Humanizm siyasəti

Bakı:

25 °C

53 %

3 m/s

Əlaqə

AZ RU EN

Ana səhifə / YAP xəbərləri / Humanizm siyasəti

Humanizm siyasəti

18.12.2025 [15:40]

Azərbaycan Respublikasının Prezidenti İlham Əliyevin “Konstitusiya və Suverenlik İli” münasibətilə amnistiyanın elan edilməsi təşəbbüsü dövlətin hüquqi, sosial və mənəvi dəyərlərə söykənən idarəçilik modelinin bariz nümunəsidir. Bu təşəbbüs ölkədə insan hüquq və azadlıqlarının təmin olunmasının, hüquqi dövlət prinsiplərinin möhkəmləndirilməsinin və cəza siyasətinin humanist əsaslar üzərində qurulmasının davamlı xarakter daşıdığını bir daha nümayiş etdirir.

Prezident İlham Əliyevin rəhbərliyi ilə həyata keçirilən genişmiqyaslı hüquq islahatları çərçivəsində məhkəmə-hüquq sisteminin təkmilləşdirilməsi, cəzaların fərdiləşdirilməsi və alternativ cəza mexanizmlərinin tətbiqi prioritet istiqamətlərdəndir. Bu kontekstdə amnistiya və əfv institutları dövlətin cəmiyyətə münasibətində mərhəmət, sosial ədalət və məsuliyyət balansını qoruyan mühüm hüquqi alətlər kimi çıxış edir.

Dövlət başçısının təşəbbüsü ilə ötən dövr ərzində 12 amnistiya aktı qəbul edilmiş, 71 əfv sərəncamı imzalanmışdır. Bu qərarlar minlərlə məhkumun azadlığa buraxılmasına, cəza müddətlərinin azaldılmasına və cinayət məsuliyyətindən azad edilməsinə şərait yaratmışdır. Nəticə etibarilə, bu şəxslərin cəmiyyətə yenidən inteqrasiyası, ailələrinə qovuşması və sağlam sosial münasibətlərin bərpası üçün real imkanlar formalaşmışdır.

Amnistiya təşəbbüsləri eyni zamanda dövlətin sosial siyasətinin tərkib hissəsi kimi qiymətləndirilir. Bu addımlar ailə institutunun möhkəmləndirilməsinə, sosial gərginliyin azalmasına, ictimai həmrəyliyin güclənməsinə xidmət edir. Humanist yanaşma, xüsusilə ilk dəfə cinayət törətmiş, az ağır və ya ehtiyatsızlıqdan baş vermiş cinayətlərə görə məhkum edilmiş şəxslər üçün ikinci şans mexanizmi rolunu oynayır.

“Konstitusiya və Suverenlik İli” çərçivəsində irəli sürülən amnistiya təşəbbüsü həm də Azərbaycanın dövlətçilik tarixində mühüm mərhələyə işarə edir. Konstitusiya dövlətin hüquqi təməllərini müəyyənləşdirdiyi kimi, suverenlik anlayışı milli iradənin, siyasi müstəqilliyin və hüquqi qərarvermənin əsasını təşkil edir. Bu iki ali dəyərin insan amili ilə uzlaşdırılması Prezident İlham Əliyevin idarəçilik fəlsəfəsinin əsas mahiyyətini təşkil edir.

Dövlət başçısının amnistiya və əfv siyasəti beynəlxalq hüququn humanist prinsiplərinə uyğun olmaqla yanaşı, Azərbaycanın hüquqi və demokratik inkişaf yolunda ardıcıl addımlar atdığını göstərir. Bu yanaşma ölkənin beynəlxalq nüfuzunun möhkəmlənməsinə, hüquqi dövlət imicinin güclənməsinə də müsbət təsir göstərir.

Nəticə etibarilə, Prezident İlham Əliyevin “Konstitusiya və Suverenlik İli” münasibətilə irəli sürdüyü amnistiya təşəbbüsü dövlətin gücünün yalnız qanunun aliliyi ilə deyil, eyni zamanda mərhəmət və ədalət prinsipləri ilə ölçüldüyünü təsdiqləyir. Bu siyasət cəmiyyətdə hüquqa hörmətin, dövlətə inamın və sosial sabitliyin möhkəmlənməsinə xidmət edən mühüm dövlətçilik xətti kimi dəyərləndirilir.

Sahib Şükürov

YAP Göyçay rayon təşkilatının sədri

Paylaş:

Baxılıb: 556 dəfə