Tovuzda 8 Mart – Beynəlxalq Qadınlar Günü münasibətilə tədbir keçirilib

Bakı:

11 °C

82 %

7 m/s

Əlaqə

AZ RU EN

Ana səhifə / YAP xəbərləri / Tovuzda 8 Mart – Beynəlxalq Qadınlar Günü münasibətilə tədbir keçirilib

Tovuzda 8 Mart – Beynəlxalq Qadınlar Günü münasibətilə tədbir keçirilib

07.03.2026 [13:32]

06 mart 2026-cı il tarixdə Yeni Azərbaycan Partiyası Tovuz rayon təşkilatının inzibati binasında 8 Mart – Beynəlxalq Qadınlar Günü münasibətilə partiya fəalları ilə görüş keçirilib.

Tədbir Azərbaycan Respublikasının Dövlət Himninin səsləndirilməsi ilə başlayıb, Ulu Öndər Heydər Əliyevin və Vətən uğrunda canlarından keçmiş şəhidlərimizin əziz xatirəsi bir dəqiqəlik sükutla yad edilib.

Tədbirdə çıxış edən YAP Tovuz rayon təşkilatının sədri Nihad Pənahov qadınları bayram münasibətilə təbrik edərək bildirib ki, Azərbaycan qadını yüksək mənəvi dəyərlərin daşıyıcısı, ailənin və cəmiyyətin əsas dayağı olmuşdur. O qeyd edib ki, Ulu Öndər Heydər Əliyev hər zaman Azərbaycan qadınının cəmiyyət həyatında roluna yüksək qiymət vermiş, onların dövlət idarəçiliyində və ictimai-siyasi həyatda fəal iştirakını xüsusi diqqətdə saxlamışdır. Bu siyasətin bu gün Azərbaycan Respublikasının Prezidenti, Yeni Azərbaycan Partiyasının Sədri cənab İlham Əliyev tərəfindən uğurla davam etdirildiyi vurğulanıb.

Bildirilib ki, həyata keçirilən məqsədyönlü dövlət siyasəti nəticəsində Azərbaycan qadınları ölkəmizin ictimai-siyasi, sosial-iqtisadi və mədəni həyatında fəal iştirak edir, müxtəlif sahələrdə mühüm uğurlara imza atırlar. Qeyd olunub ki, Birinci vitse-prezident Mehriban xanım Əliyevanın həyata keçirdiyi genişmiqyaslı humanitar və sosial layihələr də Azərbaycan qadınının cəmiyyətdəki nüfuzunun daha da artmasına mühüm töhfə verir.

Sədr çıxışının sonunda qadınları bir daha 8 Mart – Beynəlxalq Qadınlar Günü münasibətilə təbrik edib, onlara möhkəm cansağlığı, ailə səadəti və fəaliyyətlərində yeni uğurlar arzulayıb.

Daha sonra Tovuz Təhsil Sektorunun müdiri Aysel Quliyeva və Tovuz Dövlət Sosial-İqtisadi Kolleci Publik Hüquqi Şəxsin direktoru Nigar Səfxanova çıxış edərək 8 Mart – Beynəlxalq Qadınlar Günü münasibətilə qadınları səmimi qəlbdən təbrik edib, onlara möhkəm cansağlığı, xoşbəxtlik və fəaliyyətlərində yeni uğurlar arzulayıblar. Çıxışlarda Azərbaycan qadınının cəmiyyətin inkişafında mühüm rol oynadığı, milli-mənəvi dəyərlərimizin qorunub saxlanılmasında və gələcək nəsillərin vətənpərvərlik ruhunda yetişdirilməsində böyük xidmətlər göstərdiyi vurğulanıb.

Qeyd olunub ki, bu gün ölkəmizdə həyata keçirilən uğurlu dövlət siyasəti nəticəsində qadınların hüquqları yüksək səviyyədə qorunur, onların ictimai-siyasi, sosial-iqtisadi və mədəni həyatın bütün sahələrində fəal iştirakı üçün geniş imkanlar yaradılıb. Bildirilib ki, Azərbaycan qadınları təhsil, elm, səhiyyə, mədəniyyət və digər sahələrdə əldə etdikləri nailiyyətlərlə ölkəmizin inkişafına mühüm töhfələr verirlər.

Çıxışlardan sonra 8 Mart – Beynəlxalq Qadınlar Gününə həsr olunmuş videoçarxa baxış keçirilib. Sonda qadınlara rayon təşkilatı adından gül buketləri təqdim olunub.

Tədbirin rəsmi hissəsi Yeni Azərbaycan Partiyası Himninin səsləndirilməsi ilə sona çatıb.

Paylaş:

Baxılıb: 516 dəfə