Türk dünyası memarları Şuşada

Bakı:

26 °C

45 %

4 m/s

Əlaqə

AZ RU EN

Ana səhifə / Xəbər lenti / Türk dünyası memarları Şuşada

Türk dünyası memarları Şuşada

25.11.2023 [15:08]

Yeganə BAYRAMOVA

Qarabağda, ümumiyyətlə, işğaldan azad edilmiş bölgələrdə tikinti, quruculuq və bərpa işləri gündən-günə yeni vüsət alır. Bütün bu işlər dövlət başçısının şəxsi nəzarətində olduğundan bu yerlərə tez-tez səfər edir, görülən işlərlə yaxından tanış olur, tapşırıq və tövsiyələrini verir. Şuşa Azərbaycanın tarixi-mədəni, ictimai-siyasi həyatının mühüm mərkəzlərindən biri, ölkəmizin mədəniyyət beşiyi, “Qafqazın konservatoriyası” olub. Şəhərin ərazisi tarixi-memarlıq abidələri ilə zəngindir.

Rəsmi məlumata görə, Şuşada 549 qədim bina, ümumi uzunluğu 1203 metr olan daş döşənmiş küçələr, 17 məhəllə bulağı, 17 məscid, 6 karvansara, 3 türbə, 2 mədrəsə, 2 qəsr və qala divarları mövcud idi. O cümlədən 72 tarixi abidə, həmçinin bir sıra dövlət xadimlərinin və tanınmış şəxsiyyətlərin mülkləri, ev-müzeyləri var. Ermənistanın Azərbaycana qarşı apardığı 30 illik işağalçılıq siyasəti nəticəsində buradakı tarixi-mədəniyyət abidələri yerlə yeksan edilib. Lakin bu gün ölkə başçısının göstərişi ilə ermənilər tərəfindən dağıdılan tarixi-memarlıq abidələrimiz bərpa edilir.

6 ölkənin memarları Şuşada…

Bu günlərdə Şuşada Türk dünyası memarlarının simpoziumu keçirilir. Heydər Əliyevin 100 illiyi çərçivəsində təşkil olunan tədbirdə Azərbaycan, Türkiyə, Özbəkistan, Qazaxıstan, Qırğızıstan və Macarıstandan olan 60-a yaxın memar iştirak edir. Onlar Şuşada aparılan və nəzərdə tutulan tarixi memarlıq abidələrinin bərpası, konservasiyası, tarixi mühitin abadlaşdırılması mövzularında müzakirələr aparacaq, təqdimatla çıxış edəcəklər.

Tədbirin rəsmi açılış mərasimi torpaqların azadlığı və bütövlüyü uğrunda canından keçmiş şəhidlərin ruhunun bir dəqiqəlik sükutla yad edilməsi ilə başladı. Daha sonra Şuşada aparılan bərpa-quruculuq işləri ilə bağlı qısa video nümayiş etdirildi.

Rəsmi çıxışlardan sonra iştirakçı ölkələrin hər birinin memarlığını, tarixi abidələrini, mədəniyyətini özündə əks etdirən videolar nümayiş olundu. Daha sonra panel müzakirələrə start verildi.

Qeyd edək ki, simpozium iki gün davam edəcək. Tədbirdə “Qoruq idarəetməsində və icma ilə işdə problemlər, çağırışlar və yeniliklər”, “Tarixi şəhərlərin regenerasiya siyasətləri və sənədləri”, “Abidə və qoruq şəhərlərin qorunma qanunvericiliyi”, “Tarixi şəhərlərin iqtisadi və turistik imkanları və çağırışları”, “Tarixi Şəhər Mühitinin qorunması və müasir tələblərə adaptasiyası” və digər mövzular ətrafında panel müzakirələri aparılacaq.

Paylaş:

Baxılıb: 513 dəfə