Nəqliyyat, enerji və iqtisadi inteqrasiya – Türk dünyasının strateji birliyi

Bakı:

18°C

68%

4m/s

Əlaqə

AZ RU EN

Ana səhifə / YAP xəbərləri / Nəqliyyat, enerji və iqtisadi inteqrasiya – Türk dünyasının strateji birliyi

Nəqliyyat, enerji və iqtisadi inteqrasiya – Türk dünyasının strateji birliyi

10.10.2025 [14:21]

Qəbələdə keçirilən Türk Dövlətləri Təşkilatının 12-ci Zirvə Görüşündə Prezident İlham Əliyevin çıxışı türk dünyasının iqtisadi, enerji və nəqliyyat inteqrasiyasının gələcək perspektivlərini aydın şəkildə ortaya qoydu.

Prezident İlham Əliyev qeyd etdi ki, TDT çərçivəsində nəqliyyat və kommunikasiya əlaqələrinin inkişafı strateji əhəmiyyət daşıyır. Azərbaycan bu istiqamətdə regionun aparıcı ölkələrindən biri kimi çıxış edir. Şərq-Qərb və Şimal-Cənub nəqliyyat dəhlizlərinin fəal iştirakçısı olan Azərbaycan, həm Türkiyə ilə Mərkəzi Asiya, həm də Avropa arasında iqtisadi və logistika körpüsü rolunu oynayır.

Son illərdə Orta Dəhlizlə yükdaşımaların 90 faiz artması və tranzit müddətlərinin əhəmiyyətli dərəcədə azalması bu istiqamətdə atılan addımların səmərəsini göstərir. Ələt Beynəlxalq Ticarət Limanı, Bakı-Tbilisi-Qars dəmir yolu, 9 beynəlxalq hava limanı və regionun ən böyük yükdaşıma aviaşirkəti Azərbaycanın beynəlxalq nəqliyyat mərkəzi statusunu möhkəmləndirib.

Prezident İlham Əliyev qeyd etdi ki, Zəngəzur dəhlizinin açılması Vaşinqton Zirvəsinin mühüm nəticələrindən biridir. Bu dəhliz həm Orta Dəhliz, həm də Şimal-Cənub istiqamətində yeni arteriya kimi çıxış edərək, türk dünyasının iqtisadi birliyini daha da gücləndirəcək.

Enerji təhlükəsizliyi də çıxışın əsas istiqamətlərindən biri idi. Azərbaycan 14 ölkəyə təbii qaz ixrac edir və bu sahədə regionda lider mövqeyə malikdir. Dövlət başçısı bildirdi ki, ölkəmiz neft-qaz sektorunda olduğu kimi, bərpaolunan enerji sahəsində də ön sıralardadır. 2030-cu ilə qədər ümumi enerji istehsalının 40 faizinin bərpaolunan mənbələr hesabına təmin olunması planlaşdırılır.

Azərbaycan Orta Asiya, Türkiyə və Avropa ilə “yaşıl enerji dəhlizi” layihəsi üzərində fəal işləyir. Eyni zamanda, qardaş ölkələrlə birgə sərmayə fondlarının yaradılması və 20 milyard dollardan artıq sərmayənin qoyulması iqtisadi inteqrasiyanın praktiki nəticəsidir.

Prezident İlham Əliyev çıxışında vurğuladı ki, iqtisadi güc və enerji birliyi türk dünyasının siyasi müstəqilliyinin əsas dayağıdır. Azərbaycan bu istiqamətdə lokomotiv rolunu oynayır, dost və qardaş ölkələrlə birgə dayanıqlı inkişaf modelini formalaşdırır.

Qəbələ Zirvəsində səslənən bu mesajlar göstərdi ki, Azərbaycan Prezidenti İlham Əliyevin rəhbərliyi ilə türk dünyası beynəlxalq iqtisadi sistemdə öz sözünü deyən, enerji və nəqliyyat sahəsində strateji güc mərkəzi kimi möhkəmlənir.
Bu birliyin təməlində qarşılıqlı hörmət, ortaq dəyərlər və xalqların rifahına xidmət edən praqmatik əməkdaşlıq dayanır.

Abbas Pənahov,

Yeni Azərbaycan Partiyası Nəsimi rayon təşkilatının sədr müavini

Paylaş:

Baxılıb: 257 dəfə