Bölgələrdəki ekoloji tarazlıq mütləq qorunmalıdır, ətraf mühitə böyük diqqət göstərilməlidir

Bakı:

22 °C

68 %

4 m/s

AZ RU EN

Ana səhifə / YAP xəbərləri / Bölgələrdəki ekoloji tarazlıq mütləq qorunmalıdır, ətraf mühitə böyük diqqət göstərilməlidir

Bölgələrdəki ekoloji tarazlıq mütləq qorunmalıdır, ətraf mühitə böyük diqqət göstərilməlidir

14.11.2025 [16:11]

2025-ci il 12 noyabr tarixində Prezident İlham Əliyev yeni səlahiyyətli nümayəndə və bir sıra rayon icra hakimiyyətlərinin başçılarını qəbul edib. Bu görüş dövlət siyasətinin regional inkişaf baxımından yeni mərhələsinin təzahürü olmaqla yanaşı, eyni zamanda ekoloji məsuliyyətin də idarəetmədə prioritet halına gəlməsinin siqnalını verib. Prezident çıxışında qeyd edib ki, təyinatlar böyük etimaddır və bu etimadı yalnız əməli fəaliyyət, şəffaf və vicdanlı idarəetmə yolu ilə doğrulamaq mümkündür. O, yeni icra başçılarına xalqa xidmət etmək, vətəndaşlarla sıx təmasda olmaq və aşağıdan yuxarıya doğru məsuliyyət prinsipinə əsaslanan idarəçilik modelini formalaşdırmaq vəzifəsini qoyub. İlham Əliyev vurğulayıb ki, bölgələrdə infrastruktur layihələrinin icrası yol, içməli su, enerji, kənd təsərrüfatı sahəsindəki investisiyalar Azərbaycanın ümumi iqtisadi dayanıqlığını artırır. Lakin o, iqtisadi inkişafa paralel olaraq ekoloji tarazlığa xüsusi diqqət göstərilməsinin vacibliyini də dilə gətirib. Yeni təyinatlı rəhbərlərdən yalnız insan rifahına deyil, təbii resursların qorunmasına da məsuliyyətli yanaşma tələb olunub. Prezident, xüsusilə, korrupsiya və qanunsuzluluğa qarşı mübarizəyə çağırış edib. O bildirib ki, bəzi regionlarda qeyri-qanuni inşaat materiallarının hasilatı, çayların axın istiqamətlərinin dəyişdirilməsi kimi fəaliyyətlər müşahidə oluna bilər və bu cür hallar ciddi nəzarət altında olmalıdır. O, ekoloji anarxiyanın qarşısını almaq üçün Prezident Administrasiyası, Nazirlər Kabineti və Ekologiya və Təbii Sərvətlər Nazirliyinin əməkdaşlığını gücləndirməyi tövsiyə edib. Dövlət başçısı həmçinin insanlara “yaşayış mühitinin” keyfiyyətini yüksəltmək üçün yerli rəhbərlərin məsuliyyət daşımasını bildirib. Onun fikrincə, bütün bölgələrdə vətəndaşlar görməlidir ki, dövlətin proqramları onların gündəlik həyatına real müsbət təsir göstərir -təmiz su, sanitar infrastrukturu, sosial xidmətlər və ekoloji balans bunlardan biridir. Bu nöqteyi-nəzərdən, 12 noyabr qəbulunun mesajı aydındır: regionların inkişafı yalnız iqtisadi investisiyalardan və inzibati təyinatlardan ibarət deyil eyni zamanda yaşıl inkişaf, dayanıqlı resurs istifadəsi və təbiətin qorunması prinsipinə əsaslanan bir idarəetmə modeli təşviq olunur. Prezidentin çıxışı bölgələrdəki yeni rəhbərlər üçün sadəcə sosial və inzibati tapşırıqların deyil, həm də ekoloji məsuliyyətin önəmli bir tərkib hissəsi olduğunu təsdiq edir. Liderlərdən tələb olunur ki, həm insan rifahını, həm iqtisadi inkişafi, həm də ekoloji sabitliyi birgə inkişaf etdirən siyasət yürüdərək, bölgələrdə dayanıqlı gələcək inşa etsinlər.

Nicat Quliyev

YAP Laçın rayon təşkilatının məsləhətçisi

Paylaş:

Baxılıb: 598 dəfə