“Azərbaycan” deyiləndə ayağa dur!

Bakı:

24 °C

58 %

3 m/s

Əlaqə

AZ RU EN

Ana səhifə / Xəbər lenti / “Azərbaycan” deyiləndə ayağa dur!

“Azərbaycan” deyiləndə ayağa dur!

28.12.2023 [10:23]

Sovetlər birliyində böyümüş əksər uşaqlar kimi mən də Yeni ili çox sevirdim. Bir az rəngli işıqların parıltısı, bir az yeni başlanğıcların gətirdiyi mübarizə ruhu xoşuma gəlirdi. Ta ki “31 Dekabr Dünya Azərbaycanlılarının Həmrəylik Günüdür” şüarına qədər... Bundan sonra içimdə adını bilmədiyim qəribə bir duyğu yarandı. Artıq 31 dekabr, sadəcə, təqvimdə bir gün, ilin son günü və ya yeni ilin astanası deyildi. İndi onun daha ciddi, daha məsuliyyətli bir anlamı vardı: dünyanın harasında yaşamasından, hansı dildə danışmasından, hansı dinə inanmasından, hansı siyasi əqidəyə sahib olmasından asılı olmayaraq bütün azərbaycanlıların həmrəylik, birlik günü! Biz unutmasaq da, bu gün bir daha kimliyimizi, tarixi köklərimizi, sahib olduqlarımızı bizə xatırladırdı. Pis qonşumuz olsa da, köçüb qurtara bilməyəcəyimizi; torpağın uğrunda ölən olduqda onun Vətən olduğunu; ömürdən pay olsa da, Vətəndən pay olmayacağını dönə-dönə işləyirdi ruhumuza.

Məncə, HƏMRƏYLİK sözü də bu mürəkkəb adda öz ilkin mənasından uzaqlaşıb daha geniş, daha uca, daha ülvi bir məna daşıyırdı: dövlətimiz və bayrağımız ətrafında sıx birləşmək, sözün əsl mənasında ordulaşmaq, yenilməz gücə çevrilmək! Bu söz artıq böyük şair Məmməd Arazın “ “Azərbaycan” deyiləndə ayağa dur ki, Ana yurdun ürəyinə toxuna bilər” misralarının qarşılığına çevrilmişdi desəm, yanılmaram. Artıq hamımız gücümüzün birliyimizdə olduğunun fərqində idik: gücümüzü ortaya qoymalı, gücümüz çatmayanı hədəf qoymalıydıq! Bir sözlə, 31 Dekabr Dünya Azərbaycanlılarının Həmrəylik Günü öz missiyasının böyük bir qismini həyata keçirə bilmişdi. Qırx dörd günlük Vətən müharibəsi və onun təfərrüatları hamıya məlumdur. Bu müharibədə əldə etdiyimiz Böyük Zəfərin başlıca səbəbi də məhz birliyimiz oldu - öz hərbi və siyasi zəkası ilə dünya “şah”larını mat qoyan Ali Baş Komandanımız, hərb tarixinə adını qızıl hərflərlə yazdıran yenilməz ordumuz və dünyanın dörd tərəfində ürəyi Azərbaycanla döyünən azərbaycanlıların birliyi. Bu qələbə 31 dekabrı Dünya Azərbaycanlılarının Həmrəylik Günü kimi təsis edən, sonra onu Azərbaycançılıq məfkurəsinə, ideologiyasına çevirən ümummilli lider Heydər Əliyevin nə qədər uzaqgörən siyasi dühaya sahib olduğunu bir daha sübut etdi. 90-cı illərin siyasi məngənəsində təxminən bir qərinə sonrakı Azərbaycanın uğur modelini çəkmək üçün həmin dövrün ölkə başçısı, siyasi lideri olmaq az idi. Bunun üçün əsl Vətən sevdalısı, Azərbaycan aşiqi, yeri gələndə Vətən daşı ola bilən vətəndaş olmaq lazım idi. O bilirdi ki, vaxtında atılan hər bir düşünülmüş addım böyük uğurların təməli və təminatıdır. Uzun illər sonra bu il ilk dəfə biz Dünya Azərbaycanlılarının Həmrəylik Gününü əsl bayram kimi qeyd edə biləcəyik. Çünki artıq üçrəngli bayrağımız torpaqlarımızın hər qarışında əzəmətlə dalğalanır, Vətənimizin hər bölgəsində söz haqqı bizimdir. Bunun üçün ilk növbədə bu qüruru bizə yaşadan şəhidlərimizin ruhlarına borcluyuq. Bu borcumuzu, bu minnətimizi unutmamalıyıq. İgid oğullarımızın qanları, canları bahasına VƏTƏN olan torpaqlarımızı, bu torpaqlardakı əmin-amanlığı qoruyub saxlamaq üçün birliyimizdən, vəhdətimizdən muğayat olmalıyıq. Bəzən fikir ayrılıqlarımız ola bilər. Amma mövzu Vətən olanda fikirlərimiz mövzudan ayrılmamalıdır. Unutmamalıyıq ki, hər kəsin öz fikri olsa da, hamımızın bir Vətəni var və bu Vətən üçün gücümüz birliyimizdədir!

Samirə Abbaszadə,

SDU-nun filologiya fakültəsinin

1-ci kurs tələbəsi

Paylaş:

Baxılıb: 584 dəfə