Azərbaycan daim dünyaya əməkdaşlıq, həmrəylik çağırışları ilə diqqətdədir

Bakı:

13 °C

76 %

6 m/s

Əlaqə

AZ RU EN

Ana səhifə / YAP xəbərləri / Azərbaycan daim dünyaya əməkdaşlıq, həmrəylik çağırışları ilə diqqətdədir

Azərbaycan daim dünyaya əməkdaşlıq, həmrəylik çağırışları ilə diqqətdədir

23.01.2026 [17:35]

Dövlət başçısı İlham Əliyevin Davos Forumunda iştirakı hər zaman çoxsaylı yüksək səviyyəli görüşlərlə, müsahibəsi, həmçinin çıxışı ilə yadda qalır. Bu dəfəki Forum da istisna olmadı. Keçirilən görüşlərin say tərkibinin genişliyi bu gün Azərbaycanın beynəlxalq münasibətlər sistemində yerinin və rolunun, Prezident İlham Əliyevə böyük etimadın aydın mənzərəsini yaradır. Dövlət başçısı İlham Əliyev Ümumdünya İqtisadi Forumunun illik toplantısı çərçivəsində keçirdiyi görüşlərlə bağlı sosial şəbəkə hesabında paylaşım etdi. Paylaşımda “Prezident İlham Əliyevin Ümumdünya İqtisadi Forumunun İllik toplantısı çərçivəsində görüşləri. Davos 19-22 yanvar 2026-cı il” sözləri yer alıb.

Görüşlərdə diqqət yönəldilən məsələlərdən biri Azərbaycanın xarici investorlar üçün cəlbedici məkan olması oldu. Belə ki, ölkəmizdə əlverişli investisiya və biznes mühitinin mövcudluğu məmnunluqla qeyd edildi. Ölkəmizin mühüm beynəlxalq nəqliyyat dəhlizlərinin kəsişməsində yerləşməsi, son dövrlərdə Azərbaycanda müasir nəqliyyat infrastrukturunun qurulması istiqamətində icra edilən layihələr diqqətə çatdırıldı. Azərbaycanın Avropanın enerji təhlükəsizliyində oynadığı rol və bu rolun artan istiqamətdə davam etməsi xüsusi vurğulandı.

Reallıq budur ki, iqtisadiyyatın müxtəlif sahələrində, o cümlədən enerji sahəsində qlobal əhəmiyyətli layihələrin icrası ölkəmizin imkanlarını artırmaqla yanaşı, regional və beynəlxalq əməkdaşlığın inkişafına xidmət edir. Azərbaycanda tranzit potensialının reallaşdırılması istiqamətində də mühüm layihələr icra edilir və nəticələr göz önündədir. Hazırda iqtisadi siyasətin prioritetləri iqtisadiyyatın daha da şaxələndirilməsi, qeyri-neft sektorunun inkişafıdır. Azərbaycan bütün çağırışları yüksək səviyyədə cavablandırmaq üçün səylərini artırır, əməkdaşlıq əlaqələrinin coğrafiyasını daha da genişləndirir.

Dövlət başçısı İlham Əliyev Davosda “Euronews” televiziyasına müsahibəsində də Azərbaycanın enerji sektorunda qazandığı uğurlara yönəltdi. Vurğuladı ki, Azərbaycan Cənubi Qafqazın enerji ehtiyatlarına məxsus və digər ölkələrə neft və qaz ixrac edən yeganə ölkədir. Bölgənin digər ölkələri - uzun illər Gürcüstan, indi isə artıq Ermənistan enerji ehtiyatlarını Azərbaycandan idxal edir. Avropa və Avropa İttifaqı ilə isə enerji əməkdaşlığımız artmaqdadır. Artıq 16 ölkəyə təbii qaz ixrac edirik və onların 10-u Avropa İttifaqının üzvüdür. Boru kəməri qazı ilə coğrafi əhatəsinə görə Azərbaycan dünyada birinci yerdədir. Azərbaycan təbii resurslara, nəqliyyat sisteminə və müasir boru kəmərlərinə malikdir: “Bir çox Avropa ölkəsi ilə yaxşı münasibətlərimiz var və bu, onlar üçün öz enerji təhlükəsizliyini gücləndirmək imkanıdır. Azərbaycan üçün isə bu, premium bazarda ehtiyatlarımızı satmaq fürsətidir. Baxmayaraq ki, qazı təkcə Avropaya satmırıq, bu yaxınlarda Suriyaya da ixrac etməyə başlamışıq. Ancaq qiymət baxımından ən yaxşı bazar, əlbəttə ki, Avropa bazarıdır”.

Azərbaycan daim dünyaya əməkdaşlıq, birlik, həmrəylik çağırışları ilə diqqətdə olub. Təbii ki, bu, ölkəmizin birləşdirici, sabitləşdirici aktor kimi möhkəmlənən mövqeyindən irəli gəlir. Azərbaycan sabit, təhlükəsiz ölkə kimi mövqeyini möhkəmləndirir. Cənab İlham Əliyev sözügedən müsahibəsində onu da qeyd etdi ki, Azərbaycan da daxil olmaqla, hər bir ölkə özünün sərhədləri boyu sabitlik haqqında düşünməlidir. Azərbaycana gəldikdə, ölkə daxilində potensial risklər mövcud deyil. Bütün potensial risklər kənardan qaynaqlana bilər. Bu səbəbdən hər zaman qonşuluğumuzda sabitliyin mövcud olması haqqında düşünürük. İranda baş verən müəyyən qeyri-sabitlikdən narahatıq. Regionda sabitlik, proqnozlaşdırılma və sülh ən böyük sərvətdir. İşğaldan və müharibədən əziyyət çəkmişik, minlərlə qurban vermişik. Bu gün sülhün və sabitliyin olması istənilən ölkə üçün uğur qazanmağın yeganə yoludur.

“Dialoq ruhu - qlobal mürəkkəblik və bölünmə şəraitində fikir mübadiləsi və anlaşma daha vacibdir” devizi altında dünya liderlərini, dünyanın aparıcı iş adamlarını bir araya gətirən 56-cı Dünya İqtisadi Forumu Azərbaycanın regionda və dünyada möhkəmlənən mövqeyini bir daha təsdiqlədi. Tarixi Zəfərimizin, suverenliyimizin tam bərpasının reallıqları fonunda Azərbaycanın nüfuzu daha da artır. Dövlət başçısı İlham Əliyev “Avrasiyanın iqtisadi özünəməxsusluğunun müəyyənləşdirilməsi” mövzusunda panel iclasındakı çıxışında qeyd etdi ki, biz bir ölkə, bir xalq kimi çox ağır vaxtlar yaşamışıq: ərazilərin itirilməsini, milyonlarla insanın evsiz qalmasını və məcburi köçkünə çevrilməsini görmüşük. Lakin ümidimizi itirmədik. Ədaləti, beynəlxalq hüququ və suverenliyimizi bərpa etməkdə cəsarətimizi itirmədik. Bu, bizdən 30 il aldı. Həmin vaxt, 30, 20 və 10 il əvvəl və indi beynəlxalq təsisatların davranışı dəyişmədi. Biz bunları dəyişdik. Biz kiminsə gəlib bizim üçün hər bir şeyi düzəldəcəyinə inanmağı dayandırdıq. Beynəlxalq vasitəçiliklə bağlı bütün ümidlərimiz tam alt-üst oldu. Biz ədaləti, beynəlxalq hüququ, suverenliyimizi və ərazi bütövlüyümüzü bərpa etdik, sonra isə sülhə nail olduq.

Fəxrəddin Vəliyev

YAP Şəmkir rayon təşkilatının sədri

Paylaş:

Baxılıb: 225 dəfə