Azərbaycan qlobal güc mərkəzinə çevrilir

Bakı:

13 °C

82 %

5 m/s

Əlaqə

AZ RU EN

Ana səhifə / YAP xəbərləri / Azərbaycan qlobal güc mərkəzinə çevrilir

Azərbaycan qlobal güc mərkəzinə çevrilir

13.02.2026 [15:23]

Bu gün Azərbaycan Respublikası dünyada artan nüfuz və strateji təsir potensialını bir daha nümayiş etdirdi. Ötən illərdə ölkəmizin regional və beynəlxalq səhnədə əldə etdiyi uğurlar, onun sülh, əməkdaşlıq və sabitlik təşəbbüslərinin qlobal tərəfdaşlar tərəfindən yüksək qiymətləndirilməsi ilə əks-səda tapır. Prezident İlham Əliyevin rəhbərliyi altında Azərbaycan dünyanın ən qüdrətli dövlətləri ilə qarşılıqlı hörmətə əsaslanan partnyorluqlar quraraq yeni tarixi mərhələyə qədəm qoyur — bu həm iqtisadi, həm də siyasi diplomatiyada özünü daha qabarıq göstərir. Bu baxımdan, 10 fevral 2026-cı il tarixdə ölkəmizə rəsmi səfər edən ABŞ-ın Vitse-prezidenti Cey. Di. Vens ilə keçirilən görüş və səsləndirilən bəyanatlar Azərbaycanın beynəlxalq aləmdə oynadığı rolu daha da gücləndirdi.

Həmin görüş çərçivəsində Azərbaycan Respublikasının Prezidenti İlham Əliyev və Amerika Birləşmiş Ştatlarının Vitse-prezidenti Ceyms Devid Vens mətbuata birgə bəyanatlarla çıxış etdilər. Bakı şəhərindəki bu yüksək səviyyəli görüş iki ölkə arasında münasibətlərin daha da dərinləşdirilməsi istiqamətində mühüm addım kimi qiymətləndirildi və beynəlxalq əməkdaşlıq gündəliyində yeni səhifə açdı.

Prezident İlham Əliyev çıxışında ABŞ Vitse-prezidentini Azərbaycanda salamlamağın böyük şərəf olduğunu vurğuladı. O, bu günün ikitərəfli gündəlikdə yer alan müxtəlif məsələlər ətrafında çox məhsuldar müzakirələrə zəmin yaratdığını qeyd edərək, Tramp-Vens administrasiyasının Azərbaycana qarşı göstərdiyi müsbət münasibətə görə təşəkkürünü bildirdi. Xüsusilə bu səfərin nəticəsi olaraq imzalanan Strateji Tərəfdaşlıq Xartiyasının, altı ay ərzində iki tərəfin komandasının birgə səylərinin təzahürü olduğunu qeyd etdi və bunun ikitərəfli əməkdaşlıq üçün yeni imkanlar açdığını vurğuladı.

Dövlət başçısı ABŞ ilə strateji tərəfdaşlıq münasibətlərinin genişləndirilməsinin Azərbaycanın xarici siyasətində prioritet olduğunu qeyd edərək, bu əməkdaşlığın təhlükəsizlik, enerji və digər strateji sahələrdə qarşılıqlı faydalı proqramlar əsasında davam edəcəyini bildirdi. Prezident Əliyev, ABŞ kimi dünyanın ən qüdrətli ölkəsi ilə münasibətlərin inkişafının Azərbaycan üçün böyük əhəmiyyət kəsb etdiyini diqqətə çatdırdı.

Vitse-prezident Ceyms Devid Vens çıxışında Azərbaycan Prezidenti İlham Əliyevə sülh prosesinə göstərdiyi səylərə görə xüsusi təşəkkür etdi. O, bu səfərin regional sabitlik, iqtisadi əməkdaşlıq və sülhün möhkəmləndirilməsi istiqamətində vacib addım olduğunu vurğuladı və iki ölkə arasında dialoqun gələcəkdə də davam etdiriləcəyinə əminlik bildirdi.

Bu görüş və birgə bəyanatlar fonunda imzalanan Strateji Tərəfdaşlıq Xartiyası Azərbaycan-ABŞ münasibətlərinin yeni mərhələyə qədəm qoymasını simvolizə edir. Sənədin məqsədi qarşılıqlı anlaşmanı daha da möhkəmləndirmək, təhlükəsizlik sahəsində əməkdaşlığı genişləndirmək, enerji, texnologiya və digər strateji sahələrdə daha sıx iş birliyi yaratmaqdır.

Bu səfər və verilən bəyanatlar, həmçinin Azərbaycanın beynəlxalq arenada rolunun gücləndirilməsi, regiondakı sabitlik və əməkdaşlıq mühitinin təşviqi istiqamətində atılan mühüm addım kimi dəyərləndirilir. Prezident İlham Əliyevin və Vitse-prezident Ceyms Devid Vensin mətbuata verdikləri bəyanatlar, həm iki ölkə arasında dostluq münasibətlərinin daha da inkişaf etdirilməsi, həm də regional və qlobal səviyyədə sülh və əməkdaşlıq üçün yeni perspektivlərin açılması baxımından mühüm əhəmiyyət kəsb edir.

Fidan Hüseynova

YAP Quba rayon təşkilatının sədri

Paylaş:

Baxılıb: 457 dəfə