Yanlış məfhum, olmayan xalq...

Bakı:

15°C

82%

5m/s

Əlaqə

AZ RU EN

Ana səhifə / Analitik / Yanlış məfhum, olmayan xalq...

Yanlış məfhum, olmayan xalq...

20.09.2025 [10:15]

Xanım səfirin yüksək statusuna uyğun gəlməyən ifadələri

Finlandiyanın Ermənistandakı səfiri, xanım Kirsti Narinen bu günlərdə, yumşaq desək, qəribə açıqlama ilə gündəmə gəlib. Söhbət onun sentyabrın 15-də keçirilən “Hərtərəfli Təhlükəsizlik və Dayanıqlıq 2025” beynəlxalq konfransı çərçivəsində Ermənistan mətbuatına verdiyi müsahibəsində ifadə etdiyi qarışıq fikirlərdən gedir. Xüsusilə də xanım səfirin Silahlı Qüvvələrimizin yüksək peşəkarlıqla həyata keçirdiyi uğurlu 23 saatlıq antiterror əməliyyatından sonra Azərbaycanın Qarabağ bölgəsindən Ermənistana gedən erməni əsilli insanlar barədə işlətdiyi ifadələr qəbuledilməzdir. “Dağlıq Qarabağın məcburi köçkünlərinə, “artsax xalqına” gəlincə, bizim edə biləcəyimiz ən yaxşı şey Ermənistanın möhkəmliyini, rifahını artırmaqda və bu insanların burada məskunlaşması və öz həyatlarını tapması üçün iqtisadi, siyasi və sosial imkanlar yaratmaqda ona dəstək olmaqdır. Əgər uzunmüddətli perspektivdən danışırıqsa, bu nöqtədə mühakimə yürütmək mümkün deyil”, - deyə Finlandiyanı Ermənistanda təmsil edən səfir bildirib.

Erməni əsilli insanlar Qarabağdan zorla çıxarılmayıblar

Əvvəlcə xanım səfirin müsahibəsində “məcburi köçkünlər” ifadəsindən istifadə etməsinə diqqət çəkək. “Məcburi köçkün” statusu yaşayış yerlərindən zor gücünə çıxarılan insanlara şamil edilir. Müharibələr və digər belə fövqəladə hallarda elə şərait yaranır ki, sakinlər ev-eşiklərini məcburi və təcili qaydada tərk etmək məcburiyyətində qalırlar. Ötən əsrin doxsanıncı illərinin əvvəllərində Ermənistan havadarlarının dəstəyi ilə respublikamıza qarşı işğalçılıq siyasətinə başlayanda keçmiş Dağlıq Qarabağın və ətraf rayonların azərbaycanlı sakinləri məhz belə vəziyyətlə üz-üzə qalmışdılar. Həmin ərəfədə Ermənistanın silahlı birləşmələri dinc, əliyalın insanları hədəfə alır, onları ən amansız şəkildə soyqırımlarına məruz qoyur, ev-eşiklərini yandırırdılar, əmlaklarını talayırdılar. Xatırladaq ki, on minlərlə azərbaycanlı dinc sakin güllə yağışından canını qurtarmaq naminə qışın çovğununda ayaqyalın, başıaçıq meşələrə səpələnmək, Araz çayı vasitəsilə İrana keçmək məcburiyyətində qalmışdı. Amansız erməni terrorundan qurtulub həyatda qalan insanlar həqiqətən də məcburi köçkün idilər. O dövrdə Azərbaycan təxminən bir milyon qaçqın və məcburi köçkün ordusunu qarşıladı. Bu, əsl humanitar fəlakət idi. İnsanlar vaqonlarda, yarımçıq tikililərdə, çadırlarda məskunlaşmaq məcburiyyətində qalmışdılar.

İki il bundan əvvəl Azərbaycanın Qarabağ bölgəsini tərk edən erməni əsilli insanlara (biz burada “vətəndaş”, “sakin” sözlərini ona görə işlətmirik ki, köç edənlərin böyük əksəriyyəti Ermənistan vətəndaşı olan və yaxud xaricdən gətirilərək burada məskunlaşdırılmış ermənilər idi. Bununla separatçılar ərazidə demoqrafik vəziyyəti dəyişmək, ermənilərin say üstünlüyünə nail olmaq məqsədi güdürdülər - red.) ) gəldikdə isə vəziyyət tamam fərqli idi. Ermənilər Azərbaycan ərazilərini dinc və könüllü şəkildə tərk ediblər. Onlara heç kim təzyiq göstərməyib. Xanım səfirə xatırlatmaq istərdik ki, 44 günlük müharibədən sonra Xankəndidə və digər ərazilərdə yaşayan ermənilərə dəfələrlə Azərbaycan vətəndaşlığını qəbul etmək və qanunlarımız altında yaşamaq çağırışları ünvanlanmışdı. Azərbaycan bunu müstəqillik, suverenlik prinsiplərini əsas götürməklə edirdi və tam ədalətli idi. Xanım səfir diplomatdır və yaxşı bilir ki, heç bir dövlət öz ərazisində insanların qeyri-qanuni şəkildə məskunlaşmasına icazə verməz. 23 saatlıq antiterror əməliyyatından sonra ermənilərin Qarabağdan çıxmalarını əks etdirən foto və video materiallar internetdə yerləşdirlib, hər kəsə açıqdır. Ermənilər ərazilərimizi tam təhlükəsiz şəkildə tərk ediblər, hətta ev əşyalarını, mal-heyvan sürülərini də özləri ilə aparıblar. Yol boyunca onlara su, ərzaq, şirniyyatlar təklif olunub. Bütün bunlar Azərbaycanın humanist yanaşmasını ortaya qoyur. Burada hər hansı bir məcburi köçkünlükdən bəhs etmək, sadəcə, ağa qara deməkdir.

“Artsax” mifi

Erməni separatçıları uzun illər ərzində heç bir əsası olmayan miflərə uyaraq yaşayıblar. Kilsə, xaricdəki erməni lobbisi onların beyninə “Böyük Ermənistan”, “mədəni xalq”, “qəhrəman ordu” xülyalarını yeridiblər. Üç onilliyi əhatə edən işğal illərində ermənilərin ərazilərimizdə törətdikləri vəhşiliklər, qabaqlarına keçən hər şeyi talayıb dağıtmaları, 44 günlük müharibədə erməni əsgər və zabitlərinin kütləvi şəkildə fərarilik etmələri bu uydurma mifləri tamam dağıtdı.

“Artsax” məfhumu da bir mifdir. Tarixdə belə bir toponimə rast gəlinmir. Hər kəsə bəllidir ki, bu yerlərin aborigen sakinləri məhz azərbaycanlılar olublar, ermənilər isə buraya güc mərkəzlərinin geosiyasi maraqları naminə məqsədli şəkildə köçürülüblər. Xanım səfirin olmayan məfhumdan və xalqdan danışması absurddur və onun yüksək statusuna uyğun gəlmir. Bu, həm də Azərbaycanın ərazi bütövlüyünü və postmüharibə mərhələsində başlayan, artıq məntiqi sonluğa çatmaq üzrə olan sülhyaratma prosesini dəstəkləyən Finlandiya hökumətinin mövqeyi ilə ziddiyyət təşkil edir.

MÜBARİZ

Paylaş:

Baxılıb: 195 dəfə