkilatı ciddi geosiyasi mərkəzlərdən biri kimi formalaşır.

Bu gün Qəbələ şəhəri mühüm tarixi hadisəyə ev sahibliyi edir — Türk Dövlətləri Təşkilatının 12-ci Zirvə Görüşü keçirilir. Bu Zirvə təkcə Türk dünyasının deyil, həm də qlobal siyasətin diqqət mərkəzindədir. Çünki müasir beynəlxalq münasibətlər sistemində Türk Dövlətləri Təşkilatı artıq regional əməkdaşlıq platformasından çıxaraq ciddi geosiyasi mərkəzlərdən biri kimi formalaşmaqdadır.

Türk dövlətlərini birləşdirən dərin tarixi və mənəvi köklər, ortaq dil, din, mədəniyyət və ənənələr bu təşkilatın təməl daşıdır. Lakin bu gün bu birliyi daha möhkəm edən təkcə ortaq keçmiş deyil, həm də ortaq gələcəyə yönəlmiş strateji baxış, qarşılıqlı etimad və siyasi iradədir. Türk Dövlətləri Təşkilatı regionda sabitlik, təhlükəsizlik, iqtisadi inteqrasiya və dayanıqlı inkişafın təminatına çevrilməkdədir.

Azərbaycanın ev sahibliyi etdiyi bu Zirvə həm simvolik, həm də strateji baxımdan əlamətdardır. Qəbələdə keçirilən görüş bir daha nümayiş etdirir ki, Türk birliyi ideyası artıq real siyasi, iqtisadi və humanitar layihələrlə dəstəklənir. Nəqliyyat-kommunikasiya əlaqələrinin genişlənməsi, enerji marşrutlarının şaxələnməsi, müdafiə sənayesi və təhsil sahəsində əməkdaşlıq Türk dünyasının inteqrasiyasını yeni mərhələyə yüksəldir.

Azərbaycan Prezidenti tərəfindən dəfələrlə vurğulandığı kimi, bu gün Türk Dövlətləri Təşkilatı yalnız mədəni və mənəvi birlik platforması deyil, həm də geosiyasi güc mərkəzidir. Bu güc, üzv ölkələrin bir-birinə etimadına, ortaq maraqlarının qorunmasına və beynəlxalq arenada vahid mövqedən çıxış etməsinə əsaslanır.

Azərbaycan, Türkiyə, Qazaxıstan, Özbəkistan, Qırğızıstan, Türkmənistan və müşahidəçi üzv Macarıstan bu təşkilat çərçivəsində vahid strateji ailə kimi hərəkət edir. Bu ailə təkcə iqtisadi və mədəni müstəvidə deyil, həm də qlobal çağırışlara qarşı birgə cavab vermək gücünə malikdir.

Zirvə görüşünün gündəliyində yer alan məsələlər – enerji təhlükəsizliyi, nəqliyyat-logistika əlaqələri, humanitar əməkdaşlıq və müdafiə sahəsində koordinasiya – Türk dünyasının qarşısında duran yeni imkanları və vəzifələri əks etdirir. Bu istiqamətlərdə qəbul olunacaq qərarlar, şübhəsiz ki, Türk Dövlətləri Təşkilatının beynəlxalq nüfuzunu daha da artıracaq.

Bu gün Türk birliyi yalnız coğrafi yaxınlığın deyil, həm də ortaq mənəvi, siyasi və iqtisadi dəyərlərin birliyinin ifadəsidir. Bu birliyin gücü həm tarixdən, həm də çağdaş dünyada xalqlarımızın qardaşlıq ruhundan qaynaqlanır.

Azərbaycan xalqı da bu prosesin önündə olmaqdan qürur duyur. Qarabağın və Şərqi Zəngəzurun bərpası dövründə Türk dünyası ölkələrinin göstərdiyi dəstək, qardaşlıq münasibətləri bu birliyin canlı təzahürüdür. Füzulidə, Ağdamda, Cəbrayılda və digər azad edilmiş bölgələrdə qardaş ölkələrin tikdirdiyi məktəblər, mədəniyyət ocaqları və ibadət yerləri Türk həmrəyliyinin parlaq nümunəsidir.

Bu gün Qəbələdən dünyaya verilən mesaj aydındır:

Türk Dövlətləri Təşkilatı artıq müasir beynəlxalq sistemdə öz sözünü deyən, sabitliyə, əməkdaşlığa və ədalətə əsaslanan yeni geosiyasi güc mərkəzidir.

Türk birliyi – tariximizin irsindən doğan, gələcəyimizi birləşdirən ən böyük dəyərimizdir.

Paylaş:

Baxılıb: 744 dəfə