Ağdama qayıdışın 5 ili

Bakı:

22 °C

71 %

11 m/s

Əlaqə

AZ RU EN

Ana səhifə / YAP xəbərləri / Ağdama qayıdışın 5 ili

Ağdama qayıdışın 5 ili

19.11.2025 [17:27]

Fidan Hüseynova,

YAP Quba rayon təşkilatının sədri

20 noyabr 2025-ci il—Bu gün Azərbaycanda Ağdam Şəhəri Günü qeyd olunur. Prezident İlham Əliyevin 31 iyul 2023-cü il tarixli sərəncamına əsasən təsis edilən bu gün, Ağdamın işğaldan azad edilməsinin ildönümü kimi böyük tarixi və mənəvi dəyər daşıyır. 2020-ci il noyabrın 20-də Azərbaycan, Rusiya və Ermənistan liderləri arasında imzalanmış üçtərəfli bəyanata uyğun olaraq, Ermənistan silahlı qüvvələri Ağdam rayonunun işğal olunmuş ərazilərini tərk etmiş və Azərbaycan Ordusu bir güllə atmadan, itki vermədən Ağdama daxil olmuşdu. Bu tarixi qayıdışdan artıq beş il keçir.

İşğal dövründə tamamilə viran edilmiş, xarabalığa çevrilmiş, tarix və mədəniyyət nümunələri dağıdılmış Ağdam ötən beş ildə Azərbaycanın ən böyük yenidənqurma və bərpa meydanına çevrilib. İlham Əliyevin 2020-ci il 20 noyabr müraciətində “Ağdam üçün yeni dövr başlayır” sözləri bu illər ərzində ardıcıl olaraq həyata keçirilən genişmiqyaslı layihələrdə öz əksini tapıb. Şəhərin baş planı əsasında qurulan infrastruktur, yeni yaşayış massivləri, modern yol və kommunikasiya xətləri, təhsil və səhiyyə müəssisələri Ağdamın gələcəyinə hesablanan strateji inkişafın nümunələridir.

Ağdamın Ümumi Şəhər Planı əsasında inşasına başlanılan yeni məhəllələr artıq tamamlanmaq üzrədir. Əhalinin qayıdışı üçün bütün şərait yaradılıb: çoxmənzilli binalar, fərdi evlər, su, qaz, elektrik, rabitə xətləri, məktəblər, uşaq bağçaları və sosial obyektlər yüksək standartlara uyğun tikilir. 2026-cı ilin sonunadək on minlərlə sakinin doğma yurdlarına qayıdışı planlaşdırılır və köç prosesi mərhələli şəkildə həyata keçirilir.

İnfrastruktur layihələri Ağdamın simasını köklü şəkildə dəyişib. Şəhərin yeni Dəmir Yolu və Avtovağzal Kompleksi istifadəyə verilib, geniş parklar və ictimai istirahət yerləri salınır, müxtəlif inzibati və sosial mərkəzlər inşa edilir. Su-kanalizasiya sistemləri, avtomobil yolları və enerji təchizat xətləri müasir tələblərə uyğun olaraq yenidən qurulub. Ağdamda həyata keçirilən layihələr təkcə tikinti deyil, həm də ağıllı şəhər və yaşıl enerji yanaşmasına əsaslanır.

Tarixi irsin bərpası Ağdamın yenidən doğuluşunda əsas istiqamətlərdən biridir. İşğal dövründə simvola çevrilmiş Ağdam Cümə Məscidi tam bərpa olunaraq əvvəlki əzəmətini qaytarıb. “Memorial Bağ” layihəsi çərçivəsində dağıdılmış tikililərin bir hissəsi xüsusi olaraq qorunur və gələcək nəsillərə tarix dərsi kimi saxlanılır. Şəhərin rəmzlərindən olan Ağdam Çay Evinin, eləcə də İmarət Stadionunun bərpa işləri davam edir və Ağdamın mədəni siması yenidən formalaşdırılır.

Şəhərin iqtisadi potensialının bərpası üzrə də ciddi addımlar atılıb. Ağdam Sənaye Parkında fəaliyyətə başlayan müəssisələr yüzlərlə yeni iş yeri yaradıb, bölgədə sahibkarlığın inkişafı üçün əlverişli mühit formalaşdırılıb. Qarabağın gələcək sənaye-logistika mərkəzlərindən biri kimi nəzərdə tutulan Ağdamda investisiya cəlbediciliyi sürətlə artır.

Beş il əvvəl xarabalığa çevrilmiş Ağdam bu gün geniş yolları, müasir binaları, abadlaşan küçələri, işıq saçan yeni şəhər mərkəzi, park və meydanları ilə tamam başqa simadadır. Sakinlərin doğma yurdlarına qayıdışı, sosial və iqtisadi həyatın canlanması Ağdamın yenidən dirçəlişinin real göstəricisidir. Bu gün Ağdam Şəhəri Günü təkcə tarixi qələbənin xatırladılması deyil, həm də o qələbədən sonra qurulan böyük gələcəyin, yenidən dirçəlişin bayramıdır.

Ağdam artıq həm qələbənin, həm quruculuğun, həm də böyük ümidlərin rəmzidir.

Paylaş:

Baxılıb: 561 dəfə