“İnsan Hüquqları - 75 Bakı Konfransı...

Bakı:

21 °C

78 %

4 m/s

Əlaqə

AZ RU EN

Ana səhifə / Xəbər lenti / “İnsan Hüquqları - 75 Bakı Konfransı...

“İnsan Hüquqları - 75 Bakı Konfransı...

01.12.2023 [09:57]

İnsan hüquqlarına həsr olunmuş konfrans keçirilib

N.BAYRAMLI

Noyabrın 30-da Azərbaycan Respublikasının İnsan Hüquqları üzrə Müvəkkili (Ombudsman) Aparatının, BMT-nin Azərbaycan Nümayəndəliyinin və Vəkillər Kollegiyasının birgə təşkilatçılığı ilə Ümumdünya İnsan Hüquqları Bəyannaməsinin 75 illiyinə həsr olunmuş “İnsan Hüquqları - 75 Bakı Konfransı: Qlobal və milli çağırışların həlli üçün universallığın və bölünməzliyin təşviq edilməsi” mövzusunda beynəlxalq konfrans keçirilib. Konfransda dövlət qurumlarının, beynəlxalq təşkilatların və vətəndaş cəmiyyəti institutlarının nümayəndələri iştirak ediblər.

Tədbir Dövlət Himninin səsləndirilməsi ilə başlayıb.

Konfransda çıxış edən Azərbaycanın İnsan hüquqları üzrə müvəkkili (ombudsman) Səbinə Əliyeva bildirib ki, Azərbaycan ikili standartlardan və ayrı-seçkilikdən ən çox əziyyət çəkən ölkələrdən biridir. Ermənistan uzun illər boyu azərbaycanlılara qarşı kəskin nifrət zəminində etnik təmizləmə, deportasiya və soyqırımı siyasəti həyata keçirib. Bu gün dünya ictimaiyyəti Ümumdünya İnsan Hüquqları Bəyannaməsində və digər beynəlxalq sənədlərdə təsbit olunmuş insan hüquqlarının kütləvi pozulması hallarına biganə qalır.

Müvəkkil otuz ilə yaxın müddətdə işğal altında saxlanılmış və İkinci Qarabağ müharibəsi nəticəsində azad edilmiş ərazilərimizdə aşkar olunan kütləvi məzarlıqların, əksər şəhər və kəndlərin, tarixi, mədəni, dini abidələrin dağıdılmasının, ərazilərimizin minalarla çirkləndirilməsinin ölkəmizə qarşı həyata keçirilmiş bu siyasəti bir daha sübut etdiyini diqqətə çatdırıb. S.Əliyeva, həmçinin Birinci Qarabağ müharibəsində itkin düşmüş 4000-ə yaxın soydaşımızın taleyinə hələ də aydınlıq gətirilməməsinin narahatlıq hissi yaratdığını bildirib. Onun sözlərinə görə, Azərbaycanda insan hüquq və azadlıqlarının təmini və təşviq edilməsi daim diqqət mərkəzində saxlanılır, qanunvericilik bazası beynəlxalq hüququn normalarına müvafiq mütəmadi olaraq təkmilləşdirilir. Ölkədə BMT-nin Dayanıqlı İnkişaf Məqsədlərinin yerinə yetirilməsi prosesinin sürətləndirilməsi üçün geniş imkanlar yaradılıb.

Xarici işlər nazirinin müavini Yalçın Rəfiyev isə çıxışında deyib ki, Ermənistan- Azərbaycan münaqişəsinin bitməsindən sonra insan hüquqlarının müdafiəsi sahəsində böyük işlər görülməlidir. Həmçinin bu sahədə beynəlxalq təşkilatların da səyi önəmlidir. Onun sözlərinə görə, Azərbaycan BMT-nin İnsan Hüquqları Şurası ilə geniş şəkildə əməkdaşlıq edir və quruma öz töhfəsini verir: “Azərbaycan nəinki mili qisimdə, həmçinin Qoşulmama Hərəkatında da fəal şəkildə iştirak edir”.

Çıxış edən Vəkillər Kollegiyasının sədri Anar Bağırov söyləyib ki, Azərbaycan insan hüquqlarına sadiqliyini sözdə deyil, əməldə sübut edib. Azərbaycan hər zaman Ümumdünya İnsan Hüquqları Bəyannaməsinə xüsusi yanaşması ilə fərqlənib. “Azərbaycan Prezidenti İlham Əliyevin insan hüquqları sahəsində irəli sürdüyü təkliflər ölkənin milli qanunvericilik sisteminin inkişafına gətirib çıxarıb. Ölkədə vəkillik institutunun inkişafı da diqqət mərkəzindədir”, - deyə Vəkillər Kollegiyasının sədri vurğulayıb.

“Fransa və Qərbin digər dövlətləri insan hüquqlarından bəzi xalqlara, ölkələrə qarşı təsir vasitəsi kimi istifadə edir. Azərbaycan da hər gün total “hücum”lar qarşısında qalır”. Bu sözləri isə Sosial Tədqiqatlar Mərkəzinin (STM) İdarə Heyətinin və Milli Məclisin İnsan hüquqları komitəsinin sədri Zahid Oruc deyib. Onun sözlərinə görə, dünya birliyi bu gün Ümumdünya İnsan Hüquqları Bəyannaməsinin yaradılmasının əsas məqsədini unudur: “İnsan hüquqlarının müdafiəsi adı altında dünyada ərazilərin bölüşdürülməsi uğrunda mübarizə gedir”.

Konfransda digər çıxış edənlər də ölkəmizdə insan hüquq və azadlıqlarının təminatının dövlətimizin ali vəzifələrindən biri olduğunu vurğulayıblar.

Paylaş:

Baxılıb: 555 dəfə