Kəlbəcərin günəşinə qayıdış

Bakı:

24 °C

57 %

5 m/s

Əlaqə

AZ RU EN

Ana səhifə / YAP xəbərləri / Kəlbəcərin günəşinə qayıdış

Kəlbəcərin günəşinə qayıdış

25.11.2025 [09:45]

25 noyabr Kəlbəcər Şəhəri günüdür. Bu tarix Azərbaycan xalqının yaddaşına həm qürur, həm də qayıdış günü kimi həkk olunub. 2020-ci ilin tarixi Zəfərindən sonra imzalanmış üçtərəfli Bəyanata uyğun olaraq Kəlbəcər rayonunun 25 noyabrda işğaldan azad olunması xalqımızın uzun illər gözlədiyi ədalətin bərpası idi. 2023-cü ildə Prezident İlham Əliyevin imzaladığı sərəncamla 25 noyabrın rəsmi şəkildə “Kəlbəcər Şəhəri Günü” elan edilməsi isə bu tarixi hadisənin dövlət səviyyəsində əbədiləşdirilməsi deməkdir.

Kəlbəcər təkcə coğrafi məkan deyil — Azərbaycan ruhunun, dağ əzəmətinin, milli yaddaşın simvoludur. Murov silsiləsinin qoynunda ucalan bu diyar əsrlər boyu xalqımızın mədəniyyətinə, həyat tərzinə, ruhuna güc verib. Təbiəti ilə qəribə bir heyrət oyadan, suları şəfa mənbəyi sayılan, yaylaqları, meşələri ilə göz oxşayan Kəlbəcər Azərbaycan coğrafiyasının bənzərsiz incilərindən biridir. Lakin 1993-cü ildə bu gözəllik bir anda qaralan sətirə çevrildi — rayon tamamilə işğal edildi, minlərlə sakin doğma evini tərk etməyə məcbur qaldı. İllər boyu dağlara çökən sükut, viran edilmiş kəndlər, dağıdılmış tarixi abidələr Kəlbəcərin kədərli taleyini simvolizə edirdi. Lakin xalqımızın iradəsi kimi, Kəlbəcərin taleyi də dəyişdi. Ölkə başçısı, Silahlı Qüvvələrin Ali Baş Komandanı cənab İlham Əliyevin qətiyyətli, müdrik və strateji siyasəti nəticəsində 44 günlük Vətən müharibəsində tarixi Qələbə qazanıldı. Bu Qələbənin nəticəsi olaraq Kəlbəcər bir güllə belə atılmadan diplomatik-siyasi üstünlüklə, Azərbaycan dövlətinin gücü və nüfuzu hesabına azad edildi. Bu hadisə təkcə hərbi-siyasi nailiyyət deyil, həm də dünyanın Azərbaycanın haqq səsinin doğruluğunu görməsinin təzahürü idi.
Bu gün Kəlbəcərdə həyat yenidən dirçəlir. Prezident İlham Əliyevin rəhbərliyi ilə həyata keçirilən genişmiqyaslı bərpa-quruculuq işləri bu torpağın gələcək inkişafını təmin edir. Yeni yollar salınır, enerji infrastrukturu yenilənir, içməli su layihələri reallaşır, müasir yaşayış məhəllələri tikilir, təbiətin qorunması və ekoloji tarazlığın bərpası üzrə mühüm addımlar atılır. “Böyük Qayıdış” proqramı çərçivəsində kəlbəcərlilərin doğma torpaqlarına qayıtması üçün təhlükəsiz, müasir və rahat mühit formalaşdırılır. Bu gün Kəlbəcərdə təkcə binalar deyil, həyatın özü yenidən qurulur.

Kəlbəcər Şəhəri Gününün qeyd olunması milli kimliyimizin bir parçasıdır. Bu gün xalqımız bir daha təsdiqləyir ki, Azərbaycan torpaqlarının hər qarışı bizim üçün əzizdir, əbədidir və heç zaman unudulmur. Kəlbəcərin dirçəlməsi bütün ölkəmizin inkişafının, gücünün, birliyinin təcəssümüdür. Bu torpağa qayıdış yalnız fiziki dönüş deyil — köklərə, yaddaşa qayıdışdır, Vətən sevgisinin ən ali təzahürüdür.

25 noyabr — Kəlbəcər Şəhəri Günü — həm tarix, həm də gələcəkdir. Bunun işığında Azərbaycan daha da yüksəlir, daha da güclənir və Kəlbəcər dağları kimi əzəmətlə irəliyə doğru addımlayır.

Səfa Ağayev
YAP İmişli rayon təşkilatının sədri

Paylaş:

Baxılıb: 686 dəfə