Ulu Öndər Heydər Əliyev qüdrətli Azərbaycanın qurucusudur

Bakı:

17 °C

72 %

6 m/s

Əlaqə

AZ RU EN

Ana səhifə / Arxiv / Ulu Öndər Heydər Əliyev qüdrətli Azərbaycanın qurucusudur

Ulu Öndər Heydər Əliyev qüdrətli Azərbaycanın qurucusudur

01.10.2025 [23:19]

1991-ci ildə müstəqilliyini bərpa edən Azərbaycan, təəssüf ki, ilk illərdə siyasi səriştəsizlik və idarəetmə böhranı nəticəsində ağır faciələr yaşadı. Dövlət çevrilişləri, vətəndaş qarşıdurmaları, torpaqların ardıcıl işğalı, iqtisadi tənəzzül – bütün bunlar xalqı böyük bir fəlakətin astanasına gətirib çıxarmışdı. Belə bir məqamda millətin xilası üçün yeganə ümid ünvanı Ulu Öndər Heydər Əliyev idi. 1993-cü il oktyabrın 3-də keçirilmiş prezident seçkiləri xalqın xilasa olan inamının, böyük siyasi iradəsinin ifadəsi oldu. Xalq mütləq əksəriyyətlə Ulu Öndər Heydər Əliyevi dövlət başçısı seçərək taleyüklü qərar verdi. Həmin gün Azərbaycanın müstəqilliyinin əbədiliyini təmin edən yeni bir mərhələnin başlanğıcı oldu. Ulu Öndər xalqın iradəsinə söykənərək elan etdi: “Azərbaycanın dövlət müstəqilliyi əbədidir, dönməzdir və bizim qarşımızda duran vəzifə dövlət müstəqilliyini qorumaqdan, əbədi etməkdən ibarətdir.” 1993-cü ilin iyununda xalqın dəvəti ilə hakimiyyətə qayıdan Ulu Öndər Heydər Əliyev ölkəni parçalanmaqdan, vətəndaş müharibəsindən, dövlət müstəqilliyinin itirilməsindən xilas etdi. Gəncədə dövlətçiliyi sınağa çəkən qiyamın qarşısını almaq üçün həyatını təhlükə altına atması, siyasi qətiyyəti və xalqın etimadını doğruldan fəaliyyəti tarixdə xilaskarlıq missiyasının başlanğıcı kimi həkk olundu. Onun rəhbərliyi ilə ölkədə ictimai-siyasi sabitlik bərpa edildi, qeyri-qanuni silahlı dəstələr zərərsizləşdirildi, dövlət çevrilişlərinin qarşısı alındı, Azərbaycan vətəndaş müharibəsindən xilas oldu və ordu quruculuğu prosesinə start verildi. Bütün bunlar dövlətin mövcudluğunu təmin edən strateji addımlar idi. Heydər Əliyevin idarəetmə məktəbi müstəqil Azərbaycan dövlətçiliyinin möhkəm sütunlarını yaratdı. Onun müəllifi olduğu Azərbaycançılıq ideologiyası xalqı vahid milli məfkurə ətrafında birləşdirərək dünyadakı bütün soydaşlarımızı eyni ideyanın daşıyıcısına çevirdi. 1994-cü ildə imzalanmış “Əsrin müqaviləsi” Azərbaycanın dünya iqtisadi sisteminə inteqrasiyasının başlanğıcı oldu. Bakı-Tbilisi-Ceyhan və Bakı-Tbilisi-Ərzurum kəmərləri kimi nəhəng layihələr, enerji təhlükəsizliyi siyasəti Azərbaycanın beynəlxalq mövqeyini möhkəmləndirdi. 1995-ci ildə qəbul olunmuş ilk Milli Konstitusiya isə hüquqi dövlətin və demokratik idarəetmənin bünövrəsini qoydu. Konstitusiya Məhkəməsinin, Ombudsman institutunun yaradılması, ölüm hökmünün ləğvi, söz azadlığının təmin olunması – bunlar Heydər Əliyevin hüquqi dövlət quruculuğuna verdiyi töhfələr idi.

Ümummilli Liderin xarici siyasət kursu müstəqil Azərbaycanın beynəlxalq mövqelərini möhkəmləndirdi. Ermənistanın işğalçılıq siyasətinin ifşa olunması, Azərbaycanın ərazi bütövlüyünün dəstəklənməsi istiqamətində qəbul edilmiş beynəlxalq sənədlər Heydər Əliyevin diplomatik məharətinin nəticəsi idi. Azərbaycan regional və qlobal əməkdaşlıq layihələrinin mərkəzinə çevrildi. Ulu Öndər Heydər Əliyevin xilaskarlıq missiyası yalnız 1993-cü illə məhdudlaşmadı. Onun müəyyənləşdirdiyi strateji yol xəritəsi Azərbaycanın gələcək qələbələrinin əsasını qoydu. Dövlətçiliyin qorunması, güclü ordu quruculuğu, milli ideologiyanın formalaşması, iqtisadi dayaqların möhkəmləndirilməsi – bütün bunlar müasir Azərbaycanın uğurlarının təməlində dayanır. Bu yolun davamçısı isə cənab Prezident İlham Əliyev oldu. O, Ulu Öndər Heydər Əliyev siyasi kursunu yaradıcı şəkildə inkişaf etdirərək Azərbaycanı regionun lider dövlətinə çevirdi. Və nəhayət, 2020-ci ildə 44 günlük Vətən müharibəsi Ulu Öndərin böyük xilaskarlıq missiyasının məntiqi sonluğunu – Zəfər tacını bəxş etdi. Azərbaycan Ordusu Ali Baş Komandan İlham Əliyevin rəhbərliyi ilə işğal altındakı torpaqları azad etdi, tarixi ədalət bərpa olundu. Bu qələbə həm də Ulu Öndər Heydər Əliyevin uzaqgörən siyasətinin, qurduğu dövlətin və yaratdığı ordunun təntənəsi idi. 3 oktyabr 1993-cü il – Ulu Öndər Heydər Əliyevin Prezident seçildiyi gün Azərbaycan tarixində xilaskarlıq mərhələsinin başlanğıcı, 8 noyabr 2020-ci il isə həmin yolun Zəfərlə taclandığı gün kimi əbədi tarixin səhifələrinə və yaddaşımıza həkk olunub. Bu iki tarixi zirvə arasında keçilən yol bir həqiqəti təsdiqlədi: Azərbaycanın dövlət müstəqilliyi əbədidir, dönməzdir və bu müstəqilliyin əbədi yaşaması Ulu Öndər Heydər Əliyev yolunun varisliklə davam etdirilməsi ilə təmin olundu.

David İbramxəlilov,
YAP Qusar rayon təşkilatının sədri

Paylaş:

Baxılıb: 449 dəfə