Dünya Ürək Günüdür

Bakı:

27 °C

46 %

4 m/s

Əlaqə

AZ RU EN

Ana səhifə / Xəbər lenti / Dünya Ürək Günüdür

Dünya Ürək Günüdür

29.09.2022 [10:30]

Ürəyi necə qorumalı?

G.QABİLQIZI

Qan dövranı sisteminin mərkəzi hissəsi olan ürək bədənin ən vacib orqanlarından biri hesab olunur, belə ki, kiçik bir pozğunluq və ya anormallıq insan orqanizmində ciddi dəyişikliklərə və ya təsirlərə səbəb ola bilər. Buna görə də, həkimlər mütəmadi olaraq müvafiq müayinədən keçməyi məsləhət bilirlər. Çünki ürək xəstəliklərini əvvəlcədən bilmək, onun fəsadları barədə tədbirlər görmək bu xəstəliyin profilaktikasında olduqca vacibdir. İnsanların bu məsələlərə daha da həssas yanaşmasını təmin etmək məqsədilə 1999-cu ildə Ümumdünya Ürək Federasiyasının təşəbbüsü ilə ilk dəfə Dünya Ürək Günü təşkil edilib.

Dünya Səhiyyə Təşkilatı, UNESCO və digər mühüm təşkilatlar həmin təşəbbüsü dəstəkləyiblər. Əvvəlcə onu sentyabrın son bazar günü qeyd edirdilər, 2011-ci ildən isə sentyabrın 29-da keçirirlər. Dünya Səhiyyə Təşkilatı ilə əməkdaşlıq çərçivəsində Ümumdünya Ürək Federasiyası 100-dən çox ölkədə tədbirlər keçirir. Həmin günün proqramına kütləvi sağlamlıq yoxlamaları, ictimai mühazirələr, elmi forumlar, sərgilər, konsertlər, gəzintilər və idman yarışları daxildir. Hər il keçirilən Ürək Günü ürəyin sağlamlığı ilə bağlı müəyyən mövzuya həsr edilir. Dünya Ürək Günü “Həyat üçün ürək” şüarı altında keçirilir.

Hazırda ürək-damar xəstəlikləri dünyada ölümün və əlilliyin əsas səbəblərindən biri sayılır və həmin xəstəlik hər il 17 milyondan çox insanı həyatdan aparır. Ürək-damar xəstəlikləri və insultun yaranmasının risk amilləri qan təzyiqinin yüksəlməsi, qanda xolesterin və qlükozanın miqdarının artması, siqaret çəkmək, artıq çəki, piylənmə və fiziki hərəkətsizlik, meyvə və tərəvəzlərlə qidalanmanın azlığıdır. Yeri gəlmişkən, ürək-damar xəstəliklərinin inkişafına gətirib çıxaran səbəb uşaq və yeniyetmə yaşında formalaşan qeyri-sağlam həyat tərzidir. Ona görə də xəstəliyin profilaktikasına uşaq vaxtlarından başlamaq lazımdır.

Ümumdünya Ürək Federasiyasının məlumatına görə, sağlam həyat tərzi keçirmək, tütün istifadəsini məhdudlaşdırmaq, qidalanmanı nəzarətdə saxlamaq və fiziki fəallığı artırmaq hesabına infarkt və insult nəticəsində baş verən erkən ölümlərin 80 faizinin qarşısını almaq olar.

Ürək-damar xəstəliklərinin simptomları...

Məlum olduğu kimi, xəstəliyi əvvəlcədən bilmək müalicə ərəfəsində müsbət dəyişikliyə səbəb olur. Ona görə də, bu xəstəliyin simptomları barədə məlumatlı olmaqda fayda var. Onlardan bir neçəsi sinə ağrısı (angina pektoris), nəfəs darlığı, ürək döyüntüsü və huşun itirilməsidir. Eləcə də tıxanmış damardan qidalanan orqanla əlaqəli simptomlar var. Məsələn, ayaq ağrısı, soyuqlama, ayaq damarlarının tıxanmasından yaranan uyuşma və ümumi zəiflik.

Nələrə diqqət etməli?

Ürəyin fəaliyyətini yaxşılaşdırmaq və sağlam ürəyə sahib olmaq istəyiriksə, bunun üçün bir sıra qaydalara əməl etməliyik. Əvvəla, sağlam qidalanma, daimi fiziki fəaliyyətlə məşğul olmaq, tütün və tütün məmulatlarından, alkoqoldan uzaq durmaq lazımdır. Bundan əlavə, müayinələr çərçivəsində ürək-damar riskini bilməli, çəkini, qan təzyiqini və şəkərini mütəmadi yoxlamalıyıq. Eləcə də həkimin verdiyi sağlam həyat tərzinə riayət edərək daha keyfiyyətli bir yaşam sürmüş olarıq.

Paylaş:

Baxılıb: 568 dəfə