Məmur xalqın qayğıları ilə yaşamalıdır

Bakı:

2 °C

80 %

8 m/s

Əlaqə

AZ RU EN

Ana səhifə / YAP xəbərləri / Məmur xalqın qayğıları ilə yaşamalıdır

Məmur xalqın qayğıları ilə yaşamalıdır

13.11.2025 [16:44]

Noyabr ayının 12-də Azərbaycan Respublikasının Prezidenti cənab İlham Əliyev Naxçıvan şəhərində Prezidentin yeni səlahiyyətli nümayəndəsini və bir sıra rayonların icra hakimiyyətlərinə təyin olunan başçıları qəbul edib. Görüş zamanı dövlət başçısı çıxış edərək, həyata keçirilən kadr təyinatlarının əhəmiyyəti, qarşıya qoyulan vəzifələr və dövlət idarəçiliyinin yeni mərhələsi barədə ətraflı danışıb.

Cənab Prezident qeyd edib ki, son illərdə ölkəmizdə aparılan institusional və struktur islahatlar idarəetmə sisteminin təkmilləşdirilməsinə, vətəndaş məmnunluğunun artırılmasına və dövlət xidmətlərinin səmərəliliyinin yüksəldilməsinə yönəlib. Onun sözlərinə görə, hər bir təyinatın arxasında müəyyən məqsədyönlü siyasət dayanır bu siyasətin əsas məqsədi isə xalqın maraqlarına xidmət edən, şəffaf, məsuliyyətli və peşəkar idarəetmənin təmin olunmasıdır.

Dövlət Başçısı bildirib ki, rəhbər vəzifələrə təyin olunan şəxslər dövlətin etimadını doğrultmaq üçün fəaliyyətlərini konkret nəticələr üzərində qurmalıdırlar. “Hər bir icra başçısı, hər bir səlahiyyətli nümayəndə xalqa yaxın olmalı, onun qayğıları ilə yaşamalıdır. Dövlət qulluqçusunun əsas vəzifəsi vətəndaşların problemlərini dinləmək və onların həlli üçün real addımlar atmaqdır”, – deyə Prezident vurğulayıb.

Cənab Prezident çıxışında kadr siyasətində əsas meyarların peşəkarlıq, dürüstlük və mənəvi saflıq olduğunu bildirib. Onun fikrincə, rəhbər şəxslərin öz davranış və idarəetmə tərzi ilə nümunə göstərməsi dövlətin imicinin qorunması baxımından böyük əhəmiyyət daşıyır. Ölkə Başçısı xəbərdarlıq edib ki, vəzifəsindən sui-istifadə edən, xalqa qarşı laqeyd münasibət göstərən, yaxud korrupsiya hallarına yol verən məmurlar barəsində ciddi tədbirlər görüləcək.

Prezident korrupsiya və rüşvətxorluqla mübarizəni dövlət siyasətinin prioritet istiqamətlərindən biri kimi qiymətləndirib. O qeyd edib ki, ölkənin inkişafı və idarəetmədə etimad mühitinin formalaşması yalnız şəffaflıq və hesabatlılıq prinsiplərinə əsaslanmalıdır. “Bizim məqsədimiz hər bir məmurun fəaliyyətinə ictimai etimadı gücləndirmək, dövlət orqanlarının cəmiyyətdə inam simvoluna çevrilməsini təmin etməkdir”, deyə dövlət başçısı əlavə edib.

Dövlət Başçısı Naxçıvanın inkişaf perspektivlərinə də toxunaraq, bölgənin ölkənin sosial-iqtisadi həyatında xüsusi rol oynadığını bildirib. O, yeni təyin olunan səlahiyyətli nümayəndənin qarşısında dayanan əsas vəzifələrin Naxçıvanda infrastrukturun müasirləşdirilməsi, investisiya mühitinin yaxşılaşdırılması, əhalinin rifah səviyyəsinin yüksəldilməsi və dövlət siyasətinin bütün istiqamətlərinin səmərəli icrası ilə bağlı olduğunu vurğulayıb.

Prezident, eyni zamanda, regionların sosial-iqtisadi inkişaf proqramlarının icrasının vacibliyinə diqqət çəkib. O qeyd edib ki, dövlətin həyata keçirdiyi genişmiqyaslı layihələr yolların, enerji infrastrukturlarının, sosial obyektlərin inşası yerlərdə iqtisadi fəallığı artırmaqla yanaşı, vətəndaşların həyat keyfiyyətinə birbaşa təsir göstərir. Bu səbəbdən hər bir icra başçısı öz rayonunda inkişaf strategiyasını düzgün müəyyənləşdirməli və dövlət proqramlarının icrasına məsuliyyətlə yanaşmalıdır.

Görüş zamanı cənab İlham Əliyev bildirib ki, son illərdə ölkənin bütün bölgələrində müşahidə olunan yenilənmə prosesi yeni idarəçilik modelinin formalaşmasına səbəb olub. Dövlət başçısı vurğulayıb ki, qarşıdakı illərdə aparılan islahatlar nəticəsində həm mərkəzi, həm də yerli səviyyədə idarəetmənin müasir tələblərə uyğunlaşdırılması davam etdiriləcək.

Prezidentin çıxışı həm yeni təyin olunan məmurlar üçün fəaliyyət proqramı xarakteri daşıyıb, həm də ümumilikdə dövlət idarəçiliyində məsuliyyət və hesabatlılıq prinsipinin bir daha təsdiqi kimi qiymətləndirilib.

Rövşən Əhmədov

YAP Ağcabədi rayon təşkilatının sədri

Paylaş:

Baxılıb: 286 dəfə