Qonşularla hörmət və etimad üzərində qurulan siyasət

Bakı:

11 °C

87 %

7 m/s

Əlaqə

AZ RU EN

Ana səhifə / YAP xəbərləri / Qonşularla hörmət və etimad üzərində qurulan siyasət

Qonşularla hörmət və etimad üzərində qurulan siyasət

06.03.2026 [14:00]

Müasir beynəlxalq münasibətlər sistemində dövlətlərin suverenliyi, ərazi bütövlüyü və təhlükəsizliyi ən fundamental prinsiplərdən hesab olunur. Bu prinsiplərin pozulması isə yalnız iki dövlət arasında münasibətləri deyil, bütövlükdə regionda sabitliyi və təhlükəsizlik mühitini təhdid edir. Son günlərdə baş verən hadisələr, xüsusilə Naxçıvan istiqamətində həyata keçirilmiş dron hücumları regionda gərginliyin süni şəkildə artırılmasına yönəlmiş təhlükəli addım kimi qiymətləndirilməlidir. Bu hücumların İran İslam Respublikası ərazisindən həyata keçirilməsi isə məsuliyyətin tam şəkildə həmin dövlətin üzərinə düşdüyünü göstərir. Mülki infrastruktura qarşı dron zərbələrinin endirilməsi beynəlxalq humanitar hüququn və dövlətlərarası münasibətlərin qəbul edilmiş norma və prinsiplərinin kobud şəkildə pozulması deməkdir. Xüsusilə mülki vətəndaşların istifadə etdiyi obyektlərin, o cümlədən hava limanlarının hədəfə alınması bu addımın hərbi deyil, daha çox siyasi və psixoloji təzyiq xarakteri daşıdığını göstərir. Belə bir davranış dinc əhaliyə qarşı yönəlmiş təhlükəli hal kimi qiymətləndirilə bilər. Tarix boyu Azərbaycan regionda sülhün, qarşılıqlı hörmətin və mehriban qonşuluq münasibətlərinin tərəfdarı kimi çıxış edib. Dövlətimizin xarici siyasətində qonşu ölkələrlə qarşılıqlı etimada əsaslanan münasibətlər həmişə prioritet olub. Azərbaycan heç vaxt öz ərazisindən başqa dövlətlərə qarşı təhlükə mənbəyi yaratmayıb və regionda sabitliyin qorunmasına mühüm töhfələr verib. Baş vermiş hadisə həm siyasi, həm də mənəvi baxımdan ciddi təəssüf doğurur və münasibətlərə xələl gətirən addım kimi qiymətləndirilir. Xüsusilə diqqətəlayiq məqam ondan ibarətdir ki, Azərbaycan tərəfi hər zaman humanizm və həmrəylik prinsiplərinə sadiq qalıb. Hətta çətin məqamlarda belə qonşu dövlətlərə dəstək göstərilməsi, humanitar yardımların təşkili və diplomatik etiketin qorunması Azərbaycanın dövlətçilik ənənəsinin tərkib hissəsidir. Prezident cənab İlham Əliyev İranın Ali Liderinin vəfatı ilə bağlı dərhal başsağlığı vermiş və bu münasibətlə diplomatik həmrəylik nümayiş etdirmişdir. Bu fakt Azərbaycanın riyakar deyil, səmimi və prinsipial siyasət yürüdən dövlət olduğunu bir daha sübut edir. Bütün bunların fonunda Naxçıvan ərazisində mülki obyektin hədəfə alınması sülhə xidmət etmir, əksinə qarşılıqlı etimadı sarsıdır və gərginliyi artırır.

Tarix göstərir ki, Azərbaycana qarşı yönəlmiş hər bir təxribat və təhdid sonda öz müəlliflərini peşman edib. Azərbaycan dövləti beynəlxalq hüquqa və diplomatik prinsiplərə sadiq qalaraq hadisəyə obyektiv qiymət verilməsini və məsul tərəfin aydın izahat təqdim etməsini gözləyir. Bununla yanaşı, dövlətimizin öz təhlükəsizliyini qorumaq və vətəndaşlarının təhlükəsizliyini təmin etmək üçün bütün hüquqi və siyasi vasitələrdən istifadə etmək haqqı vardır. Şübhəsiz ki, bu cür hücumlar cavabsız qalmayacaq və regionda sülhün qorunması üçün zəruri tədbirlər görüləcəkdir. Belə bir mərhələdə əsas məqsəd regionda gərginliyin dərinləşməsinə deyil, beynəlxalq hüquq normalarına əsaslanan ədalətli və məsuliyyətli münasibətlərin bərpa olunmasına nail olmaqdır. Azərbaycanın mövqeyi isə dəyişməzdir: suverenliyə hörmət, sülhə sadiqlik və dövlət maraqlarının qətiyyətlə müdafiəsi. Bununla yanaşı, baş verən hadisələr daha geniş kontekstdə də qiymətləndirilməlidir. Uzun illərdir ki, İran İslam Respublikası daxilində yaşayan milyonlarla azərbaycanlı müxtəlif formalarda təzyiq və məhdudiyyətlərlə üzləşir. Ana dilində təhsil hüququnun məhdudlaşdırılması, milli kimliyin ifadəsinə qarşı sərt münasibət, ictimai fəalların təqib edilməsi və cəzalandırılması bu siyasətin açıq təzahürləridir. Bu cür yanaşma yalnız insan hüquqları prinsiplərinə deyil, həm də regionda xalqlar arasında etimad və qarşılıqlı hörmət mühitinə ciddi zərbə vurur. Tarixən böyük mədəniyyət və dövlətçilik ənənələrinə malik olan azərbaycanlıların hüquqlarının məhdudlaşdırılması müasir dövrün humanitar dəyərləri ilə qətiyyən uzlaşmır.

Azərbaycanın müstəqilliyi, ərazi bütövlüyü və təhlükəsizliyi dövlət siyasətinin əsas prioritetlərindəndir və bu prinsiplərdən geri çəkilmək mümkün deyil. Bu baxımdan Naxçıvan istiqamətində həyata keçirilmiş hücumlar yalnız siyasi bəyanatlarla deyil, həm də beynəlxalq hüququn imkan verdiyi çərçivədə qiymətləndirilməlidir. Bu gün Azərbaycan güclü dövlət, möhkəm siyasi iradə və qətiyyətli liderlik nümayiş etdirən ölkədir. Prezident cənab İlham Əliyev tərəfindən həyata keçirilən düşünülmüş və prinsipial siyasət nəticəsində ölkəmiz regionun ən sabit və nüfuzlu dövlətlərindən birinə çevrilmişdir. Azərbaycan sülh tərəfdarıdır, lakin eyni zamanda öz milli maraqlarını və təhlükəsizliyini qətiyyətlə müdafiə etmək əzmindədir.

Səfa Ağayev
YAP İmişli rayon təşkilatının sədri

Paylaş:

Baxılıb: 273 dəfə