Naxçıvana Dron Hücumu: Azərbaycanın Suverenliyi və Regional Təhlükəsizliyə Qəti Mövqeyi

Bakı:

10 °C

81 %

2 m/s

Əlaqə

AZ RU EN

Ana səhifə / YAP xəbərləri / Naxçıvana Dron Hücumu: Azərbaycanın Suverenliyi və Regional Təhlükəsizliyə Qəti Mövqeyi

Naxçıvana Dron Hücumu: Azərbaycanın Suverenliyi və Regional Təhlükəsizliyə Qəti Mövqeyi

06.03.2026 [17:11]

Naxçıvan Muxtar Respublikasının ərazisinə İran İslam Respublikası ərazisindən həyata keçirilmiş dron hücumu təkcə bir hərbi insident deyil, həm də regionda dövlətlərarası münasibətlərin mahiyyətinə dair ciddi suallar yaradan təhlükəli hadisədir. Bu hücum qətiyyətlə pislənilməli və baş vermiş hadisəyə görə məsuliyyət tam şəkildə İran İslam Respublikasının üzərinə düşür. Dövlətlərin ərazisindən digər dövlətlərə qarşı həyata keçirilən hər hansı əməliyyat beynəlxalq hüququn norma və prinsiplərinə açıq şəkildə ziddir və regionda gərginliyin artmasına xidmət edir.

İran Silahlı Qüvvələrinin Naxçıvan ərazisinə dron zərbəsi endirməsi yalnız hərbi baxımdan deyil, həm də siyasi və diplomatik baxımdan regionda etimad mühitinə ciddi zərbədir. Bu addım, molla rejiminin nankorluğu və riyakarlığının göstəricisi olaraq qiymətləndirilə bilər. Uzun illər Azərbaycan qonşuluq prinsiplərinə sadiq qalıb və ərazisindən heç vaxt digər dövlətlər üçün təhlükə olmayıb.

Hadisənin ən narahatedici tərəfi isə hücumun mülki infrastruktura yönəlməsidir. Dinc sakinlərin və mülki obyektlərin hədəf alınması yalnız acizlik və qorxaqlıq əlaməti deyil, həm də beynəlxalq hüquqa açıq şəkildə ziddir. Bu cür hücumlar regionun təhlükəsizlik balansını pozmaqla yanaşı, humanitar baxımdan da qəbuledilməzdir.

Azərbaycanın mövqeyi aydındır: ölkəmiz qonşularına hörmətlə yanaşıb və çətin dövrlərdə də dəstək göstərib. Prezident İlham Əliyev İranın Ali Liderinin ölümü ilə bağlı dərhal başsağlığı verib və səfirliyi ziyarət edib. Azərbaycan hətta İrana humanitar yardım göndərməyi də planlaşdırırdı ki, bu da ölkəmizin prinsipial və riyakar olmayan siyasətini nümayiş etdirir.

Bu şəraitdə Naxçıvan ərazisində mülki obyektlərin, o cümlədən mülki vətəndaşların istifadə etdiyi hava limanının hədəf alınması dinc sakinlərə və mülki infrastruktura qarşı terror aktı kimi qiymətləndirilməlidir. Eyni zamanda, İran daxilində yaşayan azərbaycanlıların hüquqlarının məhdudlaşdırılması və fəalların təqib olunması hadisənin humanitar ölçüsünü daha da önə çıxarır.

Tarixi təcrübə göstərir ki, Azərbaycana qarşı yönəlmiş hücumlar heç vaxt cavabsız qalmayıb. Ölkəmiz həm güclü dövlət quruluşu, həm də milli həmrəylik sayəsində öz suverenliyini qorumaqda davam edir. Bu baxımdan, Naxçıvana yönəlmiş hər hansı hücum yalnız təhlükəsizlik məsələsi deyil, eyni zamanda Azərbaycanın prinsipial dövlət mövqeyinin testidir.

Azərbaycan tərəfi müvafiq cavab tədbirlərini görmək hüququnu özündə saxlayır və bu hücum aktları cavabsız qalmayacaq. Bu hüquq beynəlxalq hüququn fundamental prinsipləri ilə təsbit olunub və dövlətin əsas vəzifələrindən biri olan vətəndaşların qorunması ilə birbaşa bağlıdır.

Azərbaycanın siyasətində qonşuluq prinsipinə sadiqlik və humanist yanaşma həmişə prioritet olub. Lakin bu siyasət ölkənin suverenliyi və təhlükəsizliyi hesabına həyata keçirilə bilməz. Naxçıvana yönəlmiş hər hansı hücum cavabsız qalmayacaq və məsul tərəf öz səhvlərinin nəticələrinə məruz qalacaq.

Naxçıvana dron hücumu region dövlətləri üçün ciddi mesajdır: Azərbaycanın təhlükəsizliyi ilə bağlı kompromis yoxdur, beynəlxalq hüququn norma və prinsiplərinin pozulması cavabsız qalmayacaq. Azərbaycan prinsipial mövqeyini dəyişməz olaraq qoruyacaq və regionda sülhün və sabitliyin tərəfdarı olaraq qalacaq.

Anar Məmmədov

YAP Gədəbəy rayon təşkilatının əməkdaşı

Paylaş:

Baxılıb: 362 dəfə